Masalimo 105:1-45
-
Yindu yakusiŵatendela Yehofa ŵandu ŵakwe mwakulupichika
-
Mlungu akusakumbuchila chilanga chakwe (8-10)
-
“Mkakwaya ŵandu ŵangu ŵanasagwile” (15)
-
Mlungu ŵamkamulichisyaga masengo Yosefe juŵasumisidwe kuŵa kapolo (17-22)
-
Yindu yakusimonjesya yaŵatesile Mlungu ku Iguputo (23-36)
-
Ayisalayeli akutyoka ku Iguputo (37-39)
-
Mlungu akukumbuchila chilanga chaŵatesile ni Abulahamu (42)
-
105 Amyamichileje Yehofa, aŵilanjileje pa lina lyakwe,Yindu yakusatenda jwalakwe ayimanyikasye pasikati pa mitundu ja ŵandu!
2 Amjimbileje jwalakwe, amjimbile nyimbo syakumkwesya* jwalakwejo.Aganichisyeje mnope* ya masengo gakwe gosope gakusimonjesya.
3 Anyadileje kuti akusalichimbichisya lina lyakwe lyeswela.
Mitima ja ŵandu ŵakusamsosasosa Yehofa jisangalale.
4 Amsosesose Yehofa soni machili gakwe.
Aloleje kwa jwalakwejo* ndaŵi syosope.
5 Akumbuchileje masengo gakwe gekulungwa gatesile.Akumbuchilejesoni yakusimonjesya yakwe soni kawelusye kakwe.
6 Mtendeje yeleyi jemanja ŵanache ŵa* Abulahamu jwakutumichila jwakwe,Elo, jemanja ŵanache ŵa Yakobo ŵandu ŵaŵamsagwile.
7 Jwalakwejo ali Yehofa Mlungu jwetu.
Jwalakwe akusawelusya chilambo chosope.
8 Jwalakwe akusakumbuchila chilanga chakwe mpaka kalakala,Elo, yaŵasasile kuti chachitenda* kumibado* masausande.
9 Chilanga chelechi ni chiŵatesile ni Abulahamu,Soni chaŵalumbile kwa Isaki.
10 Jwalakwejo ŵatamilikasisye chilanga chelechi kwa Yakobo mpela lilamusiSoni mpela chilanga changamala kwa Isalayeli.
11 Pakuchitamilikasya ŵatite, “Chinjimpa chilambo cha KananiKuti chiŵe chipanje chenu chakuti mpochele.”
12 Pandaŵi jaŵaŵechetaga yeleyi jemanjajo ŵaliji ŵandu ŵamnono,Elo, ŵaliji ŵamnono mnope soni ŵaliji achalendo m’chilambocho.
13 Jemanjajo ŵagambaga kwendajenda, kutyoka chilambo achi kwawula chilambo chine,Kutyoka kwaŵalamulilaga mwenye jwine kwawula kwa mwenye jwine.
14 Mlungu nganakunda kuti mundu jwalijose ŵalagasye jemanjajo,Nambo jwalakwe ŵagajamukaga mamwenye ligongo lya jemanjajo.
15 Ŵagasalilaga kuti, “Mkakwaya ŵandu ŵangu ŵanasagwile,Soni mkatendela chakusakala chilichose ŵakulochesya ŵangu.”
16 Jwalakwe ŵagwichisye sala m’chilambomo.Ŵawugele matala gawo gakupatila yakulya.*
17 Jwalakwe ŵamtumisye mundu kuti aŵe pasogolo pa jemanjajo,Jwele juŵamsumisye ni kuŵa kapolo. Mundu jwakwe ŵaliji Yosefe.
18 Ŵamtaŵile* sajo* syakwe ni mawunyolo.Soni ŵamtaŵile yeni m’lukosi mwakwe
19 Yeleyi yaŵele myoyo mpaka pagakwanilichikwe maloŵe gakwe.Maloŵe gaŵaŵechete Yehofa ni gagamswejesye jwalakwejo.
20 Mwenye ŵalamwile yakuti amkoposye jwalakwejo mundende,Elo, jwakulamulila jwa ŵanduwo ŵamgopwele jwalakwejo.
21 Mwenyewo ŵamŵisile jwalakwejo kuti aŵe jwakulolela liŵasa lyakwe lyosope,Elo, ŵamŵisile kuŵa jwakulamulila chipanje chakwe chosope.
22 Ŵatesile yeleyi kuti jwalakwejo asilamulileje* nduna sya mwenye mwakamulana ni yaŵayiwonaga kuŵa yakuŵajilwa,Soni kuti ŵajiganyeje lunda achakulungwakulungwa ŵa mwenyewo.
23 Kaneko Isalayeli ŵayiche ku Iguputo,Mwamti Yakobo ŵatemi m’chilambo cha Hamu mpela mlendo.
24 Mlungu ŵatendekasisye kuti ŵandu ŵakwe atupe mnope.Ŵatendekasisye kuti aŵe ŵamachili mnope kwapunda adani* ŵawo,
25 Ŵele Mlungu ŵakundile kuti mitima jawo jitande kuŵengana ni ŵandu ŵakwe,Kuti apangane mapulani gakwajimuchila ŵakutumichila ŵakwe.
