Chakwawula kwa Agalatiya 1:1-24
1 Une Paulo, jwanaŵele ndumetume ngaŵaga kutyochela kwa ŵandu kapena kupitila mwa mundu, nambo kupitila mwa Yesu Klistu+ soni Mlungu jwali Atati+ ŵaŵamjimwisye Yesujo ku chiwa,
2 pampepe ni achalongo achimjetu ŵali akuno, tukupeleka moni ku mipingo ja ku Galatiya.
3 Umbone mtima wekulungwa soni mtendele wakutyochela kwa Mlungu Atati ŵetu soni Ambuje Yesu Klistu uŵe ni jemanja.
4 Jwalakwe ŵalipeleche ligongo lya yakulemwa yetu,+ ni chakulinga chakuti atukulupusye ku yakutendekwa ya mundaŵi* jakusakalaji,+ mwakamulana ni yakusasaka Mlungu jwetu jwalisoni Atati ŵetu.+
5 Kwa Mlungujo kuŵe uchimbichimbi mpaka kalakala. Ame.
6 Une ngusimonga kuti jemanja mtyosile mwachitema kwa Mlungu juŵamŵilasile mwa umbone mtima wekulungwa wa Klistu mwamti mkujigalika ni ngani sine syasikuwoneka mpela ngani syambone.+
7 Ngaŵa kuti pana ngani syambone sine, iyayi. Nambo apali ŵandu ŵane ŵakumlambusya jemanja pakusaka kusokonasya+ ngani syambone syakwamba Klistu.
8 Nambope naga jwalijose, chinga m’weji kapena lilayika lyakutyochela kwinani, akwika kwa jemanja ni ngani syambone syakulekangana ni ngani syambone syatwamlalichile m’weji, mundu jwelejo aŵe jwamtembeleledwe.*
9 Mpela yandite pakumsalila, nguwilisyasoni kuti, naga jwalijose akwika kwa jemanja ni ngani syambone syakulekangana ni ngani syambone syamwapochele jemanja, mundu jwelejo aŵe jwamtembeleledwe.
10 Ngangutenda yindu kuti ŵandu anonyeleje, nambo Mlungu. Unetu ngangutenda yindu kuti nasangalasyeje ŵandu. Yikaŵe kuti ngusaka kwasangalasya ŵandu, ngaŵele jwangaŵajilwa kuŵa jwakutumichila jwa Klistu.
11 Ngusaka mmanyilile jemanja achalongo achimjangu kuti ngani syambone syanamlalichile nganisiŵa syakutyochela kwa ŵandu.+
12 Pakuŵa ngani syambonesi nganimbochela kutyochela kwa mundu, soni ngaŵa kuti mundu ŵatesile yakunjiganya, nambo Yesu Klistu ni juŵatendekasisye kuti nasimanyilile.
13 Ngumanyilila kuti jemanja mwapikene yinatendaga panaliji mu Chiyuda,+ yakuti nalagasisye mnope mpingo wa Mlungu soni nasakaga kuwujonanga kwene.+
14 Najawulaga pasogolo mnope mu Chiyuda kwapunda achimjangu ŵakulandana nawo misingu ŵa mtundu wangu, pakuŵa naliji jwakulipeleka mnope pakuya miyambo ja achinangolo ŵangu.+
15 Nambo Mlungu juŵangopwesye mmatumbo mwa mama ŵangu ni kumbilanga kupitila mu umbone mtima wakwe wekulungwa,+ ŵayiweni kuŵa yakuŵajilwa
16 kummanyikasya Mwanache jwakwe kupitila mwa une ni chakulinga chakuti lalichile ngani syambone syakwamba jwalakwe kwa ŵandu ŵamitundu jine.+ Pandaŵijo une nganimbutuchila kwa mundu jwalijose kukumwusya pakwamba ya yeleyi.
17 Nambosoni nganinjawula ku Yelusalemu kwa ŵandu ŵele ŵaŵele ŵandumetume une mkanimbe, nambo napite ku Alebiya, soni kaneko nawujile ku Damasiko.+
18 Kaneko, pali papite yaka yitatu napite ku Yelusalemu+ kuti ngawonegane ni Kefa,*+ mwamti natemi ni jwalakwejo kwa masiku 15.
19 Nambo kweleko nganimbonegana ni ŵandumetume wosope. Nagambile kuwonegana ni Yakobope,+ mlongomjawo Ambuje.
20 Sambano pakwamba ya yindu yangumlembelayi, ngusaka kumsimichisya pameso pa Mlungu kuti ngangulambusya.
21 Panatyosile kweleko najinjilile ku madela ga ku Siliya soni ku Kilikiya.+
22 Nambo nganimba jwakumanyika kwa ŵandu ŵa m’mipingo ja ku Yudeya ŵaŵaliji ŵakamulana ni Klistu.
23 Jemanjaji ŵagambaga kupikana kuti, “Mundu juŵatulagasyaga julatu+ sambano akulalichila ngani syambone syakwamba chikulupi chiŵaliji mkuchijonanga.”+
24 Myoyo jemanjaji ŵatandite kumchimbichisya Mlungu ligongo lya une.
Maloŵe Gamwiŵanda
^ Alole mbali jakuti, Kugopolela kwa Maloŵe.
^ Ŵane akusati “jwamlweseche.”
^ Jwalakweju akusamanyikasoni kuti Petulo.
