Jwakulalichila 2:1-26
2 Kaneko naŵechete mumtima mwangu kuti, “Odi linje kutenda yakusangalasya kuti ndole yambone yachimbate.” Nambo yeleyisoni nayiweni kuti yili yangali mate.
2 Pakwamba ya kuseka, natite, “Kuseka kugambile kuŵa masoka basi.”
Soni pakwamba ya kusangalala, natite, “Ana kusangalala kwana masengochi?”
3 Nawungunyisye kuti manyilile yampaka yitendekwe naga ngumwa mnope finyo. Natendaga yeleyi kwineku ndili mkutendape yindu mwalunda. Nayikenesoni pakutenda yindu mwakuloŵela kuti manyilile yindu yayili yambone mnope yampaka ŵandu ayitendeje pamasiku gawo gamnono gakusatama pachilambo chapasi.
4 Nakamwile masengo gekulungwa. Nataŵile nyumba syangu, soni nalimile migunda jangu ja mipeleya.*
5 Nalipanganyichisye migunda ja maluŵa jamwana soni jekulungwakulungwa. Soni napandile mwelemo yitela yakulekanganalekangana ya yisogosi.
6 Nalipanganyichisye matanda ga mesi kuti njitilileje migunda jangu ja yitela.*
7 Nakwete ŵamasengo ŵachalume ni ŵachakongwe, mwamti nakwetesoni ŵamasengo ŵane ŵaŵapagwile m’nyumba jangu. Nakwetesoni yilango yejinji mpela ng’ombe soni ngondolo. Yaliji yejinji kwapunda wosope ŵaŵatemi ku Yelusalemu une mkanimbagwe.
8 Naliwunjichile silifa ni golide jwamjinji kutyochela kwa mamwenye soni ku yigawo* yakulekanganalekangana. Nakwetesoni ŵakwimba ŵachalume nambosoni ŵachakongwe. Kupwatika pelepa, nakwetesoni chachikusasangalasya ŵanache ŵa ŵandu, chachili jwamkongwe. Elo, nakwete achakongwe ŵajinji.
9 Myoyo une nakwete yindu yejinji mnope kumpunda jwalijose juŵapali mu Yelusalemu une mkanimbagwe. Nambosoni napitilisye kutenda yindu mwalunda.
10 Nganinalijima chilichose chele mtima wangu wachikumbilaga.* Nganinawukanya mtima wangu chindu chilichose chakusangalasya, pakuŵa mtima wangu waŵele wakusangalala mnope ligongo lya masengo gosope ganakamwile mwakulimbichila. Yeleyi ni yayaliji malipilo ga masengo gosope ganakamwile mwakulimbichila.
11 Nambo panaganisisye ya masengo gosope ganakamwile ni makono gangu, soni panaganisisye ya masengo gosope gakusawusya ganakamwile mwakulimbichila kuti nagakombole, nayiweni kuti yosopeyi yili yangali mate, kugambile kuŵa kuwutusya mbungo basi. Pachilambo chapasipa paliji pali pangali chindu chilichose chakupindulisya.
12 Kaneko nasachile kumanyilila yakwamba lunda, masoka soni uchisilu. (Nambi mundu jwayiche panyuma pa mwenye mpaka atendesoni chichi? Yampaka atende yili yindu yakuti jwine jwatesile kala.)
13 Nayiweni kuti kukola lunda kuli kwakamuchisya kulekangana ni uchisilu. Mpela mwayiŵelelesoni kuti lilanguka lili lyakamuchisya kulekangana ni chipi.
14 Mundu jwalunda, meso gakwe gakusalola chenene mnope. Nambo chisilu chikusajenda m’chipi. Nayikopochelesoni kuti pana chindu chimo chakulandana chachikusagwila wosopeŵa.
15 Kaneko naŵechete mumtima mwangu kuti, “Yachikusachitendechela chisilu yichindendechelasoni une.” Sano une mbatile chichi ligongo lyakuŵa jwalunda mnope? Myoyo naliŵechetele mumtima mwangu kuti, “Yeleyisoni yili yangali mate.”
16 Pakuŵa pangali ŵachachimkumbuchila mpaka kalakala mundu jwalunda kapena jwakuloŵela. Mkupita kwa masiku, wosopeŵa chachiliŵalichika. Soni ana mundu jwalunda chachiwa chamtuli? Jwalakwe chachiwa mpela mwakusawila mundu jwakuloŵela.
17 Myoyo natandite kuwuŵenga umi, ligongo chilichose chachatendekwaga pachilambo chapasi chagambile kuŵa chakundagasya nganisyo, pakuŵa yosopeyi yaliji yangali mate, kwagambile kuŵa kuwutusya mbungo basi.
18 Natandite kugaŵenga masengo gosope ganakamwile mwakulimbichila mnope pachilambo chapasi, ligongo chinjisosekwa kuyileka kuti yiŵe ya mundu jwine jwakwika panyuma pangu.
19 Soni ŵani ŵakumanyilila naga jwalakwejo chachiŵa jwalunda kapena chisilu? Nambope jwalakwe chachijigala yindu yosope yanamalilepo machili soni lunda kuti nayipate pachilambo chapasi pano.* Yeleyisoni yili yangali mate.
20 Myoyo une natandite kwasa mtima panaganisisye ya masengo gosope gakusawusya ganakamwile mwakulimbichila pachilambo chapasi pano.*
21 Pakuŵa mundu mpaka akamule masengo mwakulimbichila soni mpaka atende yeleyi mwakulongoleledwa ni lunda lwakwe, kumanyilila yindu soni mwakugakolosya chenene masengogo. Nambo akusasosekwa kumlechela mundu jwine yindu yakwe yosopeyo jwele nganayikamulila masengo ata panandi.
22 Ana mundu akusapata chichi kutyochela pamasengo gosope gakamwile mwakulimbichila, soni ligongo lya yakumbila yakwe yayikusamtendekasya kukamula masengo mwakulimbichila pachilambo chapasipa?
23 Pakuŵa masiku gosope ga umi wakwe, masengo gakwego gakusamyikachisya yakupweteka soni yakulagasya nganisyo. Soni atamose chilo, mtima wakwe wangapumulaga. Yeleyisoni yili yangali mate.
24 Pangalisoni chindu chine chambone kwa mundu chakupunda kulya, kumwa ni kusangalalaga ni masengo gakwe gakamwile mwakulimbichila. Yeleyisoni nayikopochele kuti yili yakutyochela mmyala mwa Mlungu jusyesyene,
25 pakuŵa ŵani ŵakusamwa soni kulya chenene kumbunda une?
26 Mundu jwele akusamsangalasya Mlungu, Mlungujo akusampa jwalakwejo lunda, kumanyilila yindu, soni akusamtendekasya kuŵa jwakusangalala. Nambo mundu jwakulemwa, Mlungu akusampaga jwalakwejo masengo gakwamba kusonganganya yindu kuti ampe mundu jwakusamsangalasya Mlungu jusyesyene. Yeleyisoni yili yangali mate. Kugambile kuŵa kuwutusya mbungo basi.
Maloŵe Gamwiŵanda
^ Mipeleya jili mtundu winewakwe wa yisogosi yakusayikamulichisya masengo pakupanganya finyo.
^ Kapena kuti “ngalango jangu.”
^ Ku Mozambique akusati “província.”
^ Mu Chihebeli ŵatiga, “chele meso gangu gaŵendile.”
^ Kapena kuti “pasi pa lyuŵa.”
^ Kapena kuti “pasi pa lyuŵa.”
