Chakwawula kwa Agalatiya 4:1-31
4 Sambano ngusaka namsalile kuti, naga jwakupochela chipanje ali mwanache, jwalakwe jwangalekangana ni kapolo atamose kuti akusaŵa msyene jwa yindu yosope.
2 Jwalakwe akusaŵaga pasi pa ŵamasengo ŵa babagwe ŵali ŵakulela ŵanache soni ŵakulolela nyumba mpaka pandaŵi jaŵaŵisile babagwewo kuti chachimpa chipanjecho jili jikwanile.
3 M’wejisoni patwaliji ŵanache, twaliji achikapolo ŵa yindu yangakamuchisya ya m’chilambochi.+
4 Nambo ndaŵi jakwe pajakwanile, Mlungu ŵamtumisye Mwanache jwakwe. Mwanacheju jwapagwile kwa jwamkongwe+ soni jwaŵele pasi pa chilamusi.+
5 Yeleyi yaŵele myoyo kuti ŵawombole wosope ŵali pasi pa chilamusi mwakwasuma,+ ni chakulinga chakuti Mlungu atujigale kuŵa ŵanache ŵakwe.+
6 Sambano ligongo lyakuti tuli ŵanache ŵakwe, Mlungu atutumichisye msimu weswela+ wawuli mwa Mwanache jwakwe kuti uŵe m’mitima jetu.+ Msimu welewu ni wawukusatutendekasya kuti tuŵilanjeje kuti, “Abba,* Atati!”+
7 Jwalijose mwa jemanja nganaŵasoni kapolo nambo ali mwanache. Myoyo naga jwalijose ali mwanache nikuti Mlungu amtesilesoni kuŵa jwakupochela chipanje.+
8 Atamose kuti yili myoyo, pandaŵi jele jemanja nganimummanyililaga Mlungu mwaliji achikapolo ŵa milungu jaunami.
9 Pakuŵa sambano mummanyilile Mlungu, kapena tujile kuti pakuŵa sambano mli ŵakumanyika kwa Mlungu, ligongo chichi mkuwujilasoni ku yindu yangakamuchisya+ yayili yauwanache soni yangali masengo? Ligongo chichi mkusaka kuŵasoni achikapolo ŵa yindu yeleyi?+
10 Jemanja mtandilesoni kugawona masiku, myesi,+ nyengo,* soni yaka kuŵa yakusosekwa mnope.
11 Sambano ngutenda woga kuti mwine masengo gangamwile pa jemanja mpaka gajawule pachabe.
12 Achalongo achimjangu, ngumŵenda kuti mŵe mpela mumbelele une, ligongo une kala nalijisoni mpela mwamŵelele jemanja.+ Jemanja nganimundemwechesya une chilichose.
13 Nambo jemanja mkumanyilila kuti une nakwete upile wakumlalichila ngani syambone paulendo wandanda ligongo lyakuti naliji mkulwala.
14 Atamose kuti ulwele wangu waliji mpela chakusawusya kwa jemanja, nambope nganimunyosya kapena kumbona kuŵa jwakunyalaya.* Jemanja mwambochele mpela lilayika lya Mlungu, kapena mpela Klistu Yesu.
15 Nambi chisangalalo chenu chila chili kwapi? Pakuŵa ngutendela umboni kuti jemanja mwaliji ŵakoseka atamose kukolotola meso genu ni kumba une,+ yikaŵe kuti yeleyi yili yakomboleka.
16 Ana sambano mbele mdani* jwenu ligongo lyakuti ngumsalila yisyesyene?
17 Ŵandu ŵane akutenda yiliyose yakomboleka kuti jemanja mjigaliche, nambo ngaŵa kuti akutenda yeleyi ni yakulinga yambone. Akusaka kumtalikanganya jemanja ni une, ni chakulinga chakuti mwakuyeje jemanjajo.
18 Nambope, mpaka yiŵe chenene kuti ŵandu amsosejesoseje jemanja ni yakulinga yambone, ngaŵaga pandaŵi jandili ni jemanjape nambo ndaŵi syosope.
