Buku Jaŵili ja Mbili 5:1-14
5 Myoyo Solomoni ŵamalisisye masengo gosope gaŵasosekwaga kutenda gakwayana ni nyumba ja Yehofa. Kaneko jwalakwe ŵajinjisye m’nyumbamo yindu yaŵayiswejesye Daudi babagwe. Nambosoni jwalakwe ŵajigele silifa, golide, soni yindu yine yosope ni kuyisunga kumalo gakusunjila chipanje pa nyumba ja Mlungu jusyesyene.
2 Pandaŵi jelejo Solomoni ŵasongangenye achakulungwa ŵa Ayisalayeli, ŵakulongolela mbumba wosope, soni ŵakulongolela m’maŵasa gakumanyika ni mena ga achinangolo ŵawo ga Ayisalayeli. Jemanjaji ŵayiche ku Yelusalemu kuti akanyakule Libokosi lya Chilanga lya Yehofa kutyochela mu Msinda wa Daudi, kwakuli ku Siyoni.
3 Achalume wosope ŵa ku Isalayeli ŵasongene pameso pa mwenye kuti atende chisangalalo* chachikusatendekwa m’mwesi wa 7.
4 Myoyo achakulungwa wosope ŵa Ayisalayeli paŵayiche, Alefi ŵanyakwile Libokosi lya Chilangalyo.
5 Jemanjajo ŵanyakwile libokosilyo, chitenti chakusimanilana soni yiwiya* yosope yeswela yayaliji mu chitenticho, ni kwawula nayo ku nyumba ja Mlungu. Ŵakutaga mbopesi pampepe ni Alefi* ni ŵaŵanyakwile yinduyi.
6 Mwenye Solomoni pampepe ni gulu josope ja Ayisalayeli ŵaŵaŵilanjidwe kuti akasimane ni mwenyewo, ŵasongangene pasogolo pa libokosilyo. Jemanjajo ŵawuleje ngondolo soni ng’ombe syejinji ni kusipeleka mbopesi. Ngondolo soni ng’ombesyo syaliji syejinji mnope, mwamti nganakombola kusiŵalanga.
7 Kaneko ŵakutaga mbopesi ŵayiche nalyo Libokosi lya Chilanga lya Yehofa lila ni kuliŵika pamalo pakwe. Ŵaliŵisile m’chipinda cha mkati mnope cha nyumbajo kwakuli ku Malo Geswela Mnope, pasi pa mapapiko ga akelubi ŵala.
8 Myoyo mapapiko getambasukule ga akelubiwo galiji penani pa malo gaŵaŵisile libokosilyo. Pelepo mapapiko ga akelubiwo gasiŵile penani pa libokosilyo pampepe ni ndodo syakunyakulila libokosilyo.
9 Ndodo syakunyakulila libokosilyo syaliji syelewu, mwamti songa syakwe syawonechelaga ku Malo Geswela, kusogolo kwa chipinda cha mkati mnope. Nambo nganisiwonechelaga kusa kwa Malo Geswelago, mwamti yeleyi yipalipe papopo mpaka lelojino.
10 Mu libokosilyo mwapali maganga gaŵilipe gaŵagaŵisile Mose paŵaliji ku Holebe. Ŵagaŵisile magangago mwelemo pandaŵi jaŵatesile Yehofa chilanga ni Ayisalayeli paŵakopokaga m’chilambo cha Iguputo.
11 Sambano ŵakutaga mbopesi ŵakopweche kumalo geswela. Ŵakutaga mbopesi wosope ŵaŵaliji kweleko ŵaliji ali aliswejesye mwangajigalila gulu jawo jaŵaŵisile.
12 Pandaŵiji Alefi wosope ŵaŵaliji ŵakwimba ŵaŵalongoleledwaga ni Asafu, Hemani, Yedutuni soni ŵanache ŵawo ŵachalume pampepe ni achalongo