Ekisodo 8:1-32
8 Kaneko Yehofa ŵamsalile Mose kuti, “Mjawule kwa Falawo ni mkamsalile jwalakwejo kuti, ‘Yehofa aŵechete kuti, “Mwakunde ŵandu ŵangu kutyoka kuti akandumichile une.
2 Naga mkupitilisya kukana kuti jemanjaji atyoche, une chinjitendekasya kuti m’chilambo chosopechi mugwe mlili wa yiwula.*
3 Mu lusulo lwa Nailo muchigumbala yiwula, mwamti yiwulayo yichityoka m’lusulomo ni kwinjila m’nyumba jenu, kuchipinda chenu chagona, pabedi penu, mpaka yichiyikasoni m’nyumba sya ŵakutumichila ŵenu soni sya ŵandu ŵenu, m’maufuni genu gakochela mkate* soni mumbale syenu syakuwunyila utandi.
4 Yiwulayo yichiyika kwa mmwejo, kwa ŵandu ŵenu soni yichiyika kwa ŵakutumichila ŵenu wosope.”’”
5 Kaneko Yehofa ŵamsalile Mose kuti, “Mumsalile Aloni kuti, ‘Mtambasukule mkono wenu ni mlanjile ni ndodo jenujo kwasili sulo, kwasili ngalande syakutyochela mu lusulo lwa Nailo soni m’malo galigose gakutama mesi. Mtende yeleyi kuti yiwula yikopoche ni kuŵa palipose m’chilambo cha Iguputo.’”
6 Pelepo Aloni ŵatambasukwile mkono wakwe ni kulanjila ni ndodo jakwe jila kwagaliji mesi ga m’chilambo cha Iguputo, mwamti yiwula yatandite kopoka ni kugumbalana m’chilambo chosope cha Iguputocho.
7 Nambo ŵakutaga mbopesi ŵakutenda yamasenga ŵala ŵatesilesoni iyoyo mwakamulana ni masenga gawo, mwamti nombenawo ŵatendekasisye kuti yiwula yikopoche ni kuŵa palipose m’chilambo cha Iguputo.
8 Kaneko Falawo ŵamŵilasile Mose soni Aloni ni kwasalila kuti, “Mumŵende Yehofa kuti atyosye yiwulayi kwa une soni kwa ŵandu ŵangu, ligongo ngusaka kwakunda ŵanduŵa kuti ajawule kukupeleka mbopesi kwa Yehofa.”
9 Pelepo Mose ŵamsalile Falawo kuti, “Wawojo asalile une ndaŵi jakumŵenda Mlungu kuti atyosye yiwulayi kwa wawojo, ŵakutumichila ŵawo, ŵandu ŵawo soni m’nyumba syawo. Nambo yiwulayo chiyisigale mu lusulo lwa Nailo basi.”
10 Pelepo jwalakwe jwajanjile kuti, “Malaŵi.” Myoyo Mose jwatite, “Yeleyi chiyitendekwe mwakamulana ni yaŵechete wawojo ni chakulinga chakuti amanyilile kuti pangali jwalijose jwakulandana ni Yehofa Mlungu jwetu.
11 Yiwulayo chiyityoche kwa wawojo, m’nyumba syawo, kwa ŵakutumichila ŵawo soni ŵandu ŵawo. Nambo chiyisigale mu lusulo lwa Nailo basi.”
12 Myoyo Mose soni Aloni ŵatyosile kwa Falawo, soni Mosejo ŵaŵendile kwa Yehofa kuti atyosye yiwula yaŵayikasisye pa Falawo.
13 Pelepo Yehofa ŵatesile mwakamulana ni yaŵaŵendile Mose, mwamti yiwula yosope yayaliji m’nyumba syawo, m’maluŵala soni m’migunda jawo yatandite kuwa.
14 Ŵandu ŵatandite kuwunjika yiwulayo m’mawunjili gejinji mwamti chilambo chosopecho chatandite kununga.
15 Kaneko Falawo paŵayiweni kuti mlili wa yiwulayo umasile, ŵajumwisye mtima wakwe, mwamti ŵakanile kumpikanila Mose ni Aloni mpela muŵaŵechetele Yehofa.
16 Sambano Yehofa ŵamsalile Mose kuti, “Mumsalile Aloni kuti, ‘Mjigale ndodo jenu ni mpute luwundu lwa pachilambo chapasi. Luwundulo chilusanduche tulombo* twakuluma twachituŵe palipose m’chilambo cha Iguputo.’”
17 Myoyo jemanjajo ŵatesile mmomo. Aloni ŵatambasukwile mkono wakwe ali ajigele ndodo ni kuputa luwundu lwa pachilambo chapasi, mwamti tulombo twakuluma twayiche pa ŵandu soni yinyama. Pelepo luwundu losope lwa pachilambo chapasi lwasandwiche tulombo twakuluma ni kuŵa palipose m’chilambo chosope cha Iguputo.
