Chakwawula kwa Filimoni 1:1-25
1 Une Paulo, mkayidi+ ligongo lya Klistu Yesu, pampepe ni Timoteyo+ mlongomjetu, ngumlembela mmwejo Filimoni jwamasengo mjetu jwapamtima,
2 soni Afiya mlumbugwetu, nambosoni Alikipo+ msilikali mjetu, ni mpingo wawukusasongana m’nyumba jenu:+
3 Nguŵenda kuti umbone mtima wekulungwa soni mtendele wakutyochela kwa Mlungu Atati ŵetu ni Ambuje Yesu Klistu, uŵe ni jemanja.
4 Ndaŵi syosope ngusamyamichila Mlungu jwangu pangukolanga ya mmwejo m’mapopelo gangu,+
5 pakuŵa ngupikana ya chikulupi chenu soni chinonyelo chamkwete pa Ambuje Yesu ni pa ŵaswela wosope.
6 Ngupopela kuti chikulupi chamkwete mwakulandana ni m’weji chimtendekasye kuti mmanyilile yindu yiliyose yambone yatupatile ligongo lya Klistu.
7 Pangupikana ya chinonyelo chenu, ngusaŵa jwakusangalala mnope soni yikusandamika mtima pasi, pakuŵa mitima ja ŵaswelawo jilimbile ligongo lya mmwejo mlongomjangu.
8 Pa ligongo lyeleli, atamose kuti mwa Klistu ngwete ufulu wekulungwa wakumlamula mmwejo kutenda yayili yakuŵajilwa,
9 nambo ngumŵenda mwachinonyelo, pakuŵa apano, une Paulo ndili mundu jwachikulile soni ndili mkayidi ligongo lya Klistu Yesu.
10 Ngumŵenda pakwamba ya mwanangu, Onesimo,+ jwele une mbele babagwe+ pandili mundende.*
11 Jwalakweju pandanda jwaliji jwangali masengo kwa mmwejo, nambo sambano ali jwakusosekwa kwa mmwejo soni kwa une.
12 Ngumwuchisya jwalakweju kwa mmwejo, elo jwalakweju, jwapamtima jwangu.*
13 Sachileje kumsunga jwalakweju akuno mmalo mwa mmwejo kuti andumichileje pandili mundende ligongo lya ngani syambone.+
14 Nambo ngangusaka kutenda chilichose mwangamŵenda mmwejo, kuti yambone yampaka mtende, yikaŵa yakumkanganichisya, nambo myitende mwakusaka kwenu.+
15 Mwinetu ni ligongo lyakwe jwalakweju jwatisile kwa mmwejo kwakandaŵi, kuti chimtame najosoni mpaka kalakala,
16 ngaŵaga mpela kapolope mpela muyaŵelele pandanda,+ nambo mpelasoni mlongomjenu mwa Ambuje. Mtameje najo mpela mlongomjetu jwapamtima,+ mpela mwaŵelele kwa une, nambo kwekulungwa mnope kwa mmwejo, mwakuchilu soni mwa Ambuje.
17 Myoyo naga mkusambona une mpela mjenu, mumpochele chenene jwalakweju mpela mwampaka mumbochelele unejo.
18 Nambosoni, naga chipali chakulemwa chilichose chaŵamtendele kapena naga akwete namwe ngongole, munjimbe une magambo.
19 Une Paulo, ngulemba ni mkono wangu kuti chinjilipila. Mkaliŵalilatu kuti mmwejosoni mkwete ngongole kwa une, atamose umi wenu usyesyenewo.
20 Elo, mlongomjangu, ngumŵenda kuti mundendele yeleyi mwa Ambuje, mlimbisye mtima wangu mwakamulana ni Klistu.
21 Ngumlembela chikalatachi pakulupilila kuti chimtende yeleyi. Ngumanyilila kuti chimtende atamosesoni yakupunda yambecheteyi.
22 Konjechesya pelepa, mulinganyichisyesoni malo gagona, ligongo ngukulupilila kuti kupitila m’mapopelo ga jemanja, changopole ni kumbuchisya kwa jemanja.+
23 Epafula,+ kapolo mjangu mwa Klistu Yesu, akuti moni.
24 Moni wine ukutyochela kwa Maliko, Alisitako,+ Dema,+ soni Luka,+ ŵamasengo achimjangu.
25 Umbone mtima wekulungwa wa Ambuje Yesu Klistu uŵe ni jemanja ligongo lya nganisyo syambone syamkusalosya.
