Jwakulalichila 9:1-18
9 Myoyo une nayiganichisye yeleyi mumtima mwangu mwamti nayiweni kuti ŵakulungama soni ŵalunda pampepe ni masengo gawo, yosopeyi yili mmyala mwa Mlungu jusyesyene. Ŵandu ngakumanyilila ya chinonyelo soni uŵengani yayatendekwe jemanjajo mkanaŵe kupagwa.
2 Wosopeŵa akwete mbesi jakulandana, chinga ŵakulungama kapena ŵakusakala, chinga ŵambone, chinga ŵaswela kapena ŵangaswejela, chinga ŵakusapeleka mbopesi kapena ŵangapeleka mbopesi. Mundu jwambone ali jwakulandana ni mundu jwakulemwa. Soni mundu jwakusalumbila ali jwakulandana ni mundu jwakusaganichisya kaje mkanalumbile.
3 Chindu chakulagasya nganisyo chachikusatendekwa pachilambo chapasi pano* ni achi: Ligongo lyakuti wosope mbesi jawo jili jakulandana, mitima ja ŵandu jili jegumbale ni yindu yakusakala soni m’mitima jawo mukusaŵa mwana masoka masiku gosope ga umi wawo, mwamti kaneko akusawa.
4 Ŵandu ŵali chijumi akusakola chembecheyo, ligongo mbwa jaumi jili chenene kulekangana ni lisimba lyewe.
5 Pakuŵa ŵandu ŵali umi akusamanyilila kuti chachiwa, nambo ŵawe ŵangamanyilila chilichose soni jemanjaji nganaŵa apochelesoni mtuka* uliwose. Pakuŵa yindu yosope yele ŵandu akakumbuchile nayo yikusaŵa yiliŵalichiche.
6 Nambosoni chinonyelo chawo, uŵengani wawo, soni atamose jelasi jawo yikusaŵa yili yimasile. Mwamti jemanjaji ŵangatenda nawo chilichose chachikutendekwa pachilambo chapasi pano.*
7 Mjawule mkalye yakulya yenu mwakusangalala, soni mkamwe finyo jwenu ni mtima wakusangalala, pakuŵa Mlungu jusyesyene asangalele kala ni masengo genu.
8 Yakuwala yenu yiŵeje yetakate ndaŵi syosope, soni mkalepelaga kupakala mawuta mumtwe mwenu.
9 Msangalale ni umi pampepe ni ŵakongwe ŵamkusimwanonyela kwa masiku gosope ga umi wenu wangali matewo, wele Mlungu ampele pachilambo chapasi pano.* Msangalale kwa masiku gosope ga umi wenu wangali matewo, pakuŵa jelejo ni mboto jamkusosekwa kupochela pa umi wenu soni pamasengo genu gakusawusya gamkamwile mwakulimbichila pachilambo chapasi pano.*
10 Chilichose chele mkono wenu upatile kuti utende, mchitendeje ni machili genu gosope. Pakuŵa ku Malembe* kwamkwawulako kwangali kukamula masengo, kuganisya yakutenda, kumanyilila yindu soni kwangali lunda.
11 Pachilambo chapasi pano nachiwenisoni chindu chine chakuti, ŵandu ŵakuwutuka mnope ngaŵa kuti akusapunda pampikisano ndaŵi syosope. Atamose ŵandu ŵamachili ngaŵa kuti akusapunda pangondo ndaŵi syosope, soni atamose ŵandu ŵakalamuka ngaŵa kuti akusapata yakulya ndaŵi syosope. Nambosoni ŵandu ŵalunda ngaŵa kuti ndaŵi syosope akusapata chipanje. Atamose ŵandu ŵakumanyilila yindu ngaŵa kuti ndaŵi syosope yindu yikusiyajendela chenene. Ligongo yindu yangayijembecheya yikusiyagwila wosopewo pandaŵi jele nganajembecheyaga.
12 Pakuŵa mundu ngakusamanyilila ndaŵi jachiyimtendechele yindu yangayijembecheya. Mpela mwayikusaŵela ni somba syasikusatanjila mulwawu lwakuwulaga soni yijuni yayikusakamulwa pa chitega, nombenawo ŵanache ŵa ŵandu akusatanjila pandaŵi ja yakusawusya, pandaŵi jele yakusawusyayo yikusiyagwila mwakusisimuchisya.
13 Nayiwenisoni yindu yine pachilambo chapasi pano* yakwamba lunda yele yasimonjesye mnope:
14 Papali msinda wine wamwana mwele mwapali achalume ŵamnono. Kaneko ŵayiche mwenye jwine jwamachili kukuwujimuchila msindawo. Mwenyewo ŵawusyungulile msindawo soni ŵataŵile malo gakulimba gakuti aputilepo ngondo.
15 Mumsindamo mwaliji mwana mundu jwine jwakulaga nambo jwalunda, mwamti jwalakwe jwawukulupwisye msindawo ligongo lya lunda lwakwe. Nambo pangali mundu jwalijose juŵamkumbuchile mundu jwakulagajo.
16 Myoyo une naŵechete mumtima mwangu kuti, ‘Lunda luli lwambone mnope kupunda machili. Nambo ŵandu akusalunyosya lunda lwa mundu jwakulaga soni maloŵe gakwe ŵangagapikanila.’
17 Kuli chenene kupikanila maloŵe gakuŵechetedwa mwakuwusimana mtima ga mundu jwalunda kulekangana ni kupikanila maloŵe gaukali ga mundu jwakuyilamulila yisilu.
18 Lunda luli lwambone kupunda yida yangondo. Nambo mundu jumpepe jwakulemwa mpaka ajonanje yindu yambone yejinji.
Maloŵe Gamwiŵanda
^ Kapena kuti “pasi pa lyuŵa.”
^ Kapena kuti “malipilo.”
^ Kapena kuti “pasi pa lyuŵa.”
^ Kapena kuti “pasi pa lyuŵa.”
^ Kapena kuti “pasi pa lyuŵa.”
^ Alole Kugopolela kwa Maloŵe Gane.
^ Kapena kuti “pasi pa lyuŵa.”
