Ekisodo 29:1-46
29 “Ayi ni yamkusosekwa kutenda pakusaka kwaswejesya jemanjajo kuti andumichile une mpela ŵakutaga mbopesi. Mjigale ng’ombe jamwana jelume, ngondolo siŵili syelume syangalemala,
2 mkate* wangali yakusasaŵisya, mkate wakusyungulila wepowole pasikati wakuwanganya ni mawuta soni wangali yakusasaŵisya. Nambosoni mjigale mkate wepwapwatiche wangali yakusasaŵisya wepache mawuta. Mpanganye mikate jeleji pakamulichisya masengo utandi wa tiligu wambone mnope.
3 Mkayiŵiche yeleyi mu lukalala ni kuyipeleka pampepe ni ng’ombe jelume soni ngondolo siŵili sila.
4 “Kaneko mumjigale Aloni pampepe ni ŵanache ŵakwe ŵachalume ni kwawula nawo pamlango wa chitenti chakusimanilana ni kwajojesya* jemanjajo ni mesi.
5 Kaneko mjigale yakuwala yila ni kum’wecha Aloni. Mum’weche mkanjo, malaja gangali makono ga mkati mwa efodi, efodi soni chakuwala pamtima. Mkusosekwasoni kutaŵa chenene lamba jwa efodi m’chiwunu mwakwe.
6 Mum’wechesoni nduŵila mumtwe ni kuŵika panduŵilapo chimanyisyo cheswela chakulosya kulipeleka.
7 Nambosoni mjigale mawuta gakumtaga mundu pamsagwile ni kugataga pamtwe pa jwalakwejo ni kumsagula.
8 “Kaneko mwajigale ŵanache ŵakwe ŵachalume ni kwika nawo pameso pangu soni mwaweche mikanjo.
9 Nambosoni Aloni pampepe ni ŵanache ŵakwe ŵachalume mwataŵilile malamba m’chiwunu mwawo soni mwataŵe mpango mumtwe mwawo. Jemanjaji pampepe ni yisukulu yawo chachiŵa ŵakutaga mbopesi, soni lyeleli lili lilamusi lyampaka kalakala. Yeleyi ni yachimtende pakumpa machili Aloni soni ŵanache ŵakwe ŵachalume kuti atumichileje mpela ŵakutaga mbopesi.
10 “Sambano mmwejo mjigale ng’ombe jelume ni kujipeleka pasogolo pa chitenti chakusimanilana, soni Aloni pampepe ni ŵanache ŵakwe ŵachalume aŵiche makono gawo pamtwe pa ng’ombejo.
11 Kaneko mjiwulaje ng’ombejo pameso pa Yehofa, pamlango wakwinjilila muchitenti chakusimanilana.
12 Ni mkajigale myasi jine ja ng’ombejo pachala chenu soni mkajipache pa misengo ja malo gakupelechela mbopesi. Myasi jine jakusigalajo mkajikusulile pasi pa malo gakupelechela mbopesigo.
13 Mjigalesoni mawuta gosope gakusa kwa matumbo, mawuta ga mulitoga soni mbyo siŵili pampepe ni mawuta gakwe gagali mwelemo ni kuyijocha yosopeyo pamoto ni chakulinga chakuti lyosi likopocheje kutyochela pa malo gakupelechela mbopesigo.
14 Nambo nyama ja ng’ombejo, lipende lyakwe soni ndoŵe syakwe myijoche ni moto kusa kwa matenti pakuŵa jeleji jili mbopesi jakululuchila ulemwa.
15 “Kaneko mjigale ngondolo jimo jelume soni Aloni ni ŵanache ŵakwe ŵachalume aŵiche makono gawo pamtwe pa ngondolojo.
16 Mjiwulaje ngondolojo soni mjigale myasi jakwe ni kujimisila mumbali syosope sya malo gakupelechela mbopesi.
17 Mjikatanye ngondolojo ndulinduli soni mchape matumbo gakwe ni yiboda yakwe ni kusijala ndulisyo pampepe ni mtwe wakwe.
18 Kaneko mjijoche ngondolo josopejo kuti lyosi likopocheje kutyochela pa malo gakupelechela mbopesigo. Jeleji jili mbopesi jakutinisya jakupeleka kwa Yehofa jakola kaliwungo kambone kakusangalasya.* Soni jeleji jili mbopesi jakocha ni moto jakupeleka kwa Yehofa.
19 “Kaneko mjigale ngondolo jine jelume soni Aloni ni ŵanache ŵakwe ŵachalume aŵiche makono gawo pamtwe pa ngondolojo.
