Detulonomo 11:1-32
11 “Mkusosekwa mumnonyeleje Yehofa Mlungu jwenu, soni ndaŵi syosope mkumbuchileje kumpikanila jwalakwejo mwakusunga malamusi gakwe soni yaŵamlamwile jwalakwejo.
2 Jemanja mkumanyilila kuti lelo nguŵecheta ni jemanja ngaŵaga ni ŵanache ŵenu ŵele nganamanyilila kapena kukuwona kwamuka kwa Yehofa, machili gakwe gekulungwa nambosoni mkono wakwe wamachili soni wetambasukule.
3 Jemanjajo nganayiwona yimanyisyo soni yindu yaŵatesile Mlungu ku Iguputo. Ŵayitesile yeleyi kwa Falawo mwenye jwa ku Iguputoko soni ku chilambo chakwe chosopecho.
4 Jemanjajo nganayiwonasoni yaŵatesile Mlungu ku gulu ja asilikali ŵa ku Iguputo soni ku ma hachi ga Falawo ni magaleta* gakwe ga ngondo, pandaŵi jele Mesi ga m’Nyasa Jechejewu gayitiŵisye yindu yosopeyi paŵamtoposyaga asilikaliwo. Yehofa ŵajonasile jemanjajo mwamti wosope ŵamalile papopo.*
5 Ŵanache ŵenuwo nganayiwonasoni yaŵamtendele Mlungu jemanja m’chipululu mpaka pamyiche akuno.
6 Jemanjajo nganayiwonasoni yaŵatesile Mlungu kwa Datani ni Abilamu, ŵali ŵanache ŵa Eliyabu yisukulu ya Lubeni. Pandaŵi jeleji chilambo chawugwiche ni kwamila jemanjajo pampepe ni maŵasa gawo soni matenti gawo nambosoni chaumi chilichose chachaliji kumbali ja jemanjajo. Yeleyi yatendekwe Ayisalayeli wosope ali mkulola.
7 Jemanja mwayiweni ni meso genu yindu yosope yekulungwa yaŵatesile Yehofa.
8 “Jemanja mkusosekwa msunjeje malamusi gosope gangumpa lelojinoga. Mtendeje yeleyi ni chakulinga chakuti mŵe ŵamachili ni komboka kwinjila m’chilambo chamkwawula kukuchijigala kuti chiŵe chipanje chenu.
9 Nambosoni ni chakulinga chakuti mkatame kwandaŵi jelewu m’chilambo chele Yehofa ŵalumbile kwa achinangolo ŵenu soni ŵanache ŵawo kuti chachapa, chilambo chakwenda mkaka ni uchi.
10 “Chilambo chamkwawula kukujigala kuti chiŵe chipanje chenucho nganichiŵa mpela chilambo cha Iguputo kwamtyochele jemanja. Ku chilambo kweleko mwasosekwaga kulimbichila mnope kukamula masengo gakwitilila* mbeju syenu syampandile mpela mkwitilila liponda m’matimbe.
11 Nambo m’chilambo chamkombochelacho ni kwinjila kuti mkachijigale, chili chilambo chakola matumbi soni yitiŵi.* Chilambocho chikusamwa mesi ga wula gakutyochela kwinani.
12 Chelecho chili chilambo chakuchisamalila Yehofa Mlungu jwenu. Ndaŵi syosope meso ga Yehofa Mlungu jwenu gakusaŵa pachilambo chelecho, kutandila kundanda kwa chaka mpaka kumbesi kwa chaka.
13 “Mkalolechesyeje kuti mkupikanila malamusi gangu gangumlamula lelojinoga. Nambosoni mkamnonyeleje Yehofa Mlungu jwenu ni kumtumichilaga jwalakwejo ni mtima wenu wosope soni ni umi wenu wosope. Naga mkuja kutenda yeleyi,
14 unesoni chinjigwisyaga ula m’chilambo chenu pandaŵi jakwe jakuŵajilwa kutandila kundanda kwa ula mpaka kumbesi kwa ula, mwamti chimchikola tiligu jwamjinji, finyo jwasambano jwamjinji soni mawuta gejinji.
15 Nambosoni chinjitendekasya yakumela kuti yimele m’chilambo chenu kuti yiŵe yakulya ya yilango yenu. Jemanjasoni chimchikola yakulya yejinji, mwamti chimchilyaga ni kwikuta.
16 Mkaŵeje ŵakusamala kuti mkaja kujigalika ni yakumbila ya mtima wenu ni kusepuchila kwa milungu jine kuti mtande kujitumichila soni kujitindiŵalila.
