Jwakulalichila 11:1-10
11 Mponye* mkate* wenu pa mesi, pakuŵa panyuma pa masiku gejinji chimchiwupatasoni.
2 Mgaŵeje yindu yimkwete kwa ŵandu 7 kapena 8, ligongo ngamkumanyilila yindu yakogoya yayichitendekwa pachilambo chapasi.
3 Naga mawunde gagumbele mesi gakusagwisya wula pachilambo chapasi. Soni naga chitela chigwilile kummwela kapena kumpoto, pamalo pachigwilile chitelacho ni pachikusatama.
4 Mundu jwakusagamba kulola mbungo ngasapanda mbeju, soni mundu jwakusagamba kulola mawunde ngasagowola.
5 Mpela mwayikusaŵela kuti ngamkusamanyilila mwawukusakamulila masengo msimu m’mawupa ga mwanache pali m’chitumbo cha mamagwe, myoyosoni nganimŵa mmanyilile masengo ga Mlungu jusyesyene jwakusatenda yindu yosope.
6 Mpande mbeju syenu kundaŵi soni mkakunda kuti mkono wenu upumule mpaka ligulo. Pakuŵa ngamkumanyilila mbeju syasichitenda chenene, chinga sili asi kapena sinesyo, kapena naga syosopesyo sichitenda chenene.
7 Kuŵala kuli kwakusangalasya, soni yikusaŵa chenene kuti meso genu galoleje lyuŵa.
8 Naga mundu atemi ni umi kwa yaka yejinji, asangalale ni yaka yakwe yosopeyo. Nambo akusosekwa kukumbuchila kuti masiku gachipi mpaka gaŵe gejinji. Yosope yayikwika yili yangali mate.
9 Mmwe mnyamata, msangalaleje pandaŵi jamli jwachinyamata. Soni mkunde kuti mtima wenu usangalaleje m’masiku ga unyamata wenu. Mtendeje yawukusaka mtima wenu, soni mjawuleje kwele meso genu gakumlongolela. Nambo mmanyilile kuti Mlungu jusyesyene chachimlamula mmwejo pa yindu yosopeyo.
10 Myoyo mtyosye yindu yosope yayikumlagasya mumtima mwenu. Mkakunda kuti chilichose chakuwulasya chijonanje chilu chenu, pakuŵa unyamata soni ndaŵi jele umi ukusanong’a mnope yili yangali mate.
Maloŵe Gamwiŵanda
^ Kapena kuti “mtumisye.”
^ Mikate jakala ŵajipanganyaga ni utandi wa tiligu kapena balele.
