Chakwawula kwa Ahebeli 10:1-39

  • Mbopesi sya nyama syaliji syakupelembela (1-4)

    • Chilamusi chigambile kuŵa chiwulili (1)

  • Mbopesi ja Klistu ŵajipeleche kampepe basi (5-18)

  • Litala lyasambano soni lyaumi lyakwinjilila m’malo geswela (19-25)

    • Tukaleka kusongana pampepe (24, 25)

  • Kwakalamusya kuti akatendaga yakulemwa mwamele (26-31)

  • Tukusosekwa kumdalila Mlungu soni kumkulupilila kuti tupilile (32-39)

10  Pakuŵa Chilamusi chigambile kuŵa chiwulili+ basi cha yindu yambone yayikwika msogolo,+ nambo nganichiŵa yindu yisyesyeneyo. Chilamusichi nganichiŵa chatendekasisye ŵandu ŵakusamtumichila Mlungu kuŵa ŵamlama,+ atamose kuti jemanjaji akusapeleka mbopesi mwakuwilisyawilisya chaka chilichose. 2  Yikaŵe kuti mbopesi sikusatendekasyaga ŵandu kuŵa ŵamlama, nikuti akalesile kupeleka mbopesisyo. Akalesile kupeleka ligongo lyakuti ŵakwika ni mbopesisyo,* panyuma pakuti ŵaswejesye ngamkanaliwonagasoni kuti ali ŵakulemwa. 3  Mwakulekangana ni yeleyi, mbopesi siŵapelekaga chaka chilichosesi+ syakumbusyaga ŵanduwo kuti ali ŵakulemwa. 4  Pakuŵa yili yangakomboleka kuti myasi ja ng’ombe soni ja mbusi jityosye ulemwa. 5  Sambano jwalakwe paŵayikaga pachilambo chapasi ŵatite, “‘Wawojo nganasaka mbopesi sya nyama soni mbopesi sine, nambo ŵalinganyichisye une chilu. 6  Wawo nganajitichisya mbopesi syakutinisya syamtundu soni mbopesi sya ulemwa.’+ 7  Kaneko une natite, ‘Alole! Une nyiche (m’buku ŵalembile yakwamba une) kuti ndende yakusasaka wawojo, wawo Mlungu.’”+ 8  Mpela mwatuyiwonele pelepa kuti chandanda jwalakwe akuŵecheta kuti, “Wawo nganasaka kapena kwitichisya mbopesi sya nyama soni mbopesi sine nambosoni mbopesi syakutinisya syamtundu soni mbopesi sya ulemwa,” mbopesi syelesi sikusapelechedwa pakuya Chilamusi. 9  Kaneko jwalakwe ŵatite, “Alole! Une nyiche kuti ndende yakusasaka wawojo.”+ Jwalakwe ŵamasisye yayaliji yandandayo kuti atamilikasye chachili chaŵili. 10  Ligongo lya “yakusaka”+ ya Mlungu yeleyi, m’weji tuŵele ŵaswela kupitila mu chilu cha Yesu Klistu chaŵachipeleche kampepe basi mpaka kalakala.+ 11  Konjechesya pelepa, jwakutaga mbopesi jwalijose jwajimaga pamalo gakwe lisiku lililyose kuti atende masengo gakwe gakutumichila Mlungu.+ Jwalakwe jwapelekaga mbopesi sisyosyo mwakuwilisyawilisya,+ mbopesi syanganisityosyaga kusyesyene yakulemwa ya ŵandu.+ 12  Nambo mundu jweleju ŵapeleche mbopesi jimpepe ja ulemwa jajichikamula masengo mpaka kalakala, kaneko ŵatemi kumkono wamlyo wa Mlungu.+ 13  Jwalakwe atemi ni kwembecheyaga mpaka Mlungu pachachaŵika adani* ŵa jwalakwejo kuŵa chakupondapo sajo* syakwe.+ 14  Pakuŵa ni mbopesi jimpepe jwalakwe atendekasisye ŵandu ŵakusagulidwawo kuŵa ŵamlama+ mpaka kalakala. 15  Konjechesya pelepa, msimu weswela watusimichisyesoni yeleyi pawaŵechete kuti, 16  “Yehofa* akuti, ‘Chilanga chachinjitenda une ni jemanjajo panyuma pa masiku gelego chili achi: Chinjiŵika chilamusi changu m’mitima jawo, soni chinjichilemba munganisyo mwawo.’”+ 17  Kaneko msimuwo watite, “Yakulemwa yawo soni yitendo yawo yakusakala ngasinayikumbuchilasoni ata panandi.”+ 18  Sambano naga yindu yeleyi yakululuchidwe, nikuti ngapakusosekwasoni kupeleka mbopesi sya ulemwa. 19  Myoyo achalongo achimjangu, sambano mpaka tukombole kupita pa mlango wakwinjilila m’malo geswela+ tuli ŵangali woga* ligongo lya myasi ja Yesu. 20  Jwalakwe ŵatuwugulile mlango welewu mpela litala lyasambano soni lya ku umi lyakupita pa likatani+ lyakulekanganya yipinda. Likatani lyeleyi lili chilu chakwe. 21  Nambosoni tukwete jwakutaga mbopesi jwamkulungwa jwakulolela nyumba ja Mlungu.