Buku Jaŵili ja Mbili 7:1-22
7 Sambano Solomoni paŵagambile kumalisya kupopela, moto watulwiche kutyochela kwinani ni kocha mbopesi syakutinisya soni mbopesi sine. Nambosoni uchimbichimbi wa Yehofa wawunichile nyumbajo.
2 Ŵakutaga mbopesi ŵalepele kwinjila m’nyumba ja Yehofa ligongo lyakuti uchimbichimbi wa Yehofa wawunichile nyumba ja Yehofajo.
3 Ayisalayeli wosope ŵaliji mkulola pandaŵi jawayikaga motowo kutyochela kwinani soni pawayiche uchimbichimbi wa Yehofa ni kuwunichila nyumbajo. Kaneko ŵanduwo ŵatindiŵele ni kwinama mpaka ngope syawo pasi ni kumyamichila Yehofa “pakuŵa jwalakwe ali jwambone. Chinonyelo chakwe chakulupichika chichitama mpaka kalakala.”
4 Sambano mwenyewo pampepe ni ŵandu wosopewo ŵapeleche mbopesi pameso pa Yehofa.
5 Mwenye Solomoni ŵapeleche ng’ombe syakwana 22,000 soni ngondolo syakwana 120,000 kuti siŵe mbopesi. Myoyo mwenyewo pampepe ni ŵandu wosopewo ŵawugulile nyumba ja Mlungu jusyesyene.
6 Ŵakutaga mbopesi ŵajimi mmalo gawo gakamulila masengo mpela muŵatendele Alefi ŵaŵajigele yida yakwimbila yakamulichisya masengo pakumjimbila Yehofa. Mwenye Daudi ŵapanganyisye yida yeleyi kuti ayikamulichisyeje masengo pakumyamichila Yehofa pandaŵi jaŵamchimbichisyaga jwalakwe yalumo,* “pakuŵa chinonyelo chakwe chakulupichika chichitama mpaka kalakala.” Ŵakutaga mbopesi ŵaliji mkulisya malipenga mwakwesya mnope kusogolo kwa Alefiwo. Pandaŵiji Ayisalayeli wosope ŵaliji ali ajimijimi.
7 Kaneko Solomoni ŵagaswejesye malo ga pakatikati pa luŵala gagaliji pasogolo pa nyumba ja Yehofajo. Jwalakwe ŵatesile yeleyi kuti pamalopo apelechele mbopesi syakutinisya soni mawuta ga mbopesi syamkamulano. Yaliji myoyo ligongo lyakuti malo gakupelechela mbopesi gakopa gaŵapanganyisye Solomoni galiji gangakwanila kuti apelechele mbopesi syosope syakutinisya, mbopesi syambeju nambosoni mawuta.
8 Pandaŵi jeleji Solomoni ŵatesile Chisangalalo cha Masakasa* kwa masiku 7 pampepe ni Ayisalayeli wosope ŵaŵaliji gulu jekulungwa jakutyochela ku Lebo-hamati* mpaka kuja kwika ku Lusulo lwa Iguputo.
9 Mwambo wakuwugulila malo gakupelechela mbopesiwu watendekwe kwa masiku 7. Soni kwa masiku 7 gane kwatendekwe Chisangalalo cha Masakasa.* Nambo pa lisiku lya 8 ŵatesile msongano wapadela.
10 Kaneko pa lisiku lya 23 lya mwesi wa 7, mwenyewo ŵasalile ŵandu wosope kuti ajawuleje kumangwawo. Ŵanduwo ŵawujilaga kumangwawo ali mkusangalala soni kupikana chenene mumtima ligongo lya yindu yambone yaŵatesile Yehofa kwa jwakutumichila jwakwe Daudi, kwa Solomoni soni kwa ŵandu ŵakwe Ayisalayeli.