20 Ni mjiwulaje ngondolojo soni mjigale myasi jine ja ngondolojo ni kujipakasya mwiŵanda mwa liwiwi lyakumlyo lya Aloni soni mwiŵanda mwa mawiwi gakumlyo ga ŵanache ŵakwe ŵachalume. Mpakasyesoni myasijo mu yala yawo yekulungwa ya mkono wawo wakumlyo soni mu yala yawo yekulungwa ya lukongolo lwakumlyo. Nambosoni mkusosekwa kumisila myasijo mumbali syosope sya malo gakupelechela mbopesi.
21 Kaneko mjigale myasi jine jajili pa malo gakupelechela mbopesi soni mawuta gane gakumtaga mundu pamsagwile ni kumdondechesya Aloni soni kudondechesya pa yakuwala yakwe. Nambosoni mwadondechesye ŵanache ŵakwe ŵachalume ni kuyidondechesyasoni yakuwala yawo ni chakulinga chakuti Alonijo ni yakuwala yakwe soni ŵanache ŵakwe ŵachalumewo ni yakuwala yawo aŵe ŵaswela.
22 “Kaneko mtyosye mungondolojo mawuta, mchila wamawuta, mawuta ga kusa kwa matumbo, mawuta ga mulitoga soni mbyo siŵili pampepe ni mawuta gakwe, pakuŵa jeleji jili ngondolo jakupeleka pakumŵika Aloni soni ŵanache kuti atumichileje mpela ŵakutaga mbopesi.
23 Kutyochela mu lukalala lwaluli pameso pa Yehofa mwajili mikate jangali yakusasaŵisya, mjigale mkate wakusyungulila soni mkate wakusyungulila wepowole pasikati wakuwanganya ni mawuta soni mkate wepwapwatiche.
24 Mkusosekwa kuyiŵika yosopeyo mmyala mwa Aloni soni mmyala mwa ŵanache ŵakwe ŵachalume ni kuyiyuya aku nakuku mpela mbopesi jakuyuya jakupeleka kwa Yehofa.
25 Kaneko myityosye mmyala mwawomo ni kuyijocha pa malo gakupelechela mbopesi penani pa mbopesi jakutinisya kuti jiŵe jakola kaliwungo kambone kakusangalasya* pameso pa Yehofa. Jeleji jili mbopesi jakocha ni moto jakupeleka kwa Yehofa.
26 “Mjigale chidali cha ngondolo jakupeleka pakumŵika Aloni kuti aŵe jwakutaga mbopesi ni kuchiyuya aku nakuku mpela mbopesi jakuyuya jakupeleka kwa Yehofa, soni nyama jeleji ni jajichiŵa jenu.
27 Mŵiche pajika chidali cha mbopesi jakuyuya soni lukongolo lwa mbali japajika lwamwayuyiye lula lwele mwajigele kutyochela pa ngondolo jakupeleka pakumŵika Aloni soni ŵanache ŵakwe ŵachalume kuti aŵe ŵakutaga mbopesi.
28 Yeleyi chiyiŵe ya Aloni ni ŵanache ŵakwe ŵachalume soni lili lilamusi lyampaka kalakala lyakuti Ayisalayeli alikuyeje soni yichiŵa mbali japajika jele Ayisalayeli akusosekwa kupeleka. Yeleyi yili mbali jawo japajika jakupeleka kwa Yehofa kutyochela pa mbopesi syawo syamkamulano.
29 “Yakuwala yeswela yayili ya Aloni yichiŵa ya ŵanache ŵakwe ŵachalume ŵakwika pasogolo pakwe, pandaŵi jele jemanjajo chachasagula ni kwaŵika kuti aŵe ŵakutaga mbopesi.
30 Jwakutaga mbopesi jwakwinjila mmalo mwa Aloni jwakutyochela pasikati pa ŵanache ŵakwe ŵachalume soni jwakwinjila mu chitenti chakusimanilana kuti akatumichile ku malo geswela chachisosekwaga kuwala yakuwala yeleyi kwa masiku 7.
31 “Mjigale ngondolo jakupeleka pamŵisile mundu kuti aŵe jwakutaga mbopesi ni kujiteleka nyama jakwejo m’malo geswela.
32 Soni Aloni ni ŵanache ŵakwe ŵachalume alyeje nyama ja ngondolojo soni mkate wawuli mu lukalala pamlango wakwinjilila mu chitenti chakusimanilana.
33 Jemanjaji alyeje yindu yayipeleche kuti jiŵe mbopesi jakusimasya ulemwa pakwaŵika kuti aŵe ŵakutaga mbopesi soni pakwaswejesya. Nambo mundu jwanganaŵa jwakutaga mbopesi* ngakusosekwa kulya yindu yeleyi, pakuŵa yinduyo yili yeswela.
34 Naga nyama jakupeleka pakumŵika mundu kuti aŵe jwakutaga mbopesi soni mkate yisigele mpaka kundaŵi, mkusosekwa kuyijocha ni moto yakusigalayo. Ngayikusosekwa kulya pakuŵa yindu yeleyi yili yeswela.
