Chakwawula kwa Aloma 8:1-39

  • Kuganichisya yindu ya msimu kukusayikasya umi ni mtendele (1-11)

  • Msimu ukusatendela umboni soni ukusatendekasya ŵandu kuŵa ŵanache ŵa Mlungu (12-17)

  • Yakupanganyikwa yikwembecheya ufulu wa ŵanache ŵa Mlungu (18-25)

  • “Msimu wa Mlungu ukusachondelela mmalo mwa m’weji” (26, 27)

  • Mlungu ŵalinganyisye kala yakuti chachisagula kagulu ka ŵandu (28-30)

  • Tukusayipunda yosope ligongo lyakuti Mlungu akusatunonyela (31-39)

8  Myoyo, wosope ŵali ŵakamulana ni Klistu Yesu nganakola magambo. 2  Pakuŵa chilamusi cha msimu chachikusapeleka umi kwa ŵandu ŵali ŵakamulana ni Klistu Yesu chimgopwele jemanja+ ku lilamusi lyakuyikasya ulemwa soni chiwa. 3  Chilamusi cha Mose chalepele+ kwagopola ŵandu ku ulemwa.+ Nambo Mlungu ŵatugopwele kupitila mwa Mwanagwe+ juŵayiche ni kuŵa mundu+ kuti amasye ulemwa. Myoyo Mlungu ŵawugomeche ulemwa. 4  Mlungu ŵatesile yeleyi kuti yindu yambone ya mu Chilamusicho yikwanilichikwe pa m’weji+ ŵatukusajenda mwakulongoleledwa ni msimu wa Mlungu,+ ngaŵaga mwakuya yakumbila ya chilu. 5  Ŵandu ŵakusakuya yakumbila ya chilu akusaganichisya yakumbila yachilu chawo,+ nambo ŵandu ŵakusalongoleledwa ni msimu wa Mlungu akusaganichisya yindu ya msimuwo.+ 6  Pakuŵa kuganichisya yindu yachikusakumbila chilu kukusayikasya chiwa,+ nambo kuganichisya yindu ya msimu kukusayikasya umi ni mtendele.+ 7  Kuganichisya yindu yachikusakumbila chilu kuli kulitenda kuŵa adani* ŵa Mlungu,+ pakuŵa chilu changapikanila chilamusi cha Mlungu, soni nganichiŵa chikombwele kupikanila chilamusicho. 8  Myoyo ŵandu ŵakusakuya yakumbila ya chilu nganaŵa amsangalesye Mlungu. 9  Nambope jemanja mkusakuya yakusaka ya msimu+ ngaŵaga yakumbila ya chilu ligongo msimu wa Mlungu uli nditu mwa jemanja. Nambo jwalijose jwanganakola nganisyo mpela sya Klistu, mundu jwelejo nganaŵa jwa Klistu. 10  Naga Klistu ali jwakamulana ni jemanja,+ nikuti msimu wampele umi ligongo lya chilungamo, nambo yilu yenu yawile ligongo lya ulemwa. 11  Sambano naga msimu wa Mlungu jwele juŵamjimwisye Yesu uli mwa jemanja, Mlungu jwele juŵamjimwisye Yesujo+ chachiyitendekasya yilu* yenu kuŵa yaumi+ kupitila mwa msimu wakwe wawuli mwa jemanja. 12  Myoyo achalongo achimjangu ngatukusosekwa kuti chilu chetu chitulamulileje kuti tutendeje yachikusaka.+ 13  Ligongo naga mkutenda yindu mwakuya yakusaka ya chilu, chimchiwa nditu. Nambo naga mkuwulaga yachikusakumbila chilu+ pakukuya yakusaka ya msimu, chimchitama ni umi.+ 14  Pakuŵa wosope ŵakusalongoleledwa ni msimu wa Mlungu ali ŵanache ŵa Mlungu.+ 15  Jemanja nganimpochela msimu wakumtendekasya kuŵa achikapolo kuti mŵesoni ŵa woga, nambo mwapochele msimu wakumtendekasya kuti Mlungu amjigale mpela ŵanache ŵakwe. Msimuwo ukusatutendekasya kuti tuŵilanjeje kuti, “Abba,* Atati!”+ 16  Msimu wa Mlungu ukusatusimichisya*+ kuti m’weji tuli ŵanache ŵa Mlungu.+ 17  Sambano pakuŵa tuli ŵanache ŵa Mlungu, nikuti tulisoni ŵakupochela chipanje chakutyochela kwa Mlungujo. Naga tukulagasika pampepe+ ni Klistu, tuchipochela chipanjecho ni jwalakwe+ soni tuchichimbichika najo pampepe.+ 18  Ni ligongo lyakwe ngusayiwona yakusawusya yatukusimana nayo apano kuŵa yamwana pakuyilandanya ni uchimbichimbi wele uchiwonechela mwa m’weji.+ 19  Pakuŵa yakupanganyikwa yosope yikwembecheya ndaŵi jawuchiwonechela uchimbichimbi wa ŵanache ŵa Mlungu.+ 20  Yakupanganyikwayo yapelechedwe ku umi wangali chembecheyo,+ ngaŵaga mwakusaka kwakwe, nambo mwakusaka kwa jwele juŵayipeleche ku umiwu kuti m’weji tukole chembecheyo. 