11 Sambano Solomoni ŵamalisisye kutaŵa nyumba ja Yehofa soni nyumba ja umwenye. Chindu chilichose chaŵasakaga Solomoni mumtima mwakwe kuti achitende chakwayana ni nyumba ja Yehofa soni nyumba jakwe chakomboleche.
12 Kaneko Yehofa ŵawonechele kwa Solomoni chilo ni kumsalila kuti, “Une mbikene lipopelo lyenu, soni sagwile malo agano kuti gaŵe nyumba jangu jakupelechela mbopesi.
13 Mpaka yitendekwe kuti unejo mbugele kwinani kuti wula jikagwa, soni mpaka nayilamule yitete kuti yijonanje chilambo achino. Nambosoni mpaka yitendekwe kuti ndumisye mlili pasikati pa ŵandu ŵangu.
14 Payitendekwe yeleyi, naga ŵandu ŵangu ŵakumanyika ni lina lyangu akulinandiya ni kupopela kwa une soni kusosasosa une kaneko ni kuleka matala gawo gakusakala, pelepo chinjipikana lipopelo lyawo ndili kwinani. Nambosoni chinjakululuchila yakulemwa yawo ni kuchitendekasya chilambo chawochi kuti chiŵesoni chenene.
15 Sambano chimbikanileje mapopelo gachapelecheje ŵandu pamalo agano soni meso gangu chigaŵeje pa ŵanduwo.
16 Une sambano najisagwile nyumba aji soni najiswejesye kuti lina lyangu liŵeje panyumba jeleji mpaka kalakala. Nambosoni meso ni mtima wangu yichiŵa panyumba jeleji mpaka kalakala.
17 “Sambano mmwejo mjendeje pameso pangu mpela muŵatendele Daudi baba ŵenu. Mtendeje yeleyi mwakukuya yosope yanamlamwile soni mpikanileje malamusi gangu. Naga mkutenda yeleyi,
18 une chinjitamilikasya mpando wenu waumwenye mwakamulana ni chilanga chanatesile kwa Daudi baba ŵenu, chakuti, ‘Ngasipalepela kusimanikwa mundu kutyochela mu msela wenu wakupagwila jwakwalamulila Ayisalayeli.’
19 Nambo naga mmwejo mkuleka kunguya une soni ngamkupikanila malamusi gangu soni yosope yanamsalile kuti mtendeje ni kaneko mkutanda kutumichila milungu jine ni kujitindiŵalilaga,
20 une chinjachuŵa Ayisalayeli m’chilambo changu chanapele jemanjajo. Nambosoni nyumba jangu janajiswejesye ligongo lya lina lyangu chinjijityosya pameso pangu. Ŵandu wosope ŵa m’yilambo yine chachijisekaga* nyumbaji soni kujinyosya.
21 Nambosoni nyumbaji jichiŵa masame soni jichijonasika. Jwalijose juchachipitaga pamalopa chachisimongaga mnope soni chachiŵechetaga kuti, ‘Ligongo chichi Yehofa achitesile yeleyi chilambo chelechi pampepe ni nyumbaji?’
22 Nambo kaneko chachiŵechetaga kuti, ‘Yeleyitu yitendekwe ligongo lyakuti jemanjajo ŵamlesile Yehofa Mlungu jwa achinangolo ŵawo juŵakopwesye m’chilambo cha Iguputo. Nambosoni ligongo lyakuti jemanjaji ajigele milungu jine ni kujitindiŵalilaga soni kujitumichila. Ni ligongo lyakwetu jwalakwejo ayikasisye yipwetesi yosopeyi pa jemanjajo.’”
Maloŵe Gamwiŵanda
^ Komboleka kuti pelepa akwamba Alefi kapena yida yakwimbila.
^ Alole Kugopolela kwa Maloŵe Gane.
^ Kapena kuti, “mlango wa Hamati.”
^ Alole Kugopolela kwa Maloŵe Gane.
^ Mu Chihebeli ŵatiga, “chachijiŵechetelaga mwambi.”