+ 22  Myoyo ligongo lya yindu yosopeyi, kwende tuŵandichile malo geswelaga ni mitima jambone soni chikulupi chakwanila. Tutende yeleyi pakuŵa mitima jetu jiswejele ni myasi kuti tukaŵa ni mtima*+ wakusakala, soni yilu yetu ayijojesye ni mesi geswela.+ 23  Kwende tupitilisye kusala kwa wosope ya chembecheyo chetu mwangakayichila,+ pakuŵa juŵasasile kuti chachitupa yatukwembecheyayi ali jwakulupichika. 24  Nambosoni kwende tuganichisyaneje* soni tulimbikasyaneje ni chakulinga chakuti tukomboleje kunonyelana soni kutenda yambone.+ 25  Kwende tukaleka kusongana pampepe.+ Tukaŵa mpela ŵane ŵakwete chisyoŵe changanonyela kwika pamisongano. Nambo kwende tulimbikasyaneje+ soni tulimbichile kutenda yeleyi, mnopemnope pamkuliwona lisikulyo kuti likuŵandichila.+ 26  Pakuŵa naga tukutenda yakulemwa mwamele panyuma pakumanyilila chenene yayili yisyesyene,+ nikuti pangalisoni mbopesi jine jajisigele jampaka jipelechedwe ligongo lya ulemwa wetuwo.+ 27  Nambo chachisigele chili kupochela chilango* chakogoya soni ukali wakolela mpela moto wele uchajonanga ŵakusisya wosope.+ 28  Jwalijose jwakukasa Chilamusi cha Mose akusawaga mwangamtendela chanasa naga pana umboni wa ŵandu ŵaŵili kapena ŵatatu.+ 29  Naga yili myoyo ni chilamusicho, kuli uli mundu jwampondilepondile Mwanache jwa Mlungu soni jwakujiwona myasi ja chilanga+ jijamswejesye jwalakwejo kuŵa jangali masengo, jwelesoni ŵawutumbilikasisye msimu wa Mlungu jwakusalosya umbone mtima wekulungwa? Mundu jwelejo akuŵajilwa kupochela chilango chekulungwa mnope.+ 30  Pakuŵa tukummanyilila juŵaŵechete kuti, “Kuwuchisya kuli kwangu, chinjiwuchisya namsyene.” Jwalakwejo ŵaŵechetesoni kuti, “Yehofa* chachalamula* ŵandu ŵakwe.”+ 31  Chili chindu chakogoya mnope kugwila mmyala mwa Mlungu jwaumi.* 32  Nambope, mpitilisye kukumbuchila masiku gakala gele mwapilile yakupweteka yejinji panyuma pakupochela kuŵala+ kwakutyochela kwa Mlungu. 33  Ndaŵi sine ŵandu ŵaliji mkumnyosya soni kumlagasya pameso pa wosope, soni ndaŵi sine mwaliji mkupikana kupweteka pampepe ni ŵandu ŵaŵasimanaga ni yeleyi. 34  Jemanja mwatendele chanasa ŵandu ŵaŵaliji mundende, soni mwakusangalala, mwakundile kuti ŵandu asumule yindu yenu.+ Mwatesile yosopeyi ligongo mkumanyilila kuti mkwete chipanje chambone soni changamala.+ 35  Myoyo, mkaleka kuŵecheta mwakulimba mtima, pakuŵa chimchipochela upile wekulungwa ligongo lya kulimba mtima kwenuko.+ 36  Jemanja mkusosekwa kuŵa ŵakupilila+ ni chakulinga chakuti panyuma pakuti mtesile yakusaka ya Mlungu, chimpochele yindu yaŵatite Mlungujo kuti chachimpa. 37  Nambope “kusigele kandaŵi panandi,”+ soni “jwele jwakwikajo chayiche nditu soni ngakokoŵa.”+ 38  “Nambo jwakulungama jwangu chachitama ni umi ligongo lya chikulupi chakwe,”+ soni “naga akuwujila munyuma, une* ngaŵa mkusangalala najo.”+ 39  Sambano m’weji nganituŵa ŵandu ŵakuwujila munyuma kuti tukajonasiche,+ nambo tuli ŵandu ŵakola chikulupi chakusunga umi wetu.

Maloŵe Gamwiŵanda

^ Kapena kuti “ŵakutenda utumiki wapadela.”
^ Ŵane akusati “makawu.”
^ Ŵane akusati “achimmagongo.”
^ Kapena kuti “tuli ŵakulimba mtima.”
^ Pelepa, maloŵe gatugopolele kuti “mtima” gakugopolela nganisyo syakumkumbusya mundu yambone soni yakusakala. Ŵane akusati “chikumbumtima.” Alole maloŵe gakuti “Mtima” pa mbali jakuti, Kugopolela kwa Maloŵe.
^ Kapena kuti “tukumbuchilaneje.”
^ Ŵane akusati “chamuko.”
^ Kapena kuti “chachawelusya.”
^ Alole mbali jakuti, Kugopolela kwa Maloŵe.
^ Kapena kuti “Chili chindu chakogoya mnope kupochela chilango kutyochela kwa Mlungu jwaumi.”
^ Kapena kuti “umi wangu.”

Copyrights for this publication