Salimo 106:1-48
-
Ayisalayeli akulosya mtima wangayamichila
106 Amchimbichisye Ya!*
Amyamichile Yehofa, ligongo jwalakwejo ali jwambone.+Chinonyelo chakwe chakulupichika chichitama mpaka kalakala.+
2 Ana ŵani ŵampaka akombole kusala yindu yosope yatesile Yehofa?Kapena ana ŵani ŵampaka akombole kuwandisya yindu yosope yakuchimbichika yatesile jwalakwe?+
3 Ŵakusangalala ali ŵandu ŵakusatenda yindu mwachilungamo,Ŵandu ŵele ndaŵi syosope akusatendaga yindu yayili yakuŵajilwa.+
4 Pandaŵi jakwatendela yindu yambone ŵandu ŵawo, angumbuchilesoni une, wawo Yehofa.+
Asamalile une soni angulupusye.
5 Atende yeleyi kuti sangalale ni umbone wakusiŵalosya ŵandu ŵawo ŵakusagulidwa,+Kuti sangalale pampepe ni mtundu wawo,Soni kuti nachimbichisye wawojo mwakunyadila pampepe ni ŵandu ŵawo ŵali chipanje chawo.
6 M’weji tulemwisye mpela muŵatendele achinangolo ŵetu.+Tutesile yindu yakulemwecheka. Tutesile yindu yakusakala.+
7 Ku Iguputo achinangolo ŵetu nganalosya kuyamichila pa* yindu yakusimonjesya yaŵatendele.
Jemanjajo nganakumbuchila chinonyelo chawo chakulupichika chachaliji chekulungwa.Mmalomwakwe ŵajimuchile wawojo panyasa, elo, pa Nyasa Jechejewu.+
8 Nambo jwalakwejo ŵakulupwisye jemanjajo ligongo lya lina lyakwe,+Kuti machili gakwe gamanyiche.+
9 Jwalakwe ŵajilamwile Nyasa Jechejewu kuti jijumule, mwamti jajumwile.Jwalakwe ŵapitisye jemanjajo pamesi gakusokoka mpela kuti akwapitisya m’chipululu.+
10 Ŵakulupwisye jemanjajo mmyala mwa mundu juŵaŵenganaga nawo+Soni ŵawombwele mmyala mwa mdani* jwawo.+
11 Mesi gawunichile adani ŵawo,Mwamti pangali atamose jumo mwa jemanjajo juŵakulupwiche.*+
12 Payagambile kutendekwa yeleyi, jemanjajo ŵakulupilile yindu yaŵasasile kuti chachatendela.+Soni ŵatandite kwimba nyimbo syakumchimbichisya jwalakwejo.+
13 Nambo mwachitemachitema ŵaliŵalile yindu yaŵatendele yila.+Jemanjajo nganajembecheya kuti Mlungu ŵasalile yakutenda.
14 M’chipululu, jemanjajo ŵakuyisye yakusaka ya mtima wawo yakulinonyela.+Ŵamlinjile Mlungu m’chipululu.+
15 Jwalakwe ŵapele jemanjajo yindu yaŵamŵendile.Nambo kaneko ŵagwichisye ulwele wakogoya wawatendekasisye kuti jemanjajo agande kaneko kuwa.+
16 Ŵandu ku matenti gawo ŵamtendele jelasi* MoseSoni Aloni,+ jwamswela jwa Yehofa.+
17 Kaneko, chilambo chawugwiche ni kummila Datani,Soni chawunichile wosope ŵaŵasongene pampepe ni Abilamu.+
18 Moto wakolele pasikati pa gulu jawo.Malamba ga moto gatinisye ŵandu ŵakusakala.+
19 Jemanjajo ŵapanganyisye chiwanichisyo cha mwanache jwa ng’ombe ku HolebeSoni ŵachitindiŵalile chiwanichisyo chagumba chachisyanocho.+
20 Ŵachenganyisye uchimbichimbi wakwenela kumba une,Ni kuwupeleka ku chiwanisyo cha ng’ombe, jajili chinyama chakulya manyasi.+
21 Ŵamliŵalile Mlungu+ jwali Mkulupusyo jwawo,Juŵatesile yindu yekulungwa m’chilambo cha Iguputo,+
22 Juŵatesile yindu yakusimonjesya m’chilambo cha Hamu,+Elo, yindu yakutesya woga pa Nyasa Jechejewu.+
23 Mlungu ŵasigele panandi kwapyajila wosopewo.Nambo Mose, jwakusagulidwa jwakwe, ŵamchondelele jwalakwejo*Kuti awusye ukali wakwe wakonanga.+
24 Panyuma pakwe, jemanjajo ŵachinyosisye chilambo chambone.+Nganakulupilila yaŵasasile jwalakwe kuti chachatendela jemanjajo.+
25 Jemanjajo ŵatamilaga kudandawula m’matenti gawo.+Nganapikanila maloŵe ga Yehofa.+
26 Myoyo jwalakwe, ŵakwesisye mkono wakwe ni kulumbila pakwamba ya jemanjajo.Jwalakwe ŵalumbile kuti chatendekasye yakuti jemanjajo awile m’chipululu,+
27 Soni kuti yisukulu yawo yichigomechedwa ni mitundu jineNambosoni kuti chachiyitopolela m’yilambo yine.+
