Jwakulalichila 4:1-16
4 Nayiwenisoni yakutendekwa yosope yakwalagasya ŵane yayikusatendekwa pachilambo chapasi pano.* Najiweni misosi ja ŵandu ŵakulagasidwa, soni paliji pali pangali jwalijose jwakwamyalasya jemanjaji. Ŵandu ŵaŵalagasyaga jemanjaji ŵakwete machili mwamti paliji pali pangali jwalijose jwakwakamuchisya jemanjaji.
2 Soni une nayiweni kuti ŵali pambone ali ŵandu ŵaŵawile kulekangana ni ŵandu ŵaŵaliji chiŵela umi.
3 Nambo ŵali pambone mnope kupunda wosopeŵa ali ŵele nganaŵe kupagwa, pakuŵa jemanjaji nganayiwona yakupweteka yayikutendekwa pachilambo chapasi pano.*
4 Soni une nayiweni kuti ŵandu pakulimbana akusakamula masengo mwakulimbichila soni mwakulosya kuti akugamanyilila chenene. Yeleyisoni yili yangali mate, kugambile kuŵa kuwutusya mbungo basi.
5 Chisilu chikusagamba kupinda makono gakwe, mwamti chilu chakwe chikusagamba konasika.
6 Kuli chenene kupumula panandi kulekangana ni kukamula masengo mwakulimbichila ni gambaga kuwutusya mbungo.
7 Kaneko naganichisyesoni ya chisyasyo chine cha yindu yangali mate yayikutendekwa pachilambo chapasi pano.*
8 Pana mundu jwine jwali jikajikape soni nganakola mjakwe, jwalakwe nganakola mwanache kapena jwachibale. Nambo jwalakwe jwangaleka kukamula masengo gakwe gosope mwakulimbichila. Meso gakwe gangajikutila ni chipanje. Nambo ana jwalakwejo akusaliwusyaga kuti, ‘Ana masengo gangukamula mwakulimbichilaga ni kulijimaga nago yindu yambone, ngugakamula kuti yindu yakwe chalye ŵani’? Yeleyisoni yili yangali mate soni kugambile kuŵa kulilagasya basi.
9 Ŵandu ŵaŵili ali chenene kulekangana ni mundu jumo. Ligongo jemanjaji akusapata yindu yambone pamasengo gawo gakusagakamula mwakulimbichila.
10 Pakuŵa naga jumo mwa jemanjaji agwile, mjakwejo akusamkamuchisya kwimuka. Nambo ana mpaka chitendekwe chichi naga mundu agwile ali nganakola mjakwe jwakumkamuchisya kwimuka?
11 Nambosoni ŵandu ŵaŵili pagonile pampepe akusapikana kutukutila. Nambo ana mundu jumo mpaka apikane uli kutukutila?
12 Sonitu mundu mpaka akombole kumgomeka mundu jwali jika, nambo ŵandu ŵali ŵaŵili mpaka akombole kulimbana ni jwele mundujo. Soni lukonji lwepote ni ngonji sitatu lwangakutuka chitema.
13 Mwanache jwakulaga nambo jwalunda ali chenene kulekangana ni mwenye jwamchekulupe nambo jwakuloŵela, jwele jwangasakasoni kupikanila maloŵe gakumkalamusya.
14 Pakuŵa jwalakwe* jwakopweche kundende kuti aŵe mwenye, atamose kuti jwalakwejo ŵapagwile ali jwakulaga mu umwenye welewo.
15 Une naganichisye ya ŵandu wosope ŵali umi ŵakusajendaga pachilambo chapasi pano.* Naganichisyesoni mwayikusaŵela ni jwachinyamata jwajinjile mmalo mwa mwenye.
16 Atamose kuti pakusaŵa ŵandu ŵajinji ŵali kumbali jakwe, nambo ŵandu ŵachachiyika panyuma pakwe ngasasangalala najo. Yeleyisoni yili yangali mate, kugambile kuŵa kuwutusya mbungo basi.
Maloŵe Gamwiŵanda
^ Kapena kuti “pasi pa lyuŵa.”
^ Kapena kuti “pasi pa lyuŵa.”
^ Kapena kuti “pasi pa lyuŵa.”
^ Komboleka kuti pelepa akwamba mwanache jwalunda jula.
^ Kapena kuti “pasi pa lyuŵa.”
