Jwakulalichila 5:1-20
5 Msamaleje ni yamkutenda pamli ku nyumba ja Mlungu jusyesyene. Kuli chenene kuŵandichila kuti mpikanileje kulekangana ni kupeleka mbopesi mpela mwakusatendela ŵandu ŵakuloŵela. Pakuŵa jemanjaji ŵangamanyilila kuti yakutenda yili yakusakala.
2 Pakamwa penu pakapupulumaga, soni mkakunda kuti mtima wenu upupulumeje kuŵecheta pameso pa Mlungu jusyesyene, pakuŵa Mlungu jusyesyene ali kwinani nambo mmwejo mli pachilambo chapasi. Paligongo lyeleli yakuŵecheta yenu yiŵeje yamnono.
3 Yakusagamila yikusayika ligongo lya kutupa yakutenda,* soni mundu jwakuloŵela pakutupiya yakuŵecheta akusaŵecheta yangasosekwa.
4 Pamtesile chilanga kwa Mlungu, mkachelewaga kukwanilisya chilanga chenu, pakuŵa jwalakwe jwangasangalala ni ŵandu ŵakuloŵela. Mkwanilisyeje chilanga chenu.
5 Kuli chenene ngatenda chilanga, kulekangana ni kutenda chilanga nambo ngakwanilisya.
6 Mkakunda kuti pakamwa penu pamtendekasye kulemwa, soni mkalinga kuŵecheta pameso pa lilayika* kuti, “Natesile yeyila mwangosi.” Ligongo chichi mkutendekasya Mlungu jusyesyene kutumbila ni yindu yamwaŵechete, mpaka jwalakwe kwikana pakonanga masengo ga makono genu?
7 Mpela mwayikusaŵela kuti yakutenda yejinji yikusamtendekasya mundu kusagamila, myoyosoni yakuŵecheta yejinji yikusamlongolela mundu ku yindu yangali mate. Nambo mumjogopeje Mlungu jusyesyene.
8 Pamum’weni mundu jwakulaga ali mkulagasidwa soni pamyiweni yindu yangali chilungamo yili mkutendekwa mudela jenu mkasimongaga, pakuŵa mundu jwali paudindojo pana jwamkulungwa jwakupunda jwalakwejo jwakulola yakutendayo. Nambosoni pana ŵane ŵakwete udindo wapenani mnope kwapunda jemanjaji.
9 Sonitu wosopeŵa akusapindula ni yindu yele litaka likusakoposya. Atamose mwenye akusapochela yindu yele litaka likopwesye.
10 Mundu jwakunonyela silifa ngakusajikutila ni silifa, soni mundu jwakunonyela chipanje ngakusajikutila ni mbiya. Yeleyisoni yili yangali mate.
11 Yindu yambone payitupile, ŵakulyasoni yinduyo akusatupa. Ana msyene yinduyo akusapata chichi, kulekapo gambaga kuchilola chipanjecho ni meso gakwe?
12 Jwakutumichila akusagona lugono lwambone, chinga chalye yejinji kapena yamnono. Nambo yejinji yakusakola mundu jwakusichila yikusamlepelekasya kugona.
13 Pana chindu chakutesya chanasa mnope chanachiweni pachilambo chapasi pano.* Chipanje chaŵasongangenye mundu champweteche msyenejo.
14 Chipanjecho chajasiche ligongo lya yindu yakogoya yayatendekwe, mwamti jwalakwe paŵakwete mwanache jwamlume nganakola chilichose chakuti amlechele.
15 Mpela mwayikusaŵela mundu pakupagwa kutyochela m’chitumbo cha mamagwe, ni mwayichiŵelasoni kuti chachijawula ŵamakonope mpela muŵaŵelele pakupagwa. Mwamti ngasajigala kandu pa masengo gosope gaŵakamwile mwakulimbichila.
16 Panasoni chindu chine chakutesya chanasa mnope: Yaŵatite mundu pakwika, chachijawulasoni myoyo. Ana mundu jwakusakamula masengo mwakulimbichila mpela kuti akutoposya mbungo akusapindula chichi?
17 Nambosoni lisiku lililyose akusalya ali m’chipi. Akusaŵa jwakudandawula mnope, jwakulwala soni jwamtumbile.
18 Chindu chanachiweni kuti chambone soni chakuŵajilwa chili chakuti: Mundu akusosekwa kulya, kumwa soni kusangalala ni masengo gakwe gosope gakamwile mwakulimbichila ali mkulimbana nago pachilambo chapasi pano.* Masengo gele jwalakwe ŵagakamwile m’masiku gamnono ga umi wakwe gele Mlungu jusyesyene ŵampele, pakuŵa gelego gali malipilo gakwe.
19 Nambosoni Mlungu jusyesyene pampele mundu chipanje soni yindu yejinji yakuti asangalaleje nayo, apocheleje malipilo gakwego ni kusangalala ni masengo gakamwile mwakulimbichila. Welewo uli mtuka wakutyochela kwa Mlungu.
20 Pakuŵa jwalakwe ngasamanyilila mwagakwawulila masiku ga umi wakwe, ligongo Mlungu jusyesyene chachiŵa kuti ampele jwalakwejo yakutenda yejinji, yimpepe ni yindu yakuti yisangalasyeje mtima wakwe.
Maloŵe Gamwiŵanda
^ Kapena kuti “kutupa kwa yindu yakusosekwa kuyisamalila.”
^ Kapena kuti “jwamtenga.”
^ Kapena kuti “pasi pa lyuŵa.”
^ Kapena kuti “pasi pa lyuŵa.”