28 Kaneko jemanjajo ŵatandite kulambila nawo* Baala jwa ku Peoli,+Soni ŵalile mbopesi syakupelechedwa kwa ŵawe.*
29 Jemanjajo ŵamtandite melepe Mlungu ligongo lya yitendo yawo,+Mwamti mlili wabuchile pasikati pawo.+
30 Nambo Pinihasi paŵanyakwiche ni kutendapo kandu,Mliliwo walesile.+
31 Ligongo lya yeleyi, Mlungu ŵam’weni jwalakwejo kuŵa jwakulungamaKu mibado* josope mpaka kalakala.+
32 Jemanjajo ŵamtanditesoni Mlungu pamesi ga ku Meliba.*Kweleko Mose nganiyimjendela chenene ligongo lya jemanjajo.+
33 Jemanjajo ŵamtendekasisye jwalakwejo kuti apye mtima mnope,Mwamti jwalakwe ŵaŵechete mwangaganisya chenene ni pakamwa pakwe.+
34 Jemanjajo nganiŵapyajila ŵandu ŵamitundu jine,+Atamose kuti Yehofa ŵalamwile kuti atende yeleyo.+
35 Mmalomwakwe jemanjajo ŵawanganyichilene ni ŵandu ŵamitundu jine+Soni ŵajigalile* matala gawo.+
36 Jemanjajo ŵaliji mkujitumichila milungu jawo jakusepa,+Mwamti milungujo jaŵele mpela chakwatega jemanjajo.+
37 Jemanjajo ŵapelekaga mbopesi ŵanache ŵawo ŵachalumeSoni ŵanache ŵawo ŵachakongwe kwa yiŵanda.+
38 Ŵaliji mkusulusya myasi ja* ŵandu ŵangalemwa,+Myasi ja ŵanache ŵawo ŵachalume soni ŵachakongweŴaŵapelekaga kuŵa mbopesi kwa milungu jakusepa ja ku Kanani.+Mwamti chilambocho chaŵele changaswejela ligongo lya myasi jaŵasulusyagajo.
39 Jemanjajo ŵaŵele ŵangaswejela ligongo lya yitendo yawo.Jemanjajo ŵaŵele ŵangakulupichika kwa Mlungu* pakatende kawo ka yindu.+
40 Myoyo ukali wa Yehofa wagwilile ŵandu ŵakwe,Mwamti jwalakwe ŵatandite kunyalayidwa mnope ni ŵandu ŵali chipanje chakwe.
41 Jwalakwe mwakuwilisyawilisya ŵapelekaga jemanjajo mmyala mwa ŵandu ŵamitundu jine,+Ni chakulinga chakuti ŵandu ŵaŵaŵenganaga ni jemanjajo ŵalamulileje.+
42 Adani ŵawo ŵalagasyaga jemanjajo,Soni ŵaliji pasi pa ulamusi wawo.*
43 Ndaŵi syejinji jwalakwe ŵaliji mkwakulupusya jemanjajo,+Nambope jemanjajo ŵamjimuchilagape Mlungujo soni nganampikanilaga.+Soni ligongo lya yakulemwa yawo, jwalakwe ŵatesyaga sooni jemanjajo.+
44 Nambo jwalakwe ŵayiwonaga yaŵatiga kalaje jemanjajo+Mwamti ŵapikanaga kulila kwawo kwakuŵenda kuti ŵakamuchisye.+
45 Pakuŵa jwalakwe ŵakumbuchilaga chilanga chakwe pakwamba ya jemanjajo,Myoyo ŵatendelaga chanasa jemanjajo ligongo lya chinonyelo chakwe chakulupichika chachili chekulungwa.+
46 Ŵandu wosope ŵaŵakamulaga jemanjajo,+Jwalakwe ŵatendekasyaga kuti ŵatendeleje chanasa.
47 Atukulupusye, wawo Yehofa Mlungu jwetu,+Soni atusonganganye pampepe kutyochela kwa ŵandu ŵa mitundu jine+Kuti tuwujile tukaliyamichilesoni lina lyawo lyeswelaSoni kuti tukachimbichisye wawojo mwakusangalala.+
48 Achimbichikwe Yehofa, Mlungu jwa Isalayeli.Jwalakwejo achimbichikwe mpaka kalakala.+
Pelepo ŵandu wosope ajile kuti, “Ame!”*
Amchimbichisye Ya!*
Maloŵe Gamwiŵanda
^ Kapena kuti “Aleluya!” “Ya” kali kasale kakata ka lina lyakuti Yehofa.
^ Kapena kuti “nganapikanichisya ngopolelo ja.”
^ Ŵane akusati “mmagongo.”
^ Kapena kuti “juŵasigele.”
^ Ŵane akusati “dumbo.”
^ Mu Chihebeli ŵatiga, “ŵajimi pasikati pawo pasogolo pa jwalakwejo.”
^ Kapena kuti “jemanjajo ŵalipwatiche kwa.”
^ Pelepa akwamba mbopesi syakupelechedwa kwa ŵandu ŵawe kapena kwa milungu jajili jangali umi.
^ Ŵane akusati “Ku mipago.”
^ Kugopolela kuti “Kukangana.”
^ Kapena kuti “ŵalijiganyisye.”
^ Kapena kuti “Ŵaliji mkwawulaga.”
^ Kapena kuti “Jemanjajo ŵatesile chikululu chausimu.”
^ Mu Chihebeli ŵatiga, “ŵaliji mmyala mwawo.”
^ Kapena kuti “Yiŵe mmomo.”
^ Kapena kuti “Aleluya!” “Ya” kali kasale kakata ka lina lyakuti Yehofa.