18 Ŵakutaga mbopesi ŵakutenda yamasenga ŵalinjile kutenda iyoyo kuti nombenawo akoposye tulombo twakuluma mwakamulana ni masenga gawo, nambo ŵalepele. Pelepo tulombo twakuluma tula twaliji pa ŵandu soni yinyama.
19 Myoyo ŵakutaga mbopesi ŵakutenda yamasenga ŵala ŵamsalile Falawo kuti, “Yeleyi yili yakutyochela kwa Mlungu.”* Nambo Falawo ŵapitilisye kuŵa jwakumula mtima, mwamti jwalakwe nganapikanila mpela muŵaŵechetele Yehofa.
20 Kaneko Yehofa ŵamsalile Mose kuti, “Malaŵi mjimuche kundaŵindaŵipe ni mkajime pakuti mkasimane ni Falawo. Jwalakwe chachiŵa ali mkwawula ku lusulo, ni mkamsalile jwalakwejo kuti, ‘Yehofa aŵechete kuti, “Mwakunde ŵandu ŵangu kutyoka kuti akandumichile une.
21 Nambo naga ngamkwakunda ŵandu ŵangu kutyoka, chinjitumisya membe* syakwemba myasi pa mmwejo, ŵakutumichila ŵenu, ŵandu ŵenu soni m’nyumba syenu. Mwamti nyumba syosope sya mu Iguputo sichigumbala ni membe syakwemba myasi, soni membesyo sichiŵa palipose pali jemanjajo.*
22 Palisiku lyelelyo dela ja ku Goseni kwakusatama ŵandu ŵangu chinjijileka, mwamti membesyo ngasisiyika kweleko. Pachinjitenda yeleyo, mmwejo chimchimanyilila kuti une Yehofa, ndili m’chilambo achino.
23 Une chinjalekanganya ŵandu ŵangu ni ŵenu, mwamti malaŵi chakusimonjesya chelechi chichitendekwe.”’”
24 Myoyo Yehofa ŵatesile yaŵaŵechete, mwamti membe syejinji syatandite kwika m’nyumba ja Falawo soni m’nyumba sya ŵakutumichila ŵakwe ni pachilambo chosope cha Iguputo. Pelepo membesyo syalagasisye mnope m’chilambo chosopecho.
25 Pambesi pakwe Falawo ŵaŵilasile Mose ni Aloni ni kwasalila kuti, “Mjawuleje mkapeleche mbopesi kwa Mlungu jwenu m’chilambo munomuno.”
26 Nambo Mose ŵajanjile kuti, “Nganiyiŵa yakuŵajilwa kutenda yeleyo, ligongo yachitupeleche mbopesi kwa Yehofa Mlungu jwetu chiyiŵe yakunyalaya kwa Aiguputo. Naga tukupeleka mbopesi pameso pa Aiguputo, syasili syakunyalaya kwa jemanjajo, ana jemanjajo ngatusoma maganga?
27 M’weji chitujende ulendo wa masiku gatatu m’chipululu, mwamti kweleko chitukapeleche mbopesi kwa Yehofa Mlungu jwetu mpela mwaŵechetele jwalakwejo kwa m’weji.”
28 Pelepo Falawo ŵajanjile kuti, “Une chinamkunde jemanja kwawula kuti mkapeleche mbopesi kwa Yehofa Mlungu jwenu m’chipululu. Nambo mkajawula kwakutalika mnope. Sambano mumbendele kwa Mlungu jwenu kuti andyochesye membesi.”
29 Kaneko Mose ŵatite, “Sambano ngutyoka pameso pawo soni ngwawula kukwaŵendela kwa Yehofa, mwamti malaŵi membesyo chisityoche pa wawojo Falawo, ŵakutumichila ŵawo soni pa ŵandu ŵawo. Nambo wawojo Falawo aleche yakutuloŵesya m’weji pakwakanya ŵandu kwawula kukupeleka mbopesi kwa Yehofa.”
30 Myoyo Mose ŵatyosile pameso pa Falawo ni kwawula kuja kuŵenda kwa Yehofa.
31 Pelepo Yehofa ŵatesile mwakamulana ni yaŵaŵendile Mose, mwamti membesyo syatyosile pa Falawo, ŵakutumichila ŵakwe soni pa ŵandu ŵakwe. Nganijisigala membe atamose jimo.
32 Nambope Falawo ŵajumwisyesoni mtima wakwe, mwamti nganiŵakunda ŵanduwo kutyoka.
Maloŵe Gamwiŵanda
^ Ŵane akusati “yola; malyola.”
^ Mikate jakala ŵajipanganyaga ni utandi wa tiligu kapena balele.
^ Tulombo tweletu tukusawoneka mpela ususu.
^ Mu Chihebeli ŵatiga, “chelechi chili chala cha Mlungu.”
^ Kapena kuti, “maguwa.” Ŵane akusati “yiguwaguwa.”
^ Pelepa akwamba Aiguputo.
