Samuyele Jaŵili 5:1-25
5 Pali papite ndaŵi, mbumba syosope sya Ayisalayeli syapite kwa Daudi ku Hebuloni+ ni kuja kumsalila kuti, “M’wetu tuli achalongo achimjenu ŵa myasi jimo.*+
2 Munyumamu Sauli paŵaliji mwenye jwetu, wawojo ni ŵaŵalongolelaga Ayisalayeli ku ngondo,+ soni Yehofa ŵasalile wawojo kuti, ‘Mmwejo chimchasamalila ŵandu ŵangu* Ayisalayeli, soni mmwejo chimchiŵa jwakulongolela jwa Ayisalayeli.’”+
3 Myoyo achakulungwakulungwa wosope ŵa Ayisalayeli ŵayiche kwa mwenye ku Hebuloni, mwamti mwenye Daudi ŵatesile chilanga ni jemanjajo+ pameso pa Yehofa ku Hebuloniko. Kaneko jemanjajo ŵamtasile Daudi mawuta gakumsagula kuti aŵe mwenye jwa Ayisalayeli.+
4 Daudi ŵaliji ni yaka 30 paŵaŵaga mwenye soni ŵalamulile kwa yaka 40.+
5 Ali ku Hebuloni jwalakwe ŵalamulile Ayuda kwa yaka 7 ni myesi 6. Nambosoni ali ku Yelusalemu+ ŵalamulile Ayisalayeli wosope soni Ayuda kwa yaka 33.
6 Sambano mwenyewo yimpepe ni achalume ŵawo ŵakoseche ni kwawula ku Yelusalemu kuti akamenyane ni Ayebusi+ ŵaŵatamaga kweleko. Ayebusiwo ŵaŵechete mwakumnyosya Daudi kuti, “Mmwejo nganimŵa myiche akuno. Naga mkwika, atamose ŵandu ŵangalola soni ŵalemale chachimtopola.” Jemanjaji ŵaganisyaga kuti, ‘Daudi nganaŵa ajinjile mumsinda muno.’+
7 Nambo Daudi ŵawusumwile msinda wakulimbangana wa Siyoni wele apano uli Msinda wa Daudi.+
8 Myoyo pa lisiku lyeleli Daudi ŵaŵechete kuti, “Ŵandu wosope ŵaŵapite kukwagomeka Ayebusi akusosekwa kupitila mungalande ja mesi kuti akawulaje ‘ŵandu ŵalemale soni ŵangalola,’ ligongo jemanjaji ali chindu chakunyalaya kwa Daudi.” Ni ligongo lyakwe pana maloŵe gakuti, “Ŵandu ŵangalola soni ŵalemale ngasajinjila m’nyumba jeleji.”
9 Sambano Daudi ŵatandite kutama mumsinda wakulimbawo mwamti wawupele lina lyakuti Msinda wa Daudi. Kaneko Daudi ŵatandite kutaŵa kusyungulila mumsindawo kutandila ku Liwunjili*+ mpaka mkati mwa msindawo.+
10 Myoyo Daudi jwapitilisye kuŵa jwamachili,+ nambosoni Yehofa Mlungu jwa magulu ga ngondo jwaliji ni jwalakwe.+
11 Sambano Mwenye Hilamu+ jwa ku Tulo jwatumisye ŵamitenga kwa Daudi. Jwalakwe ŵatumisyesoni yitela ya mkungusa,+ ŵandu ŵakamula masengo ga yindu yamatabwa soni ŵandu ŵakusepa maganga gakutaŵila mapupa, mwamti jemanjaji ŵatandite kutaŵa nyumba* ja Daudi.+
12 Daudi ŵamanyilile kuti Yehofa atendekasisye kuti jwalakwe atamilichiche mpela mwenye pasikati pa Ayisalayeli,+ soni kuti jwalakwe awukwesisye umwenye wa Daudi+ ligongo lya ŵandu ŵakwe, Ayisalayeli.+
13 Daudi ŵalombele achakongwe ŵajinji soni ŵakwete achiŵamkwakwe ŵane ŵapambali+ ku Yelusalemu panyuma pakuwuja kutyochela ku Hebuloni, mwamti jwalakwe ŵaŵeleche ŵanache ŵajinji ŵachalume soni ŵachakongwe.+