21  Chembecheyo chakwe chili chakuti yakupanganyikwa yosope yichigopoka+ ku ukapolo wa kuwola ni kola ufulu wakuchimbichika wa ŵanache ŵa Mlungu. 22  Pakuŵa tukumanyilila kuti yakupanganyikwa yosope yikuwuwula pampepe soni yikusimana ni yakupweteka mpaka apano. 23  Nambo sambano tukwete msimu wawukutukamuchisya kumanyilila mwayichiŵela yindu msogolo. Nambope mumtimamu tukulila+ patukwembecheya mwakusachilila kuti tujigalidwe ni kuŵa ŵanache ŵa Mlungu.+ Pandaŵijo tuchigopoka ku yilu yetu kupitila mu mbopesi jakutuwombola. 24  Pakuŵa twakulupwiche tuli ni chembecheyo chelechi. Nambotu chatukwembecheyacho pachiwoneche ngachikusaŵasoni chembecheyo. Naga mundu achiweni chiŵajembecheyaga, ana akusasosekwasoni kuchijembecheya? 25  Nambo naga tukwembecheya+ chindu chele ngatukuchiwona,+ tukusachijembecheyape ni mtima wosope soni mwakupilila.+ 26  Konjechesya pelepa, msimu weswela ukusatukamuchisya patuli ŵakupelembela.+ Mpaka tusache kupopela, nambo ni ngamanyilila yindu yatukusosekwa kuŵecheta. Pelepo msimu wa Mlungu ukusachondelela mmalo mwa m’weji pa yakudandawula yatulepele kuyisala. 27  Nambo Mlungu jwakusawungunya mitima,+ akusamanyilila yawukugopolela msimu weswela, pakuŵa msimuwo ukusachondelela mmalo mwa ŵaswelawo mwakamulana ni yakusasaka Mlungu. 28  Tukumanyilila kuti yosope yakusatenda Mlungu akusayitenda kuti yakamuchisye ŵandu ŵakusamnonyela jwalakwejo, ŵaŵaŵilasile mwakamulana ni chakulinga chakwe.+ 29  Akusatenda yeleyi kuti ŵasagule ŵandu ŵaŵamanyi pandanda pene kuti aŵe ŵakulandana ni Mwanache jwakwe,+ soni kuti Mwanache jwakwejo aŵe jwandanda kupagwa+ pasikati pa achalongo achimjakwe wosope.+ 30  Nambosoni, ŵaŵasagwilewo+ ni ŵelesoni ŵaŵaŵilasile.+ Soni ŵaŵaŵilasilewo ŵaweni kuŵa ŵangalemwa.+ Pambesi pakwe, ŵaŵaweni kuŵa ŵangalemwawo ŵachimbichisye.+ 31  Ana sambano tuŵechete chichi pakwamba yindu yeleyi? Naga Mlungu ali kumbali jetu, ana ŵani ŵampaka alimbane ni m’weji?+ 32  Pakuŵatu jwalakwe nganatujima Mwanache jwakwe nambo ŵampeleche kuti atuwile wosopewe.+ Naga jwalakwe ŵatesile yeleyi, ana ngasatupasoni yindu yine yosope mwakoloŵa makono? 33  Ana ŵani ŵachachajimba magambo* ŵandu ŵakusagulidwa ŵa Mlungu?+ Pakuŵa Mlungu ni jwakusiŵawona jemanjajo kuŵa ŵangali chakulemwa.+ 34  Ana ŵani ŵampaka ŵalamule jemanjajo kuti ali ŵakulemwa? Pangali. Pakuŵa Klistu Yesu ni juŵawilile soni jwalakwe ŵajimwiche. Apano ali kumkono wamlyo wa Mlungu+ soni akusachondelela kwa Mlungujo mmalo mwa m’weji.+ 35  Ana chichi champaka chitulekanganye ni chinonyelo cha Klistu?+ Ana yili yisawusyo, kapena yipwetesi, kapena kulagasidwa, kapena sala, kapena usawuchi, kapena yakogoya, kapena kuwulajidwa?+ 36  Paja Malemba gakusati, “Ligongo lyakuti tuli ŵandu ŵawo, tukuwulajidwa lisiku lililyose. Tukujigalidwa mpela ngondolo syakwenela kusisikita.”+ 37  Atamose yili myoyo, nambope tukuyipunda yosopeyi+ ni chikamuchisyo cha jwele jwakusatunonyelajo. 38  Pakuŵa simichisye kuti chinga chiwa kapena umi, chinga malayika, chinga maboma, chinga yindu yayipali, chinga yindu yayikwika, chinga machili,+ 39  chinga yapenani kapena yapasi, kapena chakupanganyidwa chine chilichose, nganichiŵa chitulekangenye ni chinonyelo chakusatulosya Mlungu kupitila mwa Ambuje ŵetu Klistu Yesu.

Maloŵe Gamwiŵanda

^ Ŵane akusati “achimmagongo.”
^ Mu Chigiliki ŵatiga, “yilu yakomboleka kuwa.”
^ Lyeleli lili liloŵe lya Chihebeli kapena Chialamu lyalikusagopolela kuti, “Baba.” Lili liloŵe lyakusasala ŵanache pakwaŵilanga baba ŵawo.
^ Mu Chigiliki ŵatiga, “ukusaŵichila umboni pampepe ni msimu wetu.”
^ Mu Chigiliki ŵatiga, “ŵani ŵachachakatila chisamani.”

Copyrights for this publication