Jwakulalichila 6:1-12
6 Pana chindu chine chakutesya chanasa chanachiweni pachilambo chapasi pano,* soni chikusatendekwatendekwa kwa ŵandu.
2 Mlungu jusyesyene akusampa mundu chipanje, yindu yejinji soni uchimbichimbi, ni chakulinga chakuti akasoŵaga yindu yakusaka.* Nambo Mlungu jusyesyenejo jwangamkundaga mundujo kuti asangalale ni yinduyo, atamose kuti mundu jwine mpaka asangalale ni yinduyo. Yeleyisoni yili yangali mate soni kugambile kuŵa kulilagasya basi.
3 Naga jwamlume akuŵeleka ŵanache ŵakwana 100 ni kutama ni umi kwa yaka yejinji mpaka kukalambala, nambo ngasangalala ni yindu yakwe yambone mkanajawule kumalembe, nditu nikuti mwanache jujwapagwile jwam’we ali pambone kumpunda jwalakwejo.
4 Pakuŵa kupagwa kwa mwanacheju kwaliji kwangali masengo, jwawilile m’chipi soni lina lyakwe nganiliwoneka.
5 Atamose kuti mwanacheju nganaliwona lyuŵa kapena nganamanyilila chilichose, nambope ali pambone kulekangana ni mundu jwine jula.
6 Ana yikwete masengochi kutama yaka 2,000 nambo ni ngatama umi wakusangalala? Ana ngati ŵandu wosope akusajawula kumalo gamo?
7 Masengo gosope gakusakamula mundu akusagakamula pakusaka kulisya pakamwa pakwe. Nambope akusagambaga kusakape kulya.*
8 Ana mundu jwalunda ali jwambone kuchipunda chisilu, kapena ana yikwete masengochi naga mundu jwakulaga akumanyilila yampaka atende kuti aŵe ni umi?
9 Kuli chenene kusangalala ni yindu yagakulola meso kulekangana ni kukumbilaga yindu yanganiŵa myipatile. Yeleyisoni yili yangali mate, kugambile kuŵa kuwutusya mbungo basi.
10 Chindu chilichose chachipali ŵachipele kala lina soni mundu akusamanyika kuti ali ŵani. Soni nganaŵa akombwele kulimbana* ni jwali jwamachili mnope kumpunda jwalakwejo.
11 Payitupile yakuŵecheta,* yangali matesoni yikusatupa. Soni ana yeleyi yili yamasengochi kwa mundu?
12 Ana ŵani ŵakumanyilila yakusosekwa kutendaga mundu pamasiku gakwe gamnono gakusatama ni umi wangali mate wawuli mpela m’bulili? Ana ŵani ŵampaka amsalile mundu yayichitendekwa pachilambo chapasi pano* panyuma pakuti jwalakwejo awile?
Maloŵe Gamwiŵanda
^ Kapena kuti “pasi pa lyuŵa.”
^ Kapena kuti “kuti umi wakwe ukasoŵaga kalikose.”
^ Kapena kuti “nambope umi wakwe wangajikutila.”
^ Kapena kuti “kwimbana magambo.”
^ Kagopolele kanesoni, “yindu payitupile.”
^ Kapena kuti “pasi pa lyuŵa.”