26 Jwalakwe ŵatumisye jwakutumichila jwakwe MoseSoni Aloni ŵele ŵaŵasagwile.
27 Jemanjaji ŵalosisye yimanyisyo yakwe pasikati pa ŵanduwo,Elo, ŵatesile yakusimonjesya ya Mlungu m’chilambo cha Hamu.
28 Jwalakwe ŵatumisye chipi, mwamti chilambocho chatesile chipi.Ŵandu ŵaŵatumilewo ŵatesile yindu mwakamulana ni maloŵe gakwe.
29 Jwalakwe ŵagachenjile mesi gawo ni kuŵa myasiMwamti somba syosope syawile.
30 Chilambo chawo chosope chagumbalene yiwula,Atamose m’yipinda ya mwenye.
31 Jwalakwe ŵasilamwile membe kuti syajimuchileSoni tulombo twakuluma twaliji palipose m’madela gawo gosope.
32 Wula jaŵapochelaga jemanjajo, jwalakwejo ŵajichenjile kuti jiŵe matalilaSoni ŵatumisye njasi* m’chilambo chawocho.
33 Jwalakwe ŵajonasile yitela yawo ya mipeleya* soni yitela yamkujuSoni ŵaposokwele yitela yosope ya m’chilambomo.
34 Jwalakwe ŵasilamwile sombe kuti syagungumuchile,Sombe syamwanamwana syangaŵalanjika.
35 Sombesyo syalile yakumela yosope ya m’chilambocho,Soni syalile mbeju syosope syaŵapandile.
36 Kaneko, jwalakwe ŵawuleje ŵanache wosope ŵandanda kupagwa ŵa m’chilambo chawocho.Nditu, pakutandila pa machili gawo gakuŵeleka.
37 Jwalakwe ŵakopwesye ŵandu ŵakwe ali ajigele silifa soni golide.Soni pangali jwalijose pasikati pa mbumba* syakwe juŵakuŵele.
38 Jemanjajo paŵatyosile, ŵandu ŵa ku Iguputo ŵasangalele,Pakuŵa wakamwile woga ligongo lya Ayisalayeliwo.*
39 Jwalakwe ŵatambasukwile liwunde kuti lyachenjele jemanjajo
Soni ŵatumichisye moto kuti ŵamulichileje jemanjajo chilo.
40 Jemanjajo paŵaŵendile nyama, jwalakwejo ŵatumichisye yiwuti.Ndaŵi syosope ŵalisyaga jemanjajo yakulya yakutyochela kwinani mpaka kwikuta.
41 Jwalakwe ŵawugwile lwala, mwamti palwalapo pakopweche mesi.Mesigo gajesile m’chipululu mpela lusulo.
42 Jwalakwe ŵatesile yeleyi ligongo ŵakumbuchile chilanga chakwe chapadela chaŵatesile ni Abulahamu jwakutumichila jwakwe.
43 Myoyo, ŵakopwesye ŵandu ŵakwe ni chisangalalo chekulungwa,Elo, ŵakopwesye ŵakusagulidwa ŵakwe ali mkugumila mwakusangalala.
44 Jwalakwe ŵapele jemanjajo yilambo ya ŵandu ŵamitundu jine.Jemanjajo ŵajigele yindu yaŵayikamulile masengo ŵandu ŵane mwamachili.
45 Ŵatesile yeleyi kuti jemanjajo asunjeje yindu yaŵalamwileSoni kuti apikanileje malamusi gakwe.
Amchimbichisye Ya!*
Maloŵe Gamwiŵanda
^ Kapena kuti, “Amjimbile nyimbo ni yida yakwimbila syakwamba.”
^ Kagopolele kanesoni, “Aŵecheteje.”
^ Mu Chihebeli ŵatiga, “ngope jakwe.”
^ Kapena kuti, “yisukulu ya.”
^ Mu Chihebeli ŵatiga, “maloŵe gaŵalamwile.”
^ Ŵane akusati “mipago.”
^ Mu Chihebeli ŵatiga, “ŵatemangwile ndodo jawo jilijose ja mkate.” Komboleka kuti pelepa akwamba ndodo syaŵakamulichisyaga masengo pakusunjila mikate.
^ Mu Chihebeli ŵatiga, “Ŵasilagasisye.”
^ Ŵane akusati “makawu.”
^ Mu Chihebeli ŵatiga, “asitaŵeje.”
^ Ŵane akusati “achimmagongo.”
^ Kapena kuti, “ŵatumisye malamba ga moto.”
^ Mipeleya jili mtundu winewakwe wa yisogosi yakusayikamulichisya masengo pakupanganya finyo.
^ Alole Kugopolela kwa Maloŵe Gane.
^ Mu Chihebeli ŵatiga, “jemanjajo.”
^ Kapena kuti, “Aleluya!” “Ya” kali kasale kakata ka lina lyakuti Yehofa.
