Ngani Syambone Syaŵalembile Luka 14:1-35
-
Mundu jwakuyimba makono ni ngongolo akumposya pa lisiku lya Sabata (1-6)
-
Mŵeje mlendo jwakulinandiya (7-11)
-
Mwaŵilanjileje ŵanganakola champaka amwuchisye (12-14)
-
Chiwanichisyo cha achalendo ŵaŵakanile kwika (15-24)
-
Yakusosekwa kutenda mundu kuti aŵe jwakumkuya jwa Yesu (25-33)
-
Njete jemale machili (34, 35)
14 Pandaŵi jine Yesu ŵapite kukulya kunyumba ja jumo mwa ŵakulongolela ŵa Afalisi pa lisiku lya Sabata. Sambano ŵandu ŵaŵaliji m’nyumbamo ŵagambaga kumlolechesya.
2 Pasogolo pakwe papali mundu jwine juŵalwalaga ulwele wakuyimba makono ni ngongolo.
3 Pelepo Yesu ŵawusisye ŵandu ŵakumanyilila mnope Chilamusi soni Afalisi kuti, “Ana malamusi gakusakunda kumposya* mundu pa lisiku lya Sabata kapena iyayi?”
4 Nambo jemanjajo nganajanga chilichose. Myoyo jwalakwe ŵamkamwile mundujo ni kumposya, kaneko ŵamsalile kuti ajawuleje.
5 Kaneko ŵawusisye jemanjajo kuti, “Ana ŵani mwa jemanja jwele mwanache jwakwe kapena ng’ombe jakwe jili jigwilile m’chisima pa lisiku lya Sabata nganaŵa ajikopwesye ndaŵi jijojo?”
6 Nambo jemanjajo nganakombola kwanga chiwusyo chelechi.
7 Paŵaweni ŵandu ŵaŵaŵilanjidwewo ali mkutama pamalo gakuchimbichika mnope, jwalakwe ŵasalile jemanjajo chiwanichisyo. Jwatite,
8 “Pamŵilanjidwe ni mundu jwine ku pwando ja ulombela, mkatamaga pamalo gakuchimbichika mnope. Komboleka kuti mundu jwine jwakuchimbichika mnope kupunda mmwejo juŵilanjidwesoni.
9 Kaneko mundu juŵamŵilasilejo chachiyika ni kumsalila mmwejo kuti, ‘Tukusaka pamalopa atame aŵa.’ Myoyo mmwejo chimchityoka mwasooni ni kuja kutama pamalo gakutuluka mnope.
10 Nambo pamŵilanjidwe, mtameje pamalo gakutuluka mnope ni chakulinga chakuti mundu juŵamŵilasile jula pachayiche amsalile mmwejo kuti, ‘Bwanawe, mjawule mkatame pamalo gakuchimbichika mnope.’ Pelepo chimchiŵa jwakuchimbichika pameso pa achalendo ŵane wosope.
11 Pakuŵa jwalijose jwakulikwesya chachimtulusya, soni jwalijose jwakulinandiya chachimkwesya.”
12 Kaneko ŵaŵechete ni mundu juŵamŵilasile jula kuti, “Pamlinganyisye yakulya yamusi kapena yaligulo, mkasimwaŵilanjilaga achimjenu kapena achalongo achimjenu kapena ŵamwiŵasa mwenu kapenasoni achimjenu ŵakusichila. Ligongo jemanjajo chachimŵilanjilasoni mmwejo yakulya, ni yichiŵa mpela akumwuchisya.
13 Nambo pamlinganyisye pwando mwaŵilanjileje ŵakulaga, ŵalemale, soni ŵangalola.
14 Pamtesile yeleyi chimchiŵa ŵakusangalala, ligongo jemanjajo nganakola chilichose champaka amwuchisye. Pakuŵa Mlungu ni juchachimwuchisya mmwejo pakwimuka kwa ŵandu ŵakulungama.”
15 Jumo mwa achalendowo paŵapikene yeleyi, ŵamsalile Yesu kuti, “Jwana upile mundu juchachilya mu Uchimwene wa Mlungu.”
16 Pelepo Yesu ŵamsalile mundujo kuti, “Mundu jwine jwalinganyisye pwando jekulungwa ja chakulya cha ligulo, soni ŵaŵilasile ŵandu ŵajinji.