14 Mena ga ŵanache ŵachalume ŵaŵaŵeleche ali ku Yelusalemu galiji aga: Samuwa, Sobabu, Natani,+ Solomoni,+
15 Ibihali, Elisuwa, Nefegi, Yafiya,
16 Elisama, Eliyada soni Elifeleti.
17 Afilisiti paŵapikene kuti Daudi amŵisile kuŵa mwenye jwa Ayisalayeli,+ Afilisiti wosope ŵayiche kukumsosasosa Daudi.+ Daudi paŵapikene yeleyi ŵapite kuja kuuŵa kumalo gakusawusya kwikako.+
18 Kaneko Afilisitiwo ŵayiche ni kubalalikangana palipose mu Chitiŵi* cha Lefaimu.+
19 Daudi ŵawusisye kwa Yehofa+ kuti, “Ana njawule kukulimbana ni Afilisitiŵa? Ana chakapeleche jemanjaji mmyala mwangu?” Pelepo Yehofa ŵamjanjile Daudijo kuti, “Elo mjawule, pakuŵa une chingapeleche nditu Afilisitiwo mmyala mwenu.”+
20 Myoyo Daudi ŵayiche ku Baala-pelasimu ni ŵawuleje jemanjajo kweleko. Kaneko jwalakwe ŵatite, “Yehofa ŵagwisisye adani* ŵangu+ pameso pangu mpela mugakusatendela mesi pakugwisya lipupa.” Ni ligongo lyakwe jwalakwe ŵagapele maloga lina lyakuti Baala-pelasimu.*+
21 Afilisitiwo ŵajilesile milungu jawo jakusepa kweleko, mwamti Daudi ni achalume ŵakwe ŵajijigele milungujo.
22 Kaneko Afilisiti ŵala ŵayichesoni ni kubalalikangana ku Chitiŵi chosope cha Lefaimu.+
23 Pelepo Daudi ŵawusisye kwa Yehofa, nambo jwalakwe ŵamjanjile Daudijo kuti, “Mkagamba kwichila kwawula, mmalomwakwe mjende mwakwasyungulila ni mkapite kunyuma kwawo. Kaneko mkalimbane ni jemanjaji kusogolo kwa mawukutu ga baka.*
24 Soni pachimchipikana masegwe gampela kuguba kwa asilikali penani pa mawukutu ga bakago chimtende yindu mwachitema, ligongo yichiŵa kuti Yehofa alongolele pasogolo penu kukwawulaga asilikali ŵa Afilisitiwo.”
25 Myoyo Daudi ŵatesile yele Yehofa ŵamlamwile, mwamti ŵawuleje Afilisitiwo+ kutandila ku Geba+ mpaka kuja kwika ku Geseli.+
Maloŵe Gamwiŵanda
^ Mu Chihebeli ŵatiga, “tuli liwupa lyenu soni mnowu wenu.”
^ Mu Chihebeli ŵatiga, “chimchiŵa m’busa jwa ŵandu ŵangu.”
^ Kapena kuti “Milo.” Gelega gali maloŵe ga Chihebeli gagakusagopolela kuti “kugumbasya.”
^ Kapena kuti “nyumba jaumwenye.”
^ Chitiŵi chakusala pelepa chaliji chana malo gekulungwa gafulati.
^ Ŵane akusati “achimmagongo.”
^ Kugopolela kuti “Jwamkulungwa jwa Kugumula.”
^ Gelega gali maloŵe gakutyochela ku Chihebeli. Nambo kawoneche kasyesyene ka mawukutu gelega ngakakumanyika.
