Detulonomo 9:1-29
9 “Mpikane jemanja Ayisalayeli, lelo mkomboka Yolodaniju kuti mjinjile m’chilambochi. Chimkachisumule chilambochi mmyala mwa mitundu jekulungwa soni jamachili kumpunda jemanja. Chilambochi chana misinda jekulungwakulungwa ja ndenje syakulimbangana syakwika mpaka kwinani.
2 M’chilambomo mwanasoni ŵanache ŵa Aanaki, ŵali ŵamachili soni ŵachalewulewu. Jemanja mkwamanyilila ŵandu ŵeleŵa soni mwapikene yakwamba jemanjaji yakuti, ‘Ana ŵani ŵampaka ajime kuti alimbane ni ŵanache ŵa Aanaki?’
3 Myoyo, jemanja mmanyilile lelo kuti Yehofa Mlungu jwenu chaŵe pasogolo penu pachimjombocheje. Jwalakwe ali mpela moto wakutinisya, mwamti chakajijonanje mitundu josope jenejo. Mlungu chachijigomeka mitundu jeleji pameso penu ni chakulinga chakuti mjitoposye mwachitemachitema soni mjijonanje, mwakamulana ni chilanga chaŵatesile Yehofa kwa jemanja.
4 “Yehofa Mlungu jwenu pakujitopola mitundu jelejo pameso penu, ngamkusosekwa kuŵecheta mumtima mwenu kuti, ‘Yehofa atujinjisye m’chilambochi ni kuchijigala kuti chiŵe chetu ligongo lya kulungama kwetu.’ Ngasimsosekwa kuganisya myoyo, pakuŵa Yehofa chakajitopole mitundu jelejo ligongo lya yakusakala yakutenda ŵandu ŵamitundu jelejo.
5 Ngaŵa kuti jemanja chimkajigale chilambo chawocho ni kuŵa chenu ligongo lya kulungama kwenu kapena ligongo lya mtima wenu wangagaŵikangana, iyayi. Mmalomwakwe Yehofa Mlungu jwenu akujitopola mitundu jelejo pameso penu ligongo lya yindu yakusakala yakutenda ŵandu ŵamitundu jeleji. Jwalakwe akutenda yeleyi ni chakulinga chakuti akwanilisye maloŵe gele Yehofajo ŵalumbile kwa achinangolo ŵenu, Abulahamu, Isaki soni Yakobo.
6 Nditu mmanyilile kuti Yehofa Mlungu jwenu ngaŵa kuti chakampe chilambo chambonechi kuti chiŵe chenu ligongo lya kulungama kwenu, iyayi, pakuŵa jemanja mli ŵandu ŵakumula mtima.*
7 “Mkumbuchile kuti jemanja mwamtumbilikasisye Yehofa Mlungu jwenu pamwaliji m’chipululu, mkaliŵalila yeleyi. Kutandila palisiku lyamwatyosile m’chilambo cha Iguputo mpaka kwika pamalo agano, jemanja mŵele mli mkujimuchila Yehofa.
8 Atamose pamwaliji ku Holebe, jemanja mwamtumbilikasisye Yehofa soni Yehofajo jwatumbile mnope mwamti ŵaliji jwakoseka kumpyajila wosope.
9 Panakwesile mwitumbi kuti ngapochele maganga gakusepa gagali maganga ga chilanga chaŵatesile Yehofa ni jemanja, une natemi mu litumbilyo kwa masiku 40, musi ni chilo ngalya yakulya yiliyose soni ngamwa mesi.
10 Kaneko Yehofa ŵambele maganga gaŵili gakusepa paŵalembilepo ni chala chakwe. Yehofa ŵalembilepo maloŵe gosope gaŵaŵechete kwa jemanja palitumbi lila kutyochela m’moto palisiku lyamwasongene jemanja kweleko.
11 Pagamasile masiku 40 ganatemi kweleko musi ni chilo, Yehofa ŵambele maganga gaŵili gakusepa gelega, gagali maganga ga chilanga.
12 Kaneko Yehofajo ŵasalile une kuti, ‘Mnyakuche, mtuluche mwachitemachitema mu litumbili ligongo ŵandu ŵenu ŵamwakopwesye m’chilambo cha Iguputo ŵala atesile chindu chakusakala. Jemanjajo asepwiche mwachitema palitala lyanalamwile kuti alikuyeje, mwamti alipanganyichisye chiwanichisyo* chachisyano.’
13 Kaneko Yehofa ŵaŵechete kwa une kuti, ‘Mlole, ŵandu ŵeleŵa naweni kuti ali ŵandu ŵakumula mtima.*
14 Sambano mungunde kuti napyajile jemanjaji ni kumasya lina lyawo kuti likapikanikasoni pachilambo chapasi. Kaneko mungunde kuti namtende mmwejo kuŵa mtundu wamachili soni mtundu wa ŵandu ŵajinji kupunda mwaŵelele jemanjajo.’