17 Jwalakwe ŵamtumile kapolo jwakwe pandaŵi ja chakulya cha ligulocho kuti akasalile ŵandu ŵaŵaŵilanjile ŵala kuti, ‘Kwende, ligongo yosope yikomboleche.’
18 Nambo jwalijose jwatandite kusala magongo gakwe gakukanila kwawula. Jwandanda ŵamsalile kapolojo kuti, ‘Sumile mgunda ni ngusosekwa ngawulole. Pepani, ngangombola kwika.’
19 Jwine jwatite, ‘Sumile ng’ombe 10 syakulima ni ngusaka ngasilinje. Pepani, ngangombola kwika.’
20 Jwinesoni jwatite, ‘Une ngambile kulombela kwene, ni paligongo lyeleli ngangombola kwika.’
21 Myoyo kapolo jula jwapite kwa msyenenyumba jula ni kumsalila yindu yeleyi. Pelepo msyenenyumbajo ŵatumbile mnope ni ŵamsalile kapolojo kuti, ‘Mjawule mwachitema m’misewu jekulungwakulungwa soni m’matala ga mumsinda, ni mkajigale ŵandu ŵakulaga, ŵangalola soni ŵalemale.’
22 Kapolo jula pajwawusile, jwatite, ‘Ambuje, yaŵalamwile yila yikomboleche, nambo malo gapalipe.’
23 Myoyo msyenenyumba jula ŵamsalile kapolojo kuti, ‘Mjawule ku misewu ja kusa kwa msinda ni mkalimbikasye ŵandu kuti ayiche, ni chakulinga chakuti nyumba janguji jigumbale.
24 Pakuŵa ngumsalila kuti, pa ŵandu ŵanaŵilasile ŵala pangali atamose jumo juchalye yakulya yanguyi.’”
25 Sambano gulu jekulungwa ja ŵandu jaliji mkwenda ni Yesu. Myoyo jwalakwe ŵagalawiche ni kwasalila jemanjajo kuti,
26 “Naga jwine akwika kwa une nambo ni ngaŵengana ni babagwe, mamagwe, ŵamkwakwe, ŵanache ŵakwe, achakulugwe, achapwakwe, achalumbugwe, soni atamose umi wakwe usyesyenewo, nganaŵa aŵele jwakulijiganya jwangu.
27 Jwalijose jwanganyakula chitela chakwe chakulagasichila* ni kunguyaga une, nganaŵa aŵele jwakulijiganya jwangu.
28 Mwachisyasyo, ana ŵani mwa jemanja pakusaka kutaŵa sanja nganaŵa atemi kaje pasi ni kuŵalanjila chenene, kuti alole naga akwete yakwanila kujimalichisya?
29 Naga ngakutenda yeleyi, mpaka agambe kutaŵa fendeshoni* nambo ni kulepela kujimalisya sanjajo, soni wosope ŵakuyiwona yeleyi mpaka atande kumseka,
30 ni kuŵechetaga kuti, ‘Mundu aju ŵatandite kutaŵa nambo alepele kumalisya.’
31 Kapena ana mwenye jwapi jwele pakwawula kukumenyana ni mwenye mjakwe nganaŵa atemi kaje pasi ni kukambilana ni ŵane kuti alole naga asilikali ŵakwe 10,000 mpaka akombole kulimbana ni asilikali 20,000 ŵa mwenye mjakwejo?
32 Nambo naga akuyiwona kuti nganaŵa akombwele, mpaka ŵatumisye ŵandu ŵakumjimila kukuŵenda yamtendele kwa mwenye jwinejo mkanaŵe kwika.
33 Mwakulandana ni yeleyi, jemanjasoni mmanyilile kuti naga jumo mwa jemanja ngakuleka yindu yakwe yosope nganaŵa aŵele jwakulijiganya jwangu.
34 “Kusala yisyene, njete jili jambone. Nambo naga njete jikumala machili, ana machili gakwego mpaka gawujilesoni chamtuli?
35 Mpaka jiŵe jangaŵajilwa kujiwanganya ni litaka kapena m’manyowa. Ŵandu akusagamba kujijasa. Jwalijose jwakwete mawiwi apikane.”
Maloŵe Gamwiŵanda
^ Kapena kuti, “kumlamisya.”
^ Alole Kugopolela kwa Maloŵe Gane.
^ Ŵane akusati “yilimbilimbi.”
