Ngani Syambone Syaŵalembile Maliko 8:1-38
-
Yesu akulisya ŵandu 4,000 (1-9)
-
Kuŵenda chimanyisyo (10-13)
-
Chakusasaŵisya cha Afalisi soni cha Helodi (14-21)
-
Mundu jwangalola akumposya ku Betisaida (22-26)
-
Petulo akusala kuti Yesu ali Klistu (27-30)
-
Yesu akusala ya chiwa chakwe (31-33)
-
Yayikusosekwa kuti mundu aŵe jwakulijiganya jusyesyene jwa Yesu (34-38)
8 M’masiku gelego, gulu ja ŵandu jasongenesoni nambo paliji pangali yakulya yiliyose. Myoyo Yesu ŵaŵilasile ŵakulijiganya ŵakwe ni kwasalila kuti,
2 “Ngwatendela chanasa ŵanduŵa, ligongo atemi ni une kwa masiku gatatu nambo nganalya chilichose.
3 Naga ngwasalila kuti ajawuleje kumangwawo ni sala, chalembuche petala, soni ŵane mwa jemanjaji atyochele kwakutalika.”
4 Nambo ŵakulijiganya ŵakwe ŵamwusisye kuti, “Ana mundu mpaka apate kwapi yakulya yakwanila ŵandu wosopeŵa kwitinji mpela akuno?”
5 Pelepo Yesu ŵawusisye kuti, “Ana mkwete mikate* jilingwa?” Ŵakulijiganyawo ŵajanjile kuti, “Jipali 7.”
6 Kaneko ŵasalile ŵandu wosopewo kuti atame pasi. Ni ŵajigele mikate 7 jila, ŵapopesile kwa Mlungu ni kujigaŵanyagaŵanya. Pambesi pakwe, ŵapele ŵakulijiganya ŵakwe kuti agaŵanye, ni jemanjajo ŵagaŵile ŵandu wosopewo.
7 Ŵakwetesoni tusomba twakuŵalanjika. Paŵapopesile, ŵapele ŵakulijiganyawo kuti apeleganye kwa ŵanduwo.
8 Myoyo ŵanduwo ŵalile mpaka kwikuta, mwamti ŵalokotele yakusigala ni yagumbele yitundu 7 yekulungwakulungwa.
9 Mwa ŵandu ŵaŵalilewo, papali achalume ŵakwana 4,000. Kaneko ŵasalile kuti ajawuleje.
10 Ndaŵi jijojo Yesu ŵakwesile liboti yimpepe ni ŵakulijiganya ŵakwe ni ŵayiche ku chigawo* cha Dalamanuta.
11 Kweleko ŵayiche Afalisi ni kutanda kumsisya. Pakusaka kumlinga, jemanjajo ŵamsalile kuti ŵalosye chimanyisyo chakutyochela kwinani.
12 Pelepo Yesu yampweteche mnope mumtima ni ŵatite, “Ligongo chichi m’bado* welewu ukusachilila kulola chimanyisyo? Nditu nguŵecheta kuti m’bado welewu ngasiwupochela chimanyisyo chilichose.”
13 Paŵaŵechete yeleyi, jwalakwe ŵatyosile. Kaneko ŵakwesilesoni liboti ni kwawula lisi line lya nyasa.
14 Nambope, ŵakulijiganyawo ŵaliŵalile kujigala mikate paulendowu, mwamti ŵagambile kola mkate umpepe basi mwibotimo.
15 Sambano Yesu ŵasalichisye mwamachili kuti, “Mkalamuche, soni msamale ni chakusasaŵisya cha Afalisi soni chakusasaŵisya cha Helodi.”
16 Kaneko ŵakulijiganyawo ŵatandite kukangana paligongo lyakuti nganakola mikate.
17 Yesu paŵayimanyi yeleyi, ŵawusisye jemanjajo kuti, “Ligongo chichi jemanja mkukangana pangani jakuti nganimkola mikate? Ana ngamkuyimanyililape chenene yambele ndili mkumsalila, soni ana ngamkuyipikanichisyape? Ana mitima jenu jili jangapikanichisyape?
18 ‘Atamose kuti mkwete meso, ana ngamkulola? Soni atamose kuti mkwete mawiwi, ana ngamkupikana?’ Ana jemanja mliŵalile kuti
19 ni mikate msano nalisisye achalume 5,000? Ana mwalokotele yitundu yilingwa ya yakusigala?” Pelepo jemanjajo ŵajanjile kuti, “Yitundu 12.”
20 Ŵawusisyesoni kuti, “Panalisisye achalume 4,000 ni mikate 7 pala, ana mwalokotele yitundu yilingwa yekulungwakulungwa yegumbale ni yakusigala?” Jemanjajo ŵajanjile kuti, “Yitundu 7.”
