Buku Jaŵili ja Mbili 8:1-18
8 Payamalaga yaka 20, Solomoni ŵaliji ali ataŵile nyumba ja Yehofa soni nyumba jakwe.*
2 Panyuma pakwe Solomonijo ŵajitaŵilesoni misinda jaŵapochele kutyochela kwa Hilamu. Kaneko ŵaŵisile Ayisalayeli kuti atameje m’misinda jelejo.
3 Konjechesya pelepa, Solomoni ŵapite kukuputa ngondo ni ŵandu ŵa mumsinda wa Hamati-soba mwamti ŵawusumwile msindawo.
4 Kaneko jwalakwe ŵataŵile yakulimbisya* msinda wa Tadimoli m’chipululu soni misinda josope jaŵasunjilaga yindu jaŵataŵile ku Hamati.
5 Solomoni ŵawutaŵilesoni mwakulimbangana msinda wa Beti-holoni Jwakulutando soni Beti-holoni Jwakwiŵanda. Misindaji ŵajitaŵile ndenje, kujiŵichila mageti soni yisyano yakuwugulila magetigo.
6 Jwalakwe ŵataŵilesoni msinda wa Baalati, misinda josope jakusunjila yindu ja Solomoni, misinda josope jakusunjila magaleta* soni misinda ja achalume ŵakwela pamahachi. Solomonijo ŵataŵile chilichose chaŵasachile kutaŵa ku Yelusalemu, ku Lebanoni soni ku madela gosope gaŵalamulilaga.
7 Pakwamba ya ŵandu wosope ŵaŵasigele ŵanganaŵa Ayisalayeli, chinga Ahiti, Aamoli, Apelesi, Ahifi soni Ayebusi,
8 yisukulu ya ŵandu ŵeleŵa yayasigalile m’chilambocho yaŵayilesile Ayisalayeli ngayiwulaga, Solomoni ŵayilamwile kuti yimkamulileje masengo mpela achikapolo. Jemanjajo akutendape yeleyo mpaka lelojino.
9 Nambo pangali Myisalayeli jwalijose juŵamŵisile Solomoni kuti akamuleje masengo gakwe mpela kapolo. Mmalomwakwe jwalakwe ŵaŵisile jemanjajo kuŵa asilikali ŵakwe, ŵakwalolela achakulungwa ŵa asilikali, soni achakulungwa ŵakulolela asilikali ŵakwela pa magaleta soni achalume ŵakwela pa mahachi gakwe.
10 Papalisoni achakulungwakulungwa ŵakwana 250 ŵaŵalolelaga nduna sya Mwenye Solomoni. Achakulungwakulungwaŵa ŵaliji mpela achikapitawo ŵakwalolela ŵandu.
11 Nambosoni Solomoni ŵamtyosisye mwanache jwamkongwe jwa Falawo ku Msinda wa Daudi ni kuja kumŵika ku nyumba jaŵamtaŵile. Yeleyi yaliji myoyo ligongo jwalakwejo ŵatite, “Atamose kuti ŵeleŵa ali ŵamkwangu, nambope ngakusosekwa kuti atameje ku nyumba ja Daudi mwenye jwa Ayisalayeli. Pakuŵa malo galigose galiyiche Libokosi lya Chilanga lya Yehofa gakusaŵa geswela.”
12 Sambano Solomoni ŵapelekaga kwa Yehofa mbopesi syakutinisya pamalo gakupelechela mbopesi ga Yehofa gaŵataŵile jwalakwejo. Maloga ŵagataŵile kusogolo kwa chipinda cha pamlango wakwinjilila m’nyumba ja Mlungu.
13 Mwakamulana ni yaŵalamwile Mose, Solomoni ŵapelekaga mbopesi lisiku lililyose nambosoni ŵapelekaga mbopesi sya pa yisangalalo ya Masabata soni pa yisangalalo ya kuwoneka kwa mwesi. Ŵapelekagasoni mbopesi pa yisangalalo yitatu yapadela yayatendekwaga chaka chilichose. Yisangalalo yakwe yili, Chisangalalo cha Mikate* Jangali Yakusasaŵisya, Chisangalalo cha Mawiki, soni Chisangalalo cha Masakasa.*
14 Konjechesya pelepa, jwalakwe ŵalinganyisye yakuti magulu ga ŵakutaga mbopesi gatumichileje mwakamulana ni lilamusi lyaŵampele Daudi babagwe. Jwalakwe ŵalinganyisyesoni yakuti Alefi atendeje masengo gawo. Lisiku lililyose jemanjaji ŵajimbaga nyimbo syakumyamichila Mlungu soni ŵatumichilaga pameso pa ŵakutaga mbopesi. Ŵalinganyisyesoni yakuti alonda ŵapageti ajimeje m’mageti gakulekanganalekangana mwakamulana ni magulu gawo. Solomoni ŵatesile yosopeyi mwakamulana ni yaŵalamwile Daudi, mundu jwa Mlungu jusyesyene.
15 Jemanjajo nganaleka kukuya yaŵalamwile mwenye yakwamba ŵakutaga mbopesi soni Alefi. Nganalekasoni kukuya yiliyose yakwayana ni utumiki wawo kapena yakwayana ni majumba gakusunjila yindu.
16 Masengo gosope ga Solomoni gajesile mwadongosolo kutandila palisiku lyaŵatandite kutaŵa fendeshoni* ja nyumba ja Yehofa mpaka paŵamalisisye kutaŵa nyumbajo. Myoyo nyumba josope ja Yehofa ŵamalisisye kujitaŵa.
17 Pandaŵi jeleji ni paŵapite Solomoni ku msinda wa Esiyoni-geba soni ku msinda wa Eloti m’chilambo cha Edomu. Misinda jeleji jaliji mumbali mwa nyasa.
18 Hilamu ŵamtumichisye jwalakwejo masitima soni ŵandu ŵakumanyilila chenene ya panyasa. Ŵakutumichila ŵa Hilamu ni ŵaŵagalongolelaga masitimago. Jemanjajo ŵalongene pampepe ni ŵakutumichila ŵa Solomoni ku Ofili kukujigala golide jwakusitopa matalente* gakwana 450 ni kwika najo kwa Mwenye Solomoni.
Maloŵe Gamwiŵanda
^ Kapena kuti, “nyumba jaumwenye.”
^ Kapena kuti, “ŵataŵilesoni.”
^ Magaleta gali ngolo syakuwutidwa ni mahachi.
^ Mikate jakala ŵajipanganyaga ni utandi wa tiligu kapena balele.
^ Alole Kugopolela kwa Maloŵe Gane.
^ Ŵane akusati “yilimbilimbi.”
^ Talente jimo jaŵaga jakusitopa makilogalamu 34.2. Alole Yakumbesi B14.
