Chakwawula kwa Agalatiya 3:1-29
-
Kutenda yindu mwakuya Chilamusi soni mwakuya chikulupi (1-14)
-
Jwakulungama chachiŵa ni umi ligongo lya chikulupi chakwe (11)
-
-
Chilanga cha Mlungu ni Abulahamu ngachikukwayana ni Chilamusi (15-18)
-
Klistu ali chisukulu cha Abulahamu (16)
-
-
Kuchatyochele Chilamusi soni chakulinga chakwe (19-25)
-
Wosope mli ŵanache ŵa Mlungu ligongo lya chikulupi (26-29)
-
Wosope ŵali ŵa Klistu ali ŵanache ŵa Abulahamu (29)
-
3 Jemanja Agalatiya mli ŵangali lunda eti! Pandandatu yaliji mpela mwam’weni Yesu Klistu ali amkomele pachitela,+ sambano ana ni ŵanisoni ŵamsokonasisye nganisyo?+
2 Ngusaka musalile kwanga kwa chiwusyo achi: Ana jemanja mwapochele msimu weswela ligongo lyakutenda yayili m’chilamusi kapena ligongo lyakulupilila yindu yimwapikene?+
3 Ana jemanja mli ŵangali lunda chamti myiyi? Jemanja pandanda mwatandite kulongoleledwa* ni msimu weswela, ana sambano mkumalisya mwakulongoleledwa ni nganisyo sya ŵandu?+
4 Ana mwakundile kusimana ni yakusawusya yila mwalulele basi? Ngukulupilila kuti nganiyiŵa myoyo.
5 Sambano jwele jwakusampa jemanja msimu weswela soni jwakusatenda yakusimonjesya yejinji+ pasikati penu, ana akusatenda yeleyi ligongo lyakuti mkusatenda yayili m’chilamusi kapena ligongo lyakukulupilila kwenu yindu yimwapikene?
6 Aganichisye ya Abulahamu. Jwalakwe “ŵamkulupilile Yehofa,* mwamti ŵam’weni kuŵa jwakulungama.”+
7 Mwangakayichila jemanja mkumanyilila kuti ŵandu ŵakusakola chikulupi ni ŵali ŵanache ŵa Abulahamu.+
8 Pakuŵa Mlungu ŵasasile chile m’Malemba kuti chachawona ŵandu ŵamitundu jine kuŵa ŵakulungama ligongo lya chikulupi. Myoyo ŵamsalile Abulahamu ngani jamboneji, kuti, “Kupitila mwa mmwejo mitundu josope ja ŵandu jichipochela upile.”+
9 Myoyo wosope ŵakwete chikulupi akupochela upile pampepe ni Abulahamu, juŵakwete chikulupi.+
10 Ŵandu wosope ŵakusadalila kutenda yayili m’chilamusi ali ŵatembeleledwe,* pakuŵa Malemba gakusati, “Jwalijose jwangakuya soni kutenda yosope yakulembedwa mu mpukutu wa chilamusi cha Mose ali jwamtembeleledwe.”+
11 Nambosoni yili yakumanyika chenene kuti Mlungu jwangamwona mundu kuŵa jwakulungama ligongo lyakukuya chilamusi,+ pakuŵa “jwakulungama chachitama ni umi ligongo lya chikulupi chakwe.”+
12 Pakuŵa kuti mundu akuye yayili m’Chilamusi ngaŵa kuti yikusasosekwa kuti akole chikulupi. Mmalomwakwe, “jwalijose jwakutenda yayili m’chilamusi chachipitilisya kutama ni umi ligongo lya chilamusicho.”+
13 Pakuŵa yalembedwe kuti, “Jwalijose jwakukomeledwa pachitela ali jwamtembeleledwe.” Myoyo Klistu ŵatusumile m’weji+ soni ŵatugopwele+ ku matembelelo ga m’Chilamusi gelega mwakuŵa jwalakwejo jwamtembeleledwe mmalo mwa m’weji.+
14 Yeleyi yili myoyo ni chakulinga chakuti mitundu ja ŵandu jipochele upile wele Mlungu ŵamsalile Abulahamu kuti chachimpa kupitila mwa Klistu Yesu.+ Myoyo m’weji tuchipochela msimu waŵasasile kuti chachitupa+ ligongo lya chikulupi chetu.
15 Achalongo achimjangu, ngusaka nape chisyasyo chakamulana ni yindu yayikusatendekwa pasikati pa ŵandu. Naga ŵandu atamilikasisye chilanga, atamose chiŵe cha ŵandupe, pangali mundu jwampaka akase chilangacho kapena konjechesyapo maloŵe gane.
