Masalimo 103:1-22
Nyimbo ja Daudi.
103 Umi wangu umchimbichisye Yehofa.Chilichose chachili mwa une chichimbichisye lina lyakwe lyeswela.
2 Umi wangu umchimbichisye Yehofa.Ngangusosekwa kuliŵalila yindu yosope yandendele jwalakwejo.
3 Jwalakwe akusangululuchila yakulemwa yangu yosope,Soni akusambosya yilwele yangu yosope.
4 Jwalakwe akusawuwombola umi wangu ku chiwa,*Soni akusambwecha chinonyelo chakwe chakulupichika.
5 Jwalakwe akusambaga yindu yambone yakwanila paumi wangu wosope,Ni chakulinga chakuti mbe chiŵela jwachinyamata soni jwamachili mpela ngwasi.
6 Yehofa akusiŵatendela yindu mwachilungamo soni mwagolokaŴandu wosope ŵakulagasika.
7 Jwalakwe ŵammanyisye Mose matala gakwe.Ŵamanyisyesoni yitendo yakwe ŵanache ŵa Isalayeli.
8 Yehofa ali jwambone mtima soni jwakwatendela ŵane chanasa.Jwangatumbila chitema soni jwagumbala ni chinonyelo chakulupichika.
9 Jwalakwe ngasatamila kutupatila magongo,Kapena kututumbilila mpaka kalakala.
10 Jwalakwe nganatutendela yindu mwakamulana ni kulemwa kwetu,Kapena kutuwuchisya mwakamulana ni yakulemwa yetu.
11 Mpela mwayiŵelele kuti nganituŵa tukombwele kulinga lutando lwakutyochela pachilambo chapasi kuja kwika mpaka kwinani,Myoyosoni chinonyelo chakwe chakulupichika chakusiŵalosya ŵandu ŵakusamjogopa jwalakwejo chili chekulungwa mnope.
12 Mpela mwayiŵelele kuti kungopokolyuŵa kuli kwakutalikangana ni kungapililolyuŵa,Myoyosoni yakulemwa yetu ayiŵisile kwakutalikangana ni m’weji.
13 Mwakulandana ni baba jwakusiŵatendela chanasa ŵanache ŵakwe,Nombenajo Yehofa akusiŵatendela chanasa ŵandu ŵakusamjogopa jwalakwe.
14 Akusatenda yeleyi pakuŵa akumanyilila yaŵatite pakutupanganya,Mwamti akusakumbuchila kuti tuli luwundu.
15 Pakwamba ya mundu, masiku ga umi wakwe gali mpela masiku ga manyasi.Jwalakwe akusasipuka mpela maluŵa ga mwitinji.
16 Nambo mbungo pajipujile gangawonekasoni,Mpela kuti nganigapagwa.*
17 Nambo chinonyelo chakulupichika cha Yehofa chichiŵa mpaka kalakala,Kwa ŵandu ŵakusamjogopa jwalakwe,Soni chilungamo chakwe akusachilosya mpaka kwa yisukulu yawo.
18 Elo, chichiŵa mpaka kalakala kwa ŵandu ŵakusasunga chilanga chakwe,Soni kwa ŵandu ŵakusalolechesya kuti akukuya yindu yalamwile.
19 Yehofa atamilikasisye mwakulimbangana mpando wakwe waumwenye kwinani.Soni umwenye wakwe ukusalamulila chilichose.
20 Mumchimbichisye Yehofa, jemanja malayika gakwe gamachili,Jemanja ŵamkusapikanila maloŵe gakwe ni kutenda yindu mwakamulana ni maloŵego.
21 Mumchimbichisye Yehofa, jemanja magulu gakwe ga ngondo ga malayika,Jemanja ŵamkusimumtumichila jwalakwejo soni kutenda yakusaka yakwe.
22 Mumchimbichisye Yehofa, jemanja wosope ŵamli masengo gakwe,Kulikose kwakusalamulila jwalakwejo.*
Umi wangu umchimbichisye Yehofa.
Maloŵe Gamwiŵanda
^ Kapena kuti, “kumalembe.” Mu Chihebeli ŵatiga, “kulisimbo.”
^ Mu Chihebeli ŵatiga, “Mwamti pamalogo pakusaliŵalila kuti pamesile maluŵa.”
^ Kapena kuti, “Kulikose kwawukusayika ulamusi wakwe.”