21 Pelepo jwalakwe ŵawusisye kuti, “Sambano ana ngamkupikanichisyape?”
22 Sambano Yesu ni ŵakulijiganya ŵakwe ŵala ŵayiche ku Betisaida. Kweleko ŵandu ŵayiche kwa jwalakwe ni mundu jwangalola, ni ŵamchondelele kuti amposye* mundujo.
23 Yesu ŵamkamwile mkono mundujo ni kwawula najo kusa kwa musiwo. Kweleko ŵampachile mata m’meso mundujo, kaneko ŵasajiche makono gakwe pa mundujo ni kumwusya kuti, “Mkulola chilichose?”
24 Mundujo ŵawugwile meso gakwe ni ŵatite, “Ngwawona ŵandu, nambo akuwoneka mpela yitela yikwendajenda.”
25 Pelepo Yesu ŵakamwilesoni meso ga mundujo, kaneko mundujo ŵatandite kulola chenenepe. Meso gakwe gawugwiche, ni ŵatandite kulola chilichose chenenepe.
26 Kaneko ŵamsalile kuti ajawuleje kumangwakwe, soni ŵamsalile kuti, “Mkajinjila m’musimu.”
27 Sambano Yesu ni ŵakulijiganya ŵakwe ŵanyakwiche ni kwawula ku misi ja ku Kaisaleya jwa ku Filipi. Ali mwitala, Yesu ŵatandite kwawusya ŵakulijiganya ŵakwe kuti, “Ana ŵandu akutiga une ndili ŵani?”
28 Jemanjajo ŵamjanjile kuti, “Akuti wawo ali Yohane M’batisi, nambo ŵane akuti wawo ali Eliya, soni ŵane akuti wawo ali jumo mwa ŵakulochesya.”
29 Nambo kaneko ŵawusisye jemanjajo kuti, “Nambi jemanja mkusati une ndili ŵani?” Petulo ŵajanjile kuti, “Wawo ali Klistu.”
30 Pelepo ŵasalichisye mwamachili jemanjajo kuti akamsalila jwalijose pakwamba ya jwalakwejo.
31 Nambosoni, jwalakwe ŵatandite kwajiganya jemanjajo kuti Mwanache jwa mundu akusosekwa kusimana ni yakusawusya yejinji. Ŵasalilesoni kuti achakulungwa soni ŵakulolela ŵakutaga mbopesi ni alembi chakamkane. Panyuma pakwe chachiwulajidwa, nambo pa lisiku lyatatu chachijimuka.
32 Yisyene, jwalakwe ŵaŵechete maloŵe gelega mwakulimba mtima. Nambo Petulo ŵamjigalile Yesu pambali ni kutanda kumjamuka.
33 Pelepo Yesu ŵagalawiche, ni kwalola ŵakulijiganya ŵanewo, kaneko ŵamjamwiche Petulo kuti, “Mjawule kunyuma kwangu, Satana! ligongo nganisyo syenu nganisiŵa syakutyochela kwa Mlungu nambo kwa ŵandu.”
34 Kaneko ŵajiŵilasile gulu ja ŵandujo pampepe ni ŵakulijiganya ŵakwe ni kwasalila kuti, “Jwalijose jwakusaka kunguya une, akusosekwa kuleka yakusaka ya mtima wakwe ni kunyakula chitela chakwe chakulagasichila* ni kunguyaga une ndaŵi syosope.
35 Pakuŵa jwalijose jwakusaka kuwukulupusya umi wakwe chachiwujasa, nambo jwalijose jwakwasa umi wakwe ligongo lya une, soni ligongo lya ngani syambone, chachiwukulupusya.
36 Ana mundu mpaka apindule chichi ali apatile chilambo chosope nambo ni kwasa umi wakwe?
37 Soni ana mundu mpaka apeleche chichi champaka achenganye ni umi wakwe?
38 Jwalijose jwakutenda sooni ligongo lya une soni ligongo lya maloŵe gangu mu m’bado wangakulupichika* soni wakulemwawu, Mwanache jwa mundu chachimtendelasoni sooni pachachiyika mu uchimbichimbi wa Atati ŵakwe yimpepe ni malayika geswela.”
Maloŵe Gamwiŵanda
^ Mikate jakala ŵajipanganyaga ni utandi wa tiligu kapena balele.
^ Ku Mozambique akusati “província.”
^ Ku Mozambique akusati “geração.”
^ Kapena kuti, “amlamisye.”
^ Alole Kugopolela kwa Maloŵe Gane.
^ Maloŵe gakwe gandanda, “m’bado wachikululu.”