35 “Mkusosekwa kutenda yeleyi kwa Aloni ni ŵanache ŵakwe ŵachalume mwakamulana ni yosope yanamlamwile. Pachijigala masiku gakwana 7 kuti mwaŵiche jemanjaji kuŵa ŵakutaga mbopesi.
36 Lisiku lililyose mkusosekwa kupeleka mbopesi jakusimasya ulemwa mwakupeleka ng’ombe mpela mbopesi ja ulemwa. Kutenda yeleyi yichiŵa kuti mgaswejesye ku ulemwa malo gakupelechela mbopesi. Nambosoni mkusosekwa kutaga mawuta pamalo gakupelechela mbopesigo kuti gaŵe geswela.
37 Pachijigalasoni masiku gakwana 7 gakugaswejesya malo gakupelechela mbopesi mwakupeleka mbopesi jakusimasya ulemwa. Mkusosekwa kutenda yeleyi ni chakulinga chakuti malo gakupelechela mbopesigo gaŵe geswela mnope. Jwalijose jwakutumichila* pa malo gakupelechela mbopesigo akusosekwa kuŵa jwamswela.
38 “Yindu yamkusosekwa kupeleka pa malo gakupelechela mbopesigo yiŵe ngondolo siŵili sya chaka chimo. Mpelecheje ngondolo syelesi lisiku lililyose ndaŵi syosope.
39 Mpelecheje ngondolo jimo kundaŵi soni ngondolo jinejo mpelecheje ligulo.*
40 Pamkupeleka ngondolo jandandajo, mpelecheje pampepe ni utandi wambone wagumbala mlingo umo pa milingo 10 ja efa* soni uŵeje wewanganye ni mawuta gejenje chenene gagumbala mlingo umo pa milingo mcheche ja hini.* Mpelechejesoni finyo jwa mbopesi ja chakumwa jwagumbala mlingo umo pa milingo mcheche ja hini.
41 Nambosoni pakumpeleka ngondolo jaŵilijo chakwigulo,* mpelecheje pampepe ni mbopesi ja utandi soni ja chakumwa mpela jimpeleche kundaŵi jila. Mpelecheje yeleyi kuti yiŵe mpela mbopesi jakola kaliwungo kambone kakusangalasya* jajili mbopesi jakocha ni moto jakupeleka kwa Yehofa.
42 Ndaŵi syosope mkusosekwa mpelecheje mbopesi syakutinisyasi pameso pa Yehofa ku mibado* jenu josope pamlango wakwinjilila mu chitenti chakusimanilana pele une chinjiwonechela kwa mmwejo soni kuŵechetana ni mmwejo.
43 “Une chinjiwonechela pelepo kwa Ayisalayeli soni malo gelego gachiŵa geswela ligongo lya uchimbichimbi wangu.
44 Chinjichiswejesya chitenti chakusimanilana soni malo gakupelechela mbopesi, soni chinjimswejesya Aloni pampepe ni ŵanache ŵakwe ŵachalume ni chakulinga chakuti andumichileje mpela ŵakutaga mbopesi.
45 Une chinjitama pasikati pa ŵandu ŵa Isalayeli soni une chinjiŵa Mlungu jwawo.
46 Soni jemanjajo chachimanyilila nditu kuti une ndili Yehofa Mlungu jwawo jwanakopwesye m’chilambo cha Iguputo ni chakulinga chakuti ndameje pasikati pawo. Une ndili Yehofa Mlungu jwawo.
Maloŵe Gamwiŵanda
^ Mikate jakala ŵajipanganyaga ni utandi wa tiligu kapena balele.
^ Komboleka kuti pelepa Mose ŵasalilaga jemanjajo kuti ajoje.
^ Kapena kuti, “kakunonyelesya. Mu Chihebeli ŵatiga, “kakutamika mtima pasi.”
^ Kapena kuti, “kakunonyelesya. Mu Chihebeli ŵatiga, “kakutamika mtima pasi.”
^ Mu Chihebeli ŵatiga, “mlendo,” kugopolela kuti mundu jwanganaŵa jwa muliŵasa lya Aloni.
^ Mu Chihebeli ŵatiga, “jwalijose jwakukwaya.”
^ Pelepa akwamba lyuŵa lili litiŵile nambo chipi mkanichitande.
^ Efa jimo jaŵaga ja malita 22. Alole Yakumbesi B14.
^ Hini jimo jaŵaga ja malita 3.67. Alole Yakumbesi B14.
^ Pelepa akwamba lyuŵa lili litiŵile nambo chipi mkanichitande.
^ Kapena kuti, “kakunonyelesya. Mu Chihebeli ŵatiga, “kakutamika mtima pasi.”
^ Ku Mozambique akusati “geração.”