15 “Kaneko une nagalawiche nikutanda kutuluka mwitumbimo ndili njigele maganga gaŵili gakusepa ga chilanga gala mmyala mwangu. Pandaŵi jelejo litumbilyo lyakolelaga moto.
16 Pelepo une panamlolite jemanja nayiweni kuti mumlemwechesye Yehofa Mlungu jwenu mwakulipanganyichisya chiwanichisyo* chachisyano cha mwanache jwa ng’ombe. Nayiweni kuti msepwiche mwachitema palitala lyaŵamlamwile Yehofa kuti mlikuyeje.
17 Myoyo maganga gaŵili gakusepa ganajigele mmyala mwangu gala nagaponyisye pasi, mwamti gakasiche jemanja mli mkulola.
18 Kaneko natindiŵele ni kwinama mpaka ngope jangu pasi pameso pa Yehofa kwa masiku 40 musi ni chilo mpela munatendele paulendo wandanda wula. Nganindya yakulya yiliyose kapena kumwa mesi ligongo lya yakulemwa yosope yamwatesile jemanja mwakutenda chindu chakusakala pameso pa Yehofa, kwakuli kumlemwechesya jwalakwejo.
19 Pakuŵa wangamwile woga wekulungwa ligongo Yehofa ŵamtumbilile mnope jemanja, mwamti jwalakwe ŵaliji jwakoseka kuti ampyajile jemanja wosope. Nambope, pandaŵi jelejisoni Yehofa ŵapikenesoni kuŵenda kwangu.
20 “Yehofa ŵamtumbilile mnopesoni Aloni mwamti ŵasakaga kumjonanga jwalakwejo. Nambope pandaŵi jeleji napopesilesoni mwakumchondelela Mlungu kuti akamjonanga Aloni ligongo lyakulemwa kwakwe.
21 Kaneko chiwanichisyo cha mwanache jwa ng’ombe chamwapanganyisye ni kumlemwechesya nacho Mlungucho nachijigele ni kuchijocha pamoto. Nachikasenye ni kuchisyagasyaga mpaka kuŵa liwuliwupe. Kaneko najigele liwulyo ni kuja kuliponya m’mesi ga mulusulo lwalwatyochelaga mu litumbilyo.
22 “Konjechesya pelepa, jemanja mwamtumbilikasisyesoni Yehofa pandaŵi jamwaliji ku Tabela, ku Masa soni ku Kibuloti-hatafa.
23 Yehofa paŵamtyosisye jemanja ku Kadesi-balineya ni kumsalila kuti, ‘Mnyakuche, mjawule mkajigale chilambo changusaka kumpa kuti chiŵe chenu,’ pandaŵi jelejisoni jemanja mwakanile kukuya yaŵalamwile Yehofa Mlungu jwenu soni nganimumkulupilila ni kumpikanila jwalakwejo.
24 Kutandila ndaŵi janammanyilile jemanja mpaka apano, jemanja mŵele mli mkumjimuchila Yehofa.
25 “Myoyo une natindiŵele ni kwinama mpaka ngope jangu pasi pameso pa Yehofa. Napitilisye kutenda yeleyi kwa masiku gosope 40 musi ni chilo. Natendaga yeleyi ligongo Yehofa ŵasalaga kuti akusaka kumpyajila jemanja wosope.
26 Natandite kupopela mwakumchondelela Yehofa kuti, ‘Wawo Yehofa, Ambuje Ŵakulungwa Mnope, akajonanga ŵandu ŵawoŵa. Jemanjaji ali chipanje chawo, ŵandu ŵele ŵakulupwisye ni machili gawo soni ŵakopwesye m’chilambo cha Iguputo ni mkono wawo wamachili.
27 Akumbuchile ya ŵakutumichila ŵawo Abulahamu, Isaki soni Yakobo. Akayikosya yakusakala soni yakulemwa ya ŵanduŵa nambosoni ungapikanila wawo.
28 Akatenda yeleyi pakogopela kuti ŵandu ŵa m’chilambo chatukopwesye chila chachitanda kuŵecheta kuti, “Yehofa alepele kwayikasya ŵandu ŵala m’chilambo chaŵalumbile kuti chachapa. Ligongo lyakuti jwalakwe ŵaŵenganaga ni jemanjajo, ŵakopwesye ni chakulinga chakuti akawulajewulaje m’chipululu.”
29 Jemanjajitu ali ŵandu ŵawo soni ali chipanje chawo, ŵandu ŵele ŵaŵakopwesye ni machili gawo gekulungwa soni ni mkono wawo wetambasukule.’
Maloŵe Gamwiŵanda
^ Mu Chihebeli ŵatiga, “ŵakumula lukosi.”
^ Kapena kuti, “chiwanichisyo chagumba.”
^ Mu Chihebeli ŵatiga, “ŵakumula lukosi.”
^ Kapena kuti, “chiwanichisyo chagumba.”
