Chakwawula kwa Agalatiya 2:1-21
2 Kaneko yili yimasile yaka 14, napitesoni ku Yelusalemu pampepe ni Balanaba.+ Paulendowu namjigelesoni Tito.+
2 Napite kweleko ligongo lya yindu yaŵalosisye une Ambuje. Panayiche kweleko namanyisye achalongo achimjetupe ŵakuchimbichika ngani syambone syangulalichila pasikati pa ŵandu ŵamitundu jine. Natesile myoyo kuti manyilile naga masengo gandesile gali gambone kapena iyayi. Naga nganigaŵa gambone nikuti ngamwile masengo pachabe.
3 Atamose yaliji myoyo, Tito+ juŵaliji ni une, nganasosekwa kuwumbala+ atamose kuti jwaliji Mgiliki.
4 Nambo nganiji ŵajitandikasisye achalongo achimjetu ŵane ŵachinyengo. Jemanjaji ŵajinjile mumpingo mwakusyemba+ mpela ŵakusonda kuti asokonasye mtendele+ watwasangalalaga nawo mpela ŵakumkuya ŵa Klistu Yesu, ni chakulinga chakuti atutende kuŵa mpela achikapolo.+
5 Nambo m’weji nganitwapikanila jemanjaji ata panandi,+ ni chakulinga chakuti jemanja mpitilisye kusunga yayili yisyesyene yamwalijiganyisye mu ngani syambone.
6 Nambo pakwamba ya ŵandu ŵakuwoneka mpela ŵakuchimbichikawo,+ ŵali achakulungwakulungwaŵa, jemanjaji ngananjiganya une chindu chilichose chachilendo. Chinga ŵandu ŵeleŵa ŵaliji ŵamtuli pandanda, une yeleyo jwangali nayo masengo, pakuŵa Mlungu jwangalola kawoneche ka kusa.
7 Nambo jemanjaji ŵayiweni kuti une mbochele masengo gakulalichila ngani syambone kwa ŵandu ŵangawumbala,+ mwakulandana ni masengo gaŵapochele Petulo gakulalichila ngani syambone kwa ŵandu ŵawumbale.
8 Pakuŵa jwele juŵampele Petulo machili gakuŵa ndumetume kwa ŵandu ŵawumbale ni juŵambelesoni une machili gakuŵa ndumetume kwa ŵandu ŵamitundu jine.+
9 Achakulungwakulungwaŵa paŵayimanyi ya umbone mtima wekulungwa wanapochele,+ Yakobo,+ Kefa* soni Yohane ŵaŵaliji mpela ŵakulongolela, ŵatukamwile mkono une ni Balanaba.+ Ŵatesile yeleyi pakulosya kuti akwitikana nayo yakuti m’weji tujawule kwa ŵandu ŵamitundu jine nambo jemanjajo ajawule kwa ŵandu ŵawumbale.
10 Jemanjaji ŵatuŵendile kuti tukaliŵalilaga ŵakulaga, soni yeleyi ni yambele ndili mkulingalinga kuyitenda.+
11 Nambope, Kefa*+ paŵayiche ku Antiyokeya,+ une namjamwiche* pameso ni pameso ligongo lyakuti ŵatendaga yindu yakulemwecheka.*
12 Pakuŵa mkanayiche achalume ŵane ŵakutyochela kwa Yakobo,+ jwalakwe ŵalyaga ni ŵandu ŵamitundu jine.+ Nambo paŵayiche achalumeŵa, jwalakwe ŵalesile kutenda yeleyi soni ŵalilekangenye ni jemanjajo ligongo lyakwajogopa ŵawumbalewo.+
13 Ayuda ŵane ŵaŵaliji kweleko ŵatandite kutenda nawo yachinyengoyi, mwamti atamose Balanaba ŵajigaliche ni kutendaga nawosoni yachinyengoyi.
14 Nambo panayiweni kuti wosopewo ngakwenda mwakamulana ni yayili yisyesyene yakwamba ngani syambone,+ namsalile Kefa* pameso pa ŵane wosopewo kuti, “Atamose kuti mmwejo mli Myuda, nambo apano mkutama umi wakulandana ni ŵandu ŵamitundu jine ngaŵaga mpela Ayuda, sambano ligongo chichi mkwakanganichisya ŵandu ŵamitundu jine kuti atendeje yindu mwakuya ndamo ja Chiyuda?”+
15 M’weji twapagwile tuli Ayuda, soni nganituŵa mpela ŵandu ŵamitundu jine ŵakusatenda yakulemwa.
16 Myoyo, tukusamanyilila kuti mundu akusaŵa jwakulungama, ngaŵaga ligongo lyakutenda yayili m’chilamusi nambo ligongo lyakulupilila+ mwa Yesu Klistu basi.+ M’weji twamkulupilile Klistu Yesu ni chakulinga chakuti tuŵe ŵakulungama ligongo lya chikulupi chetu pa Klistujo ngaŵaga ligongo lyakutenda yayili m’chilamusi. Pakuŵa pangali mundu jwakusaŵa jwakulungama ligongo lyakutenda yayili m’chilamusi.+
17 Sambano naga m’weji patukulingalinga kuti tuŵe ŵakulungama ligongo lya Klistu, tukusimanikwasoni kuŵa ŵakulemwa, ana nikuti Klistujo akutulimbikasya kuti tutendeje ulemwa? Iyayi.
18 Sambano naga nguchitaŵasoni chindu chinachigwisisye, nikuti uneji ndili jwakasa malamusi.
19 Pakuŵa nakuyaga chilamusi, chilamusi pecho changopwele kuti ngachikuyaga,+ ni chakulinga chakuti mbe jwaumi kwa Mlungu.
20 Une ŵangomele pachitela pampepe ni Klistu.+ Myoyo umi wangutamawu ngaŵa kuti unejo ni jwangutama ni umi,+ nambo Klistu ni jwakutama ni umi mwa une. Yisyene, umi wangutama nawo apano, ngutama nawo ligongo lyakumkulupilila Mwanache jwa Mlungu,+ jwele juŵanonyele ni kulipeleka msyene ligongo lya une.+
21 Une jwangawukana umbone mtima wekulungwa wa Mlungu,+ ligongo naga mundu akusaŵa jwakulungama ligongo lya chilamusi nikuti chiwa cha Klistu chili changali masengo.+
