Ekisodo 1:1-22
1 Sambano Yakobo juŵalijisoni Isalayeli, paŵajawulaga ku Iguputo ŵaliji yimpepe ni ŵanache ŵakwe ŵachalume. Ŵanachewo ŵalijisoni yimpepe ni maŵasa gawo. Mena ga ŵanache ŵa Yakobo galiji:+
2 Lubeni, Simiyoni, Lefi, Yuda,+
3 Isakala, Sebuloni, Benjamini,
4 Dani ni Nafitali, nambosoni Gadi ni Aseli.+
5 Ŵanache wosope ŵaŵapagwile mwa Yakobo ŵaliji 70, nambo Yosefe ŵaliji ali kala ku Iguputo.+
6 Pali papite ndaŵi Yosefe ŵawile,+ nambosoni achalongo achimjakwe wosope soni m’bado* wosopewo wawile.
7 Panyuma pakwe Ayisalayeli* ŵaŵelekene soni ŵatupile mnope. Jemanjaji ŵapitilisye kutupa soni ŵaŵele ŵamachili mnope, mwamti ŵagumbele m’chilambocho.+
8 Pali papite ndaŵi mwenye jwasambano jwatandite kulamulila m’chilambo cha Iguputo. Nambo mwenye jweleju nganammanyililaga Yosefe.
9 Myoyo jwalakwe ŵasalile ŵandu ŵakwe kuti, “Alole! Ayisalayeliŵa atupile mnope soni ali ŵamachili kutupunda m’weji.+
10 Kwende tutende nawo yindu mwakalamuka jemanjaji. Ligongo naga tukwalechelela nikuti chagambeje kutupilatupila, soni naga jikutanda ngondo jemanjaji mpaka aŵe kumbali ja adani* ŵetu ni kulimbana ni m’weji, kaneko chachityoka m’chilambochi.”
11 Myoyo jemanjajo ŵasagwile ŵandu* ŵakuti ŵaloleleje Ayisalayeli soni kuti ŵakamulikasyeje masengo gakupweteka mnope mwakwakanganichisya.+ Nambosoni jemanjaji ŵataŵile misinda jakusunjila yindu kuti jiŵe ja Falawo. Mena ga misindaji galiji Pitomu soni Lamesi.+
12 Nambo jemanjaji paŵakamulikasyaga masengo mwangalwe* Ayisalayeli, ni pelesoni Ayisalayeliwo ŵatupilagatupilaga mnope soni kugumbala m’chilambomo, mwamti jemanjaji wakamwile mnope woga ligongo lya Ayisalayeliwo.+
13 Myoyo Aiguputowo ŵaliji mkwakamulikasya Ayisalayeli masengo ga ukapolo mwangalwe.+
14 Jemanjaji ŵatendekasisye umi wa Ayisalayeliwo kuŵa wakupweteka mnope. Ŵaliji mkwakamulikasya masengo gakuwunya matope soni kugumba njelwa. Nambosoni ŵakamulikasyaga masengo ga ukapolo ga mtundu uliwose gakumigunda. Yisyene, jemanjaji ŵatendekasisye Ayisalayeli kulaga mnope mwakwakamulikasya masengo ga ukapolo+ ga mtundu uliwose.
15 Pali papite ndaŵi, mwenye jwa ku Iguputo jwaŵechetene ni achakongwe ŵa Chihebeli ŵakamuchisya pakuŵeleka. Mena ga achakongweŵa galiji Sifila ni Puwa.
16 Jwalakwe ŵasalile jemanjaji kuti, “Pandaŵi jamkwakamuchisya achakongwe ŵa Chihebeli kuŵeleka, mlolechesyeje chenene pandaŵi jakuŵeleka.+ Naga mwanache jwakupagwajo ali jwamlume mkusosekwa mumwulajeje, nambo naga ali jwamkongwe mumlecheje ni umi, ngamwulaga.”
17 Nambope achakongwe ŵakamuchisya pakuŵeleka ŵala ŵamjogopaga Mlungu jusyesyene, mwamti jemanjaji nganatendaga yaŵasalile mwenye jwa ku Iguputo yila. Jemanjaji nganiŵawulagaga ŵanache ŵachalumewo.+
18 Kaneko mwenye jwa ku Iguputo ŵaŵilasile achakongwe ŵakamuchisya pakuŵeleka ŵala, ni ŵawusisye kuti, “Ligongo chichi mkwaleka ŵanache ŵachalume ngawulaga?”
19 Achakongwewo ŵamjanjile Falawo kuti, “Achakongwe ŵa Chihebeli ali ŵakulekangana mnope ni achakongwe ŵa Chiiguputo. Jemanjaji ali ŵakulimbangana mnope, mwamti jwamkongwe jwakamuchisya pakuŵeleka pakwika akwasimanaga ali aŵeleche kala.”
20 Myoyo Mlungu ŵapele upile achakongwe ŵakamuchisya pakuŵelekawo, mwamti Ayisalayeliwo ŵapitilisye kutupa mnope soni ŵaŵele ŵamachili.
21 Nambosoni ligongo lyakuti achakongwe ŵakamuchisya pakuŵelekawo ŵamjogopaga Mlungu jusyesyene, Mlungujo ŵakamuchisye jemanjaji kuti apate maŵasa.
22 Pambesi pakwe Falawo ŵalamwile ŵandu ŵakwe wosope kuti, “Mwanache jwamlume jwalijose jwa Chihebeli jwagambile kupagwa kwene akusosekwa amponyeje mu Lusulo lwa Nailo. Nambo naga mwanache jwapagwilejo ali jwamkongwe, amlecheje ni umi ngamwulaga.”+
