Jwakulalichila 7:1-29
7 Lina lyambone* likusapunda mawuta gamtengo wapenani, soni lisiku lyakuwa likusapunda lisiku lyakupagwa.
2 Kuli chenene kwawula ku nyumba jamalilo kulekangana ni kwawula ku nyumba japwando, ligongo jeleji jili mbesi ja mundu jwalijose. Mwamti mundu jwalijose jwali umi akusosekwa kumanyilila yeleyi mumtima mwakwe.
3 Bola kuŵa ŵachanasa kulekangana ni kuseka, ligongo ngope jachanasa jikusawutendekasya mtima kupikana chenene.
4 Mtima wa mundu jwalunda ukusaŵa ku nyumba jamalilo, nambo mtima wa chisilu ukusaŵa ku nyumba jachisangalalo.
5 Kuli chenene kupikanila kwamuka kwa mundu jwalunda kulekangana ni kupikanila nyimbo sya ŵandu ŵakuloŵela.
6 Pakuŵa kuseka kwa mundu jwakuloŵela kuli mpela miŵa jajikutatasika pajikukolela pasi pa mpika. Yeleyisoni yili yangali mate.
7 Nambo kulagasidwa mpaka kumtendekasye mundu jwalunda kutenda yindu mpela jwamasoka, soni kuwonga kukusasokonasya mtima wa mundu.
8 Mbesi ja chindu jikusaŵa jambone kulekangana ni ndanda jakwe. Kuli chenene kuŵa ŵakuwusimana mtima kulekangana ni kuŵa ŵakulikwesya.
9 Mkajanguyaga kutumbila, pakuŵa kutumbila kukusaŵaga mumtima mwa ŵandu ŵakuloŵela.*
10 Mkawusyaga kuti, “Ligongo chichi masiku gakala yindu yaliji chenene kulekangana ni masiku agano?” ligongo nganiluŵa lunda kuwusya chiwusyo mpela chelechi.
11 Yikusaŵa chenene mundu papochele chipanje kutyochela kwa achinangolo. Lundalo lukusaŵa lwakamuchisya kwa ŵandu ŵali chiŵela umi.*
12 Pakuŵa lunda lukusachenjela mpela mwasikusatendela mbiya pakumchenjela mundu. Nambo umbone wa kumanyilila yindu uli wakuti: Lunda lukusasunga umi wa mundu jwakwete lundalo.
13 Aganichisye ya masengo ga Mlungu jusyesyene, pakuŵa ana ŵani ŵampaka achijongole chindu chele jwalakwejo achipindile?
14 Palisiku lyambone, mtendejesoni yindu yambone. Nambo palisiku lyayakusawusya, mkumbuchileje kuti Mlungu ni juŵapanganyisye masiku gaŵili gosopega, mwamti ŵandu nganaŵa amanyilile yayichatendechela kusogolo.
15 Paumi wangu wangali matewu nayiweni yindu yosope. Nam’weni mundu jwakulungama ali mkuwa ligongo lyakutenda yindu yachilungamo. Soni nam’weni mundu jwakusakala ali mkutama umi welewu atamose kuti akutenda yindu yakusakala.
16 Mkaŵaga jwakulungama mwakupundanganya malile, soni mkalilosyaga kuti mli ŵalunda mnope. Ligongo chichi mkusaka kulijonanga mwasyene?
17 Mkaŵaga ŵakusakala mwakupundanganya soni mkaŵa jwakuloŵela. Ligongo chichi mkusaka kuwa ndaŵi jenu mkanijikwane?
18 Kuli chenene kupikanila maloŵe gakalamusya gosopega, mkaleka ata gamo. Pakuŵa mundu jwakusamjogopa Mlungu chachipikanila maloŵe gakalamusya gosopega.
19 Lunda lukusamtendekasya mundu kuŵa jwamachili mnope kwapunda ŵakulamulila 10 ŵali mumsinda.
20 Pakuŵa pangali mundu jwakulungama pachilambo chapasipa jwakusagamba kutenda yambone ndaŵi syosope ni ngalemwa.
21 Nambosoni mkaganichisyaga mnope maloŵe galigose gakuŵecheta ŵandu, kupali kumpikana jwamasengo jwenu ali mkuŵecheta yakusakala yakwamba mmwejo.
22 Pakuŵa mmwejo mkumanyilila chenene mumtima mwenumo kuti ndaŵi syejinji pakwete pamŵechete yindu yakusakala yakwamba ŵandu ŵane.
23 Nakamulichisye masengo lunda lwangu pakuyiwungunya yindu yosopeyi, mwamti naŵechete kuti: “Unetu chinjiŵa jwalunda.” Nambo yaliji yakusawusya kwa une kuti nalupate lundalo.
24 Yindu yayatendekwe kala nganituŵa tuyipikanichisye soni yili yakusokoka mnope. Ana ŵani ŵampaka ayipikanichisye?
25 Nawulongolele mtima wangu kuti umanyilile, upikanichisye soni kuti uwungunye lunda, nambosoni kuti umanyilile mwayikusatendechela yindu. Nawulongolelesoni mtima wangu kuti upikanichisye kusakala kwa uchisilu soni kuloŵela kwa kutenda yindu yamasoka.
26 Kaneko nayikopochela ayi: Chindu chakupweteka mnope kupunda chiwa chili jwamkongwe jwali mpela lwawu lwa mundu jwakusakula yinyama, jwelesoni mtima wakwe uli mpela likoka, soni jwele magasa gakwe gali mpela unyolo wakundende. Mundu jwakusamsangalasya Mlungu jusyesyene chachimtila jwamkongwejo. Nambo mundu jwakulemwa akusakamulwa ni jwamkongwejo.
27 Jwakulalichilajo akuŵecheta kuti, “Alole, ayi ni yanayipatile. Nawungunyisye chindu chimo ni chimo kuti nayimanyilile chenene yindu yeleyi.
28 Nambo chindu chimo chanachisachililaga kuchimanyilila, nganinachipata. Pa ŵandu 1000 mbatilepo jwamlume jumo jwali jwakulungama, nambo nganinampata jwamkongwe atamose jumo jwali jwakulungama pasikati pa ŵandu wosopeŵa.
29 Chindu chimpepe chambatile chili achi: Mlungu jusyesyene ŵapanganyisye ŵandu ŵambonembonepe, nambo ŵanduwo asagwile kutenda yindu m’matala gawo.”
Maloŵe Gamwiŵanda
^ Kapena kuti “mbili jambone.”
^ Kagopolele kanesoni, “kutumbila kuli chimanyisyo cha yisilu.”
^ Mu Chihebeli ŵatiga, “ŵandu ŵakuliwona lyuŵa.”