19 Naga yikutendekwa myoyo, nikuti yichiŵa chenene ni jemanja ŵanache ŵangu.+ Ligongo lya jemanja, une ndandilesoni kupikana yakupweteka yapakuŵeleka yakusayipikana jwamkongwe pakuŵeleka, soni yeleyi chiyipitilisye mpaka ndamo sya Klistu sili siwonechele* chenene mwa jemanja.
20 Une nganonyele kuŵa kweleko kuti mbe ni jemanja, soni kuti namsalile maloŵe gelega m’litala line ligongotu une ngangupikanichisya kuti chikumtendechela chichi jemanja.
21 Jemanja ŵamli pasi pa chilamusi, musalile, Ana ngamkusapikana Chilamusi pachikuŵalanjidwa?
22 Mwachisyasyo, Malemba gakusati Abulahamu ŵakwete ŵanache ŵachalume ŵaŵili, jumo ŵamŵeleche kwa jwamkongwe juŵaliji kapolo,+ soni jwine ŵamŵeleche kwa jwamkongwe jwanganaŵa kapolo.+
23 Mwanache juŵapali kwa jwamkongwe juŵaliji kapolo jula, jwapali mpela mwakusapagwila ŵanache ŵane wosope,+ nambo jwele juŵapali kupitila mwa jwamkongwe jwanganaŵa kapolo jula, jwapali ligongo lya yindu yaŵasasile Mlungu kuti yichitendekwa.+
24 Yindu yeleyitu yikwete ngopolelo jine. Achakongwe ŵeleŵa akwimila yilanga yiŵili. Chilanga chandanda chili cha pa Litumbi lya Sinai.+ Chilangachi chikusatendekasya ŵanache kuti apagweje mpela achikapolo. Chilanga chelechi chikwimila Hagala jula.
25 Sambano Hagala akwimila Sinai.+ Lyeleli lili litumbi lya ku Alebiya, soni Hagalaju akulandana ni Yelusalemu masiku agano, pakuŵa Yelusalemu ali mu ukapolo pampepe ni ŵanache ŵakwe.
26 Nambo Yelusalemu jwakwinani ali mfulu,* soni jwalakwejo ali mama ŵetu.
27 Paja Malemba gakusati, “Mmwe jwamkongwe jwanganimŵelechejepo chitandilile, msangalale. Mgumile mnope ni chisangalalo, mmwe jwamkongwe jwanganimpikaneje yakupweteka yapakuŵeleka. Pakuŵa mmwejo, jwamkongwe jwele ŵamkwakwe ŵamlesile, ŵanache ŵenu chachiŵa ŵajinji mnope kupunda ŵanache ŵa jwamkongwe jwakwete ŵalume.”+
28 Sambano jemanja achalongo achimjangu mli ŵanache ŵamwapali ligongo lya yindu yaŵasasile Mlungu kuti yichitendekwa, mpela mujwaŵelele Isaki.+
29 Nambotu mwanache juŵapali mpela mwakusapagwila ŵanache wosope jula, ŵamlagasyaga mwanache juŵapali mwa msimu.+ Mwelemu ni mwayiŵelelesoni masiku agano.+
30 Ana Malemba gakusati uli pa nganiji? Gakusati, “Mumtopole msikana jwamasengoju pampepe ni mwanache jwakwe. Ligongo mwanache jwa msikana jwamasengoju ngasaŵa jwakupochela chipanje yimpepe ni mwanache jwa jwamkongwe jwanganaŵa kapolo.”+
31 Myoyo achalongo achimjangu, m’weji nganituŵa ŵanache ŵa jwamkongwe jwali kapolo, nambo tuli ŵanache ŵa jwamkongwe jwanganaŵa kapolo.
Maloŵe Gamwiŵanda
^ Lyeleli lili liloŵe lya Chihebeli kapena Chialamu lyalikusagopolela kuti, “Baba.” Lili liloŵe lyakusasala ŵanache pakwaŵilanga baba ŵawo.
^ Pelepa akwamba masiku gakumbuchila yisangalalo yineyakwe.
^ Kapena kuti “kusunila mata.”
^ Ŵane akusati “mmagongo.”
^ Kapena kuti “sili sitamilichiche.”
^ Ŵane akusati “mlukosyo.”