16 Sambano yindu yiŵasasile Mlungu kuti chachipeleka ŵayisasile kwa Abulahamu ni mwanache jwakwe.*+ Pakuŵa Malemba gangasala kuti, “kwa ŵanache ŵenu,”* kwambaga ŵandu ŵajinji. Mmalomwakwe gakusati, “kwa mwanache jwenu,”* kwambaga mundu jumo, jwali Klistu.+
17 Nambosoni une nguŵecheta kuti, Chilamusi chachayiche yili yimasile yaka 430+ panyuma pakuti Mlungu atamilikasisye chilanga chila, chilamusichi nganichiŵa chimasisye chilangacho kapena kusokonasya yaŵasasile Mlungu kuti chachitenda.
18 Pakuŵa naga mundu akupochela chipanje ligongo lyakuti akukuya chilamusi, nikuti ngakupochela chipanjecho pakujigalila yindu yaŵasasile Mlungu kuti chachimpa. Nambotu Mlungu mwa umbone wakwe ampele Abulahamu chipanje pakujigalila yindu yaŵamsalile.+
19 Sambano, ana Chilamusi chapelechedwe ligongo chichi? Chapelechedwe kuti ulemwa uwonechele,+ mpaka mwanache* juŵamsasile kuti chachipochela yindujo ali ayiche.+ Chilamusichi chapelechedwe kupitila mwa malayika+ soni kupitila mwa namangoswe.+
20 Sambanotu ngapakusaŵaga namangoswe naga mundu jumope ni jwakupeleka chilanga. Pajatu Mlungu ŵaliji jikape paŵapelekaga chilanga.
21 Ana pelepa nikuti Chilamusi chikusisyana ni yaŵasasile Mlungu kuti chachipeleka? Ngaŵa myoyo. Yikaŵe kuti papelechedwe chilamusi chakupeleka umi, nikuti tukaŵele ŵakulungama ligongo lyakuya chilamusi chelechi.
22 Nambo Malemba galosisye kuti ŵandu wosope ali pasi pa ulemwa, ni chakulinga chakuti yindu yiŵasasile Mlungu kuti chachipeleka kwa ŵandu ŵakulupilila mwa Yesu Klistu yipelechedwe kwa ŵakulupililawo.
23 Nambope chikulupicho mkanichiyiche, chilamusi chaliji mkutulongolela, soni chatuŵisile mu ukapolo. Pandaŵi jelejo, twagambaga kwembecheya chikulupi chele chaliji chili chisigele panandi kuwonechela.+
24 Myoyo Chilamusi chaŵele jwakutulolela* jwetu jwakutulongolela kwa Klistu,+ ni chakulinga chakuti Mlungu chatuwone kuŵa ŵakulungama ligongo lya chikulupi.+
25 Nambo pakuŵa chikulupicho chiyiche sambano,+ ngatukusosekwasoni jwakutulolela.*+
26 Jemanja wosope mli ŵanache ŵa Mlungu+ ligongo lya chikulupi chenu mwa Klistu Yesu.+
27 Pakuŵa jemanja wosope ŵamwabatisidwe mwa Klistu mwawete ndamo sya Klistu.+
28 Myoyo pasikati penu pangali Myuda kapena Mgiliki,+ pangali kapolo kapena mfulu,*+ pangalisoni jwamlume kapena jwamkongwe.+ Pakuŵa jemanja wosope mli ŵakamulana mpela ŵakulijiganya ŵa Klistu Yesu.+
29 Nambosoni, naga jemanja mli ŵa Klistu nikuti mli ŵanache*+ ŵasyesyene ŵa Abulahamu, ŵakwenela kupochela yindu+ yiŵasasile Mlungu kuti chachipeleka.+
Maloŵe Gamwiŵanda
^ Kapena kuti “mwatandite kwenda palitala lyasambano mwakulongoleledwa.”
^ Alole Yakumbesi A5.
^ Ŵane akusati “ŵalweseche.”
^ Mu Chigiliki ŵatiga, “mbeju jenu.”
^ Mu Chigiliki ŵatiga, “mbeju syenu.”
^ Mu Chigiliki ŵatiga, “mbeju jakwe.”
^ Mu Chigiliki ŵatiga, “mbeju.”
^ Kapena kuti “jwakutujiganya.”
^ Kapena kuti “jwakutujiganya.”
^ Ŵane akusati “mlukosyo.”
^ Mu Chigiliki ŵatiga, “mbeju.”
