Chikalata Chakwawula kwa Akolose 4:1-18
4 Jemanja achambuje, mwatendeleje yindu mwachilungamo soni mwakuŵajilwa achikapolo ŵenu, pakuŵa mkumanyilila kuti jemanjasoni mkwete Ambuje ŵenu kwinani.+
2 Mlimbichileje kupopela,+ mŵeje mesope pangani jakupopelaji soni mŵeje ŵakuyamichila.+
3 Pamkutenda yeleyi, mtupopelelejesoni m’weji+ kuti Mlungu atuwugulile litanga kuti tulalichile maloŵe soni kuti tukombole kuŵecheta ya yakusisika yapadela yakwamba Klistu, yele une andaŵile nayo,+
4 soni kuti lalichile chenene yakwamba yakusisika yapadela yeleyo mpela munasosechelaga.
5 Mpitilisye kwenda mwalunda pamkutenda yindu ni ŵandu ŵangakulupilila, soni mkamulichisyeje masengo chenene ndaŵi jenu.*+
6 Ndaŵi syosope maloŵe genu gaŵeje gambone, gakunong’a mpela kuti mgatasile njete,+ kuti mmanyilile mwampaka mumjanjile mundu jwalijose.+
7 Tukiko,+ mlongomjangu jwapamtima nambosoni mtumiki jwakulupichika soni kapolo mjetu mwa Ambuje, chamsalile yosope yakwamba une.
8 Ngumtumisya jwalakweju kwa jemanja ni chakulinga chakuti mmanyilile mwatuŵelele m’weji, soni kuti jwalakweju ajilimbikasye mitima jenu.
9 Akwika pampepe ni Onesimo,+ mlongomjangu jwakulupichika soni jwapamtima, jwele juŵatyochele pasikati penu. Jemanjaji chamsalile yosope yayikutendekwa akuno.
10 Alisitako,+ kapolo mjangu, akupeleka moni. Nambosoni Maliko,+ msuŵani jwa Balanaba (jwele twamsalile jemanja kuti chimumpochele chenene+ ndaŵi jilijose jichachiyika kweleko),
11 soni Yesu jwakolanjidwa Yusito, akupelekasoni moni. Jemanjaji ali mu gulu ja ŵandu ŵaŵawumbele, nambosoni ni ŵaŵaŵape ŵali ŵamasengo achimjangu pa masengo ga Umwenye wa Mlungu soni ŵaŵele ali mkulimbikasya* mnope une.
12 Epafula,+ kapolo jwa Klistu Yesu juŵatyochele pasikati penu akumpasoni moni. Jwalakweju ndaŵi syosope akusalipeleka mnope pakumpopelela, kuti pambesi pakwe mŵe ŵakulimba soni ŵakomangala mwausimu nambosoni kuti mŵe ŵangakayichila ata panandi yakusaka ya Mlungu yosope.
13 Pakuŵa ngumtendela umboni jwalakweju kuti akusalipeleka mnope mmalo mwa jemanja soni mmalo mwa achalongo achimjetu ku Laodikaya ni ku Helapoli.
14 Luka,+ jwali dokotala jwetu jwapamtima akupeleka moni. Nombenajo Dema+ akupeleka moni.
15 Mumbelechele moni kwa achalongo achimjetu ku Laodikaya soni kwa Nimfa ni ku mpingo wosope wawukusasongana pa nyumba jakwe.+
16 Chikalatachi pachimchiŵalanje kumangwenuko, mlinganyesoni yakuti akachiŵalanje+ ku mpingo wa Laodikaya soni jemanja mŵalanje chikalata chinatumisye ku Laodikayako.
17 Mumsalilesoni Alikipo+ kuti, “Mlolechesye kuti mkukwanilisya utumiki wamwawupochele mwa Ambuje.”
18 Sambano apochele moni wangu wangulemba jika ni mkono wangu,+ une Paulo. Akumbuchileje maunyolo gandaŵile nago ku ndende kuno.+ Umbone mtima wekulungwa uŵe ni jemanja.
