Masalimo 102:1-28
Lipopelo lya mundu jwakulagasika pandaŵi jajasile mtima* lyakumkusulila Yehofa yakudandawula yakwe.
102 Wawo Yehofa, apikane lipopelo lyangu.Apikane kulila kwangu kwakuŵenda kuti angamuchisye.
2 Akasisila une ngope jawo pandaŵi jangusimana ni yakusawusya.
Atejele liwiwi lyawo kwa une.*Anjanje une mwachitemachitema pandaŵi janaŵendile.
3 Pakuŵa masiku ga umi wangu gakusimililika mpela lyosi,Soni mawupa gangu gatiniche mpela malo gakolechesya moto.
4 Mtima wangu utengwiche soni uŵele mpela manyasi geŵawuche,Mwamti atamose kulya ngangukusaka.
5 Ligongo lyakuwuwula mwakwesya maloŵe,Mnowu wangu unyambatile ku mawupa gangu.
6 Ndili jikajikape mpela chijuni cha chingwititi m’chipululu.Ndili mpela namame pamasame.
7 Chilo chosope ngusaŵa mesope kusoŵa lugono.Ndili mpela chijuni chachili jikajikape pamsakasa.
8 Adani* ŵangu akutamila kunyosya une lisiku lililyose.
Ŵandu ŵakusanyosya une akukamulichisya masengo lina lyangu pakutembelela.
9 Sambano ngulya liwu mpela chakulya changu,Soni yakumwa yangu yiwanganyichilene ni misosi.
10 Yili myoyo ligongo lya ukali wawo soni kutumbila kwawo,Pakuŵa wawojo ŵanyakwile une kuti agambe kunjasa.
11 Masiku ga umi wangu gali mpela chiwulili chachikusimililika,*Soni une ngunyala mpela manyasi.
12 Nambo wawojo chachitama mpaka kalakala, wawo Yehofa,Soni wawojo chachiŵa ŵakumanyikape* kumibado* josope.
13 Nditu wawojo chachinyakuka kuti amlosye chanasa chawo Siyoni,Pakuŵa ndaŵi jakumlosya jwalakwejo umbone mtima jikwanile.Ndaŵi jakwe jakuŵajilwa jiyiche.
14 Pakuŵa ŵakutumichila ŵawo akusasangalala ni maganga gakwe,Soni akusamnonyela Siyoni atamose ni luwundu lwakwe.
15 Mitundu ja ŵandu jichilijogopa lina lya Yehofa,Soni mamwenye gosope ga pachilambo chapasi gachiwujogopa uchimbichimbi wawo.
16 Yehofa chachiwutaŵasoni msinda wa Siyoni.Jwalakwe chachiwonechela mu uchimbichimbi wakwe.
17 Jwalakwe chachitejela liwiwi lyakwe kuti apikane lipopelo lya ŵandu ŵakulaga.Jwalakwe ngasaganyosya mapopelo gawo.
18 Yeleyi ŵalembele ŵandu ŵa mu m’bado wawukwika msogolo,Ni chakulinga chakuti ŵandu ŵachachipagwa* msogolowo chamchimbichisye Ya.
19 Kutyochela pamalo gakwe gapenani gagali geswela, jwalakwejo akusalola pasi,Elo, Yehofa akusalola pachilambo chapasi kutyochela kwinani,
20 Kuti apikane kuwuwula kwa mkayidi,Soni kuti ŵagopole ŵandu ŵagamulidwe kuti awulajidwe.
21 Akusatenda yeleyi ni chakulinga chakuti ŵandu awandisye yakwamba lina lya Yehofa mu Siyoni,Soni yakwamba uchimbichimbi wakwe mu Yelusalemu,
22 Ŵanduwo soni mamwenyePasongene pampepe kuti amtumichile Yehofa.
23 Wawojo asumwile machili gangu mkaningule.Ajipiye masiku ga umi wangu.
24 Une natite, “Wawo Mlungu jwangu,Akatyosya umi wangu mkaningalambale,Wawo ŵakusatama kumibado josope.
25 Wawojo ŵaŵisile fendeshoni* ja chilambo chapasi kalakala,Soni kwinani gali masengo ga makono gawo.
26 Yindu yeleyi yichijonasika, nambo wawojo chachiŵape chitamile.Yindu yosopeyi yichimala mpela chakuwala.
Mpela mwayikusaŵela ni chakuwala pachimasile, yindu yeleyi payichimala chachiŵika yine.
27 Nambo wawojo ngasachenga, soni yaka ya umi wawo ngasiyimala.
28 Ŵanache ŵa ŵakutumichila ŵawo chachitamaga mwangajogopa chilichose,Soni ŵanache ŵawo chachitamilichika pameso pa wawojo.”
Maloŵe Gamwiŵanda
^ Kapena kuti, “pandaŵi jafoweche.”
^ Kapena kuti, “Ajiname kuti ambikane.”
^ Ŵane akusati “achimmagongo.”
^ Kapena kuti, “chiwulili chachikulewupa kaneko ni kusimililika.”
^ Kapena kuti, “Soni lina lyawo lichitamape.” Mu Chihebeli ŵatiga, “Soni chikumbuchilo chawo chichitamape.”
^ Ŵane akusati “mipago.”
^ Mu Chihebeli ŵatiga, “ŵachachipanganyidwa.”
^ Ŵane akusati “yilimbilimbi.”