17 Naga mkuja kutenda yeleyi Yehofa chachimtumbilila jemanja. Jwalakwejo chachiwugala kwinani ni chakulinga chakuti wula jikagwa mwamti mbeju syenu syampandile mwitaka ngasisisogola. Nambosoni chimchimala mwachitema m’chilambo chambone chele Yehofa akumpa jemanja.
18 “Mgasunjeje maloŵe ganguga mumtima mwenu soni mgakamulichisyeje masengo paumi wenu. Mgataŵeje maloŵe gelega pamkono wenu kuti gaŵeje mpela chimanyisyo chakumkumbusya. Nambosoni maloŵe gelega gaŵeje mpela chakutaŵa pausyo penu.
19 Mwajiganyeje ŵanache ŵenu maloŵe gelega soni mŵecheteje nawo ŵanache ŵenuwo maloŵe gelega pamtemi pasi m’nyumba syenu, pamkwenda mumsewu, pamkugona nambosoni pamkwimuka.
20 Mgalembeje maloŵe gelega pa mafelemu ga nyumba syenu soni pa mageti ga msinda wenu.
21 Mkatendeje yeleyi ni chakulinga chakuti jemanja ni ŵanache ŵenuwo mkatame kwandaŵi jelewu m’chilambo chele Yehofa ŵalumbile kwa achinangolo ŵenu kuti chachapa. Chimkatame kwandaŵi jelewu mpela mwayiŵelele kuti kwinani kuchipitilisya kutama penani pa chilambo chapasi.
22 “Naga mkupikanila mwakusamala malamusi gangumpaga soni kugatendaga mwamti mkumnonyela Yehofa Mlungu jwenu, mkwenda m’matala gakwe gosope soni mkumnyambatila jwalakwejo,
23 Yehofa chakajitoposye mitundu josopejo pameso penu. Chimchijigomeka mitundu jekulungwa soni ja ŵandu ŵajinji mnope kumpunda jemanja.
24 Malo galigose gachimkaponde ni sajo syenu chigakaŵe genu. Malile genu gachiŵa kutandila kuchipululu mpaka kuja kwika ku Lebanoni. Nambosoni gachitandila ku Lusulo, lwaluli lusulo lwa Filate, mpaka kuja kwika ku nyasa* jakungapililolyuŵa.
25 Pangali mundu juchachijima kuti alimbane ni jemanja. Yehofa Mlungu jwenu chachitendekasya ŵandu wosope ŵa m’chilambo chamwajesilecho kola woga soni kutetemela ligongo lya jemanja, mwakamulana ni chilanga chaŵatesile kwa jemanja.
26 “Mlole, lelo ngumpa ufulu wakuti msagule pasikati pa upile ni matembelelo.
27 Chimchikola upile naga mkupikanila malamusi ga Yehofa Mlungu jwenu gangumlamula jemanja lelojino.
28 Nambo chimchipochela matembelelo naga ngamkupikanila malamusi ga Yehofa Mlungu jwenu ni mkugalawuchila kwine, kuleka kukuya litala lyangumlamula lelojino kuti mlikuyeje ni kutanda kujikuya milungu jele nganimjimanyililaga.
29 “Yehofa Mlungu jwenu pachakamjinjisye jemanja m’chilambo chamkuja kuchijigala kuti chiŵe chipanje chenucho, mkagombelesye yakwamba upile* palitumbi lya Gelisimu, soni yakwamba matembelelo palitumbi lya Eba.
30 Ana matumbi gelega ngati gali ku lisi line lya Yolodani kwinjililaga chakungapililolyuŵa kwakwe m’chilambo cha Akanani? Akanani ŵeleŵa akusatama ku Alaba mwakulolegana ni ku Giligala, mwakuŵandikana ni yitela yekulungwakulungwa ya ku Mole.
31 Pakuŵa jemanja mkomboka Yolodani ni kwinjila kuti mkachijigale chilambo chele Yehofa Mlungu jwenu akumpa jemanja, pachimkachijigale chilambocho ni kutanda kutamamo,
32 mkalolechesye kuti mkukuya malamusi gosope soni yaŵalamwile Mlungu yangumsalila jemanja lelojino.
Maloŵe Gamwiŵanda
^ Magaleta gali ngolo syakuwutidwa ni mahachi.
^ Kapena kuti, “mwamti ngakusimanikwasoni mpaka lelo.”
^ Mu Chihebeli ŵatiga, “kwele kumwasosekwaga kamula masengo gakwitilila ni sajo syenu.” Pelepa akwamba kukamulichisya masengo sajo syawo pakwendechesya yida yakupopa mesi kapena pakuwugula kapena pakuwugala ngalande sya mesi.
^ Yitiŵi yakusala pelepa yaliji yana malo gekulungwa ga fulati.
^ Jeleji jili nyasa jekulungwa jajili nyasa ja Mediterranean.
^ Kapena kuti, “mkapeleche upile.”
