Masalimo 104:1-35
104 Umi wangu umchimbichisye Yehofa.
Wawo Yehofa Mlungu jwangu, wawojo ali ŵakulungwa mnope.
Wawojo awete uchimbichimbi soni kusalala.
2 Wawojo aliŵijilile ni lilanguka mpela chakuwala.Wawojo ŵakutambasukwile kwinani mpela akutambasukula nguwo ja tenti.
3 Yipinda yamwinani ya nyumba jakwe ŵayitaŵile ni mbalaŵala penani pa nyasa,*Ni kugatenda mawunde kuti gaŵe ligaleta* lyakwe,Soni ni kwendaga pamapapiko ga mbungo.
4 Jwalakwe akusagatendekasya malayika gakwe kuti gaŵe gamachili,*Soni akusiŵatendekasya ŵakutumichila ŵakwe kuti aŵe moto wakutinisya.
5 Jwalakwe achiŵisile chilambo chapasi pa fendeshoni* jakwe.Chilambocho ngasichityoka pamalo gakwe* mpaka kalakala.
6 Ŵachiwunichile ni mesi gejinji mpela kuti achiwunichile ni chakuwala.
Mesigo gakwesile mwinani mpaka kugapunda matumbi.
7 Mesigo paŵagajamwiche, gatisile.Pagapikene lisegwe lya kulindima kwawo, gatandite kuwutuka mwachitemachitema,
8 Kuwutuchila kumalo gaŵagalinganyichisye kuti gatameje.Pambesi pakwe matumbi gatandite kwawula mwinani, soni yitiŵi yatiŵile pasi.
9 Wawojo ŵaŵisile malile ga mesigo kuti gakapunda pelepo,Ni chakulinga chakuti gakachiwunichilasoni chilambo chapasi.
10 Jwalakwe akusapeleka mesi mu yitiŵi.*Mesigo gakusajenda pasikati pa matumbi.
11 Yinyama yosope yamwitinji yikusamwa mesigo.Abulu ŵamwitinji akusamasya njota jawo mwelemo.
12 Yijuni yikusataŵa yisusi yawo mumbali mwa mesigo.Yijuniyo yikusajimba mu yitela yewutalile masamba.
13 Jwalakwejo akusagajitilila matumbi kutyochela mu yipinda yakwe yamwinani.
Chilambo chapasi chikusagumbala ni yisogosi ya masengo gawo.
14 Jwalakwe akusamelesya manyasi kuti ng’ombe silyeje,Soni akusamelesya yakumela kuti ayikamulichisyeje masengo ŵandu,Ni chakulinga chakuti apateje yakulya pachilambo.
15 Ŵapanganyisye finyo jwajukusatendekasya mtima wa mundu kusangalala,Mawuta gagakusatendekasya ngope ja mundu kutipitila,Soni yakulya yayikusapeleka machili kwa mundu.*
16 Yitela ya Yehofa yikusapochela mesi gakwanila,Elo, yitela ya mkungusa ya ku Lebanoni yaŵapandile jwalakwejo.
17 Yijuni yikusataŵa yisusi yakwe mwelemo.
Nyumba ja chijuni chakolanjikwa kuti lisekwe jili mu yitela ya janipa.
18 Matumbi gelewulewu gali malo gakutama mbusi syam’matumbi.Malwala gali malo gakuuŵa njechele.
19 Jwalakwe ŵapanganyisye mwesi kuti wamanyisyeje ŵandu ndaŵi syakulekanganalekangana.Lyuŵa likusamanyilila ndaŵi jakwe jakuti likapile.
20 Wawojo akusayikasya chipi, mwamti chilo chikusatanda.Pandaŵi jeleji yinyama yosope yamwitinji yikusatanda kwendajenda.
21 Masimba gakusatongola pakusakulasakula nyama,Soni gakusasosasosa yakulya yakusapeleka Mlungu.
22 Lyuŵa palikopweche,Gakusaleka kusakulako ni kuwujila kumalo gawo gakutama kuti gakagone.
23 Ŵandu akusajawula kumasengo gawo,Soni akusakamula masengogo mpaka ligulo.
24 Wawo Yehofa, masengo gawo gali gejinji mnope.
Ŵapanganyisye yindu yosopeyi mwalunda.
Chilambo chapasi chigumbele ni yindu yaŵapanganyisye wawojo.
25 Panasoni nyasa, jajili jekulungwa soni jetambasukuche.Mwelemu mwana yaumi yangaŵalanjika, yamwanamwana ni yekulungwa yakwe.
26 M’nyasamo mukusajenda masitima,Soni mwana Lefiyatani* jiŵajipanganyisye kuti jing’ambileje mwelemo.
27 Yaumi yosope yaŵayipanganyisye yikusajembecheya wawojoKuti ayipe yakulya yayikusosechela pandaŵi jakwe.
28 Payipele yakulyayo, yaumiyo yikusayisonganganya pampepe.
Wawojo pawugwile ligasa lyawo, akusayijikutisya ni yindu yambone.
29 Wawojo pasisile ngope jawo, yindu yaŵapanganyisyeyo yikusatenda woga.
Naga akutyosya mpweya wakwe, yikusawa ni kuwujila kwitaka.
30 Wawojo patumisye msimu wawo weswela, yikusaŵa ni umi,Soni wawojo akusatendekasya yindu yosope yapachilambo chapasi kuŵa yasambano.
31 Uchimbichimbi wa Yehofa ngasiwumala mpaka kalakala.
Yehofa chachisangalala ni masengo gakwe.
32 Jwalakwe akusachilola chilambo chapasi, mwamti chikusatetemela.Akusagakwaya matumbi, mwamti gakusatuka lyosi.
33 Chinjimjimbila Yehofa kwa umi wangu wosope.Chinjijimba nyimbo syakumchimbichisya* Mlungu jwangu pandaŵi josope jandili ni umi.
34 Ngusaka kuti yangusaganisya yimsangalasyeje jwalakwejo.*
Chinjisangalala mwa Yehofa.
35 Ŵakulemwa ngasawonekasoni pachilambo chapasi,Soni ŵakusakala ngasapagwasoni.
Umi wangu umchimbichisye Yehofa. Amchimbichisye Ya!*
Maloŵe Gamwiŵanda
^ Mu Chihebeli ŵatiga, “ŵayitaŵile ni mbalaŵala m’mesi.”
^ Ligaleta lili ngolo jakuwutidwa ni mahachi.
^ Kapena kuti, “akusagatendekasya malayika gakwe kuti gaŵe mpela mbungo.” Mu Chihebeli akusati, ru·chohth.
^ Ŵane akusati “yilimbilimbi.”
^ Kapena kuti, “ngasichitenganyika.”
^ Yitiŵi yakusala pelepa yaliji yana lusulo.
^ Mu Chihebeli ŵatiga, “ku mtima wa mundu.”
^ Alole Kugopolela kwa Maloŵe Gane.
^ Kapena kuti, “Chinjijimba nyimbo ni yida yakwimbila syakwamba.”
^ Kagopolele kanesoni, “Nguŵenda kuti yangusaganichisya yakwamba jwalakwejo yiŵeje yakusangalasya.”
^ Kapena kuti, “Aleluya!” “Ya” kali kasale kakata ka lina lyakuti Yehofa.
