Jwakulalichila 3:1-22
3 Chilichose chikwete ndaŵi jakwe,Chakutendekwa chilichose pachilambo chapasi chikwete ndaŵi jakwe:
2 Pana ndaŵi jakupagwa soni ndaŵi jakuwa.Ndaŵi jakupanda soni ndaŵi jakuchuŵa yampandile.
3 Pana ndaŵi jakuwulaga soni ndaŵi jakuposya.Ndaŵi jakugwisya soni ndaŵi jakutaŵa.
4 Pana ndaŵi jakulila soni ndaŵi jakuseka.Ndaŵi jakulila mnope soni ndaŵi jakuŵina.
5 Pana ndaŵi jakwasa maganga soni ndaŵi jakuwunjika maganga pampepe.Ndaŵi jakukumbatilana soni ndaŵi jakuŵambala kukumbatilana.
6 Pana ndaŵi jakusosasosa chindu soni ndaŵi jakwitichisya kuti chindu chijasiche.Ndaŵi jakusunga soni ndaŵi jakwasa.
7 Pana ndaŵi jakupapula soni ndaŵi jakutota.Ndaŵi jakutama jii soni ndaŵi jakuŵecheta.
8 Pana ndaŵi jakunonyela soni ndaŵi jakuŵenga.Ndaŵi jangondo soni ndaŵi jamtendele.
9 Ana mundu jwakusakamula masengo akusapata chichi ligongo lya kulimbichila kwakwe?
10 Nagaweni masengo gele Mlungu ŵapele ŵanache ŵa ŵandu ni chakulinga chakuti akole yakutenda.
11 Jwalakwe apanganyisye chilichose kuti chiŵe chakusalala pandaŵi jakwe jakuŵajilwa. Nambosoni jwalakwe ŵapele ŵandu mtima wakusaka kutama ni umi mpaka kalakala. Nambope ŵandu ngasamanyilila masengo gele Mlungu jusyesyene agapanganyisye kutandila pandanda mpaka pambesi.
12 Une mbatile kuti pangalisoni chine chambone kwa jemanjaji kupundana ni kuti jemanjaji asangalale soni kuti atendeje yindu yambone pandaŵi jali ni umi.
13 Nambosoni kuti jwalijose alyeje ni kumwa soni kuti asangalaleje ni masengo gakwe gosope gakamwile mwakulimbichila. Yeleyi yili mtuka wakutyochela kwa Mlungu.
14 Une manyilile kuti yindu yosope yele Mlungu jusyesyene akusayipanganya yichitama mpaka kalakala. Pangalisoni chine champaka chisosekwe konjechesya kapena kutyochesyapo pa yindu yapanganyisye Mlungu. Mlungu jusyesyene ŵayipanganyisye m’litala lyeleli ni chakulinga chakuti ŵandu amjogopeje jwalakwe.
15 Chilichose chachikusatendekwa chikusaŵa kuti chatendekwe kala, soni chilichose chachikwika msogolo chikusaŵa kuti chapali kala. Nambo Mlungu jusyesyene akusawungunya yindu yele ŵandu akusayisosasosa.*
16 Une nayiwenisoni ayi pachilambo chapasi pano:* Pamalo papasosekweje kuŵa yachilungamo pakusaŵa yakusakala. Soni pamalo papasosekwaga kutendekwa yindu yambone pakutendekwa yindu yakusakala.
17 Myoyo naliŵechetele jika mumtima mwangu kuti, “Mlungu jusyesyene chachalamula ŵakulungama ni ŵakusakala ŵakwe, pakuŵa chakutendekwa chilichose chikwete ndaŵi jakwe.”
18 Une naliŵechetelesoni mumtima mwangu pakwamba ya ŵanache ŵa ŵandu kuti Mlungu jusyesyene chachalinga jemanjaji soni chachalosya kuti ali mpela yinyama.
19 Pakuŵa ŵandu soni yinyama ali ŵakulandana pa chindu achi: Yinyama soni ŵandu akwete mbesi jakulandana, yinyama yikusawa soni ŵandu akusawa. Mlungu ŵapele ŵandu soni yinyama machili ga umi gakulandana.* Myoyo ŵandu ŵangayipunda yinyama, pakuŵa yosope yili yangali mate.
20 Yosope yikusajawula kumalo gamo. Yosope yatyochele kuluwundu soni yosopeyo yikusawujila kuluwundu.
21 Ana ŵani ŵakumanyilila naga msimu wa ŵandu ukusajawula kwinani, soni naga msimu wa yinyama ukusajawula pasi?
22 Nayiweni kuti pangalisoni chambone chakupunda kuti mundu asangalale ni masengo gakwe ligongo gelego ni gagali malipilo gakwe. Nambi ŵani ŵampaka amtendekasye jwalakwejo kulola yayichitendekwa panyuma pakuti jwalakwejo awile?
Maloŵe Gamwiŵanda
^ Kagopolele kanesoni, “yindu yele yayipite kala.”
^ Kapena kuti “pasi pa lyuŵa.”
^ Kapena kuti “msimu wakulandana.”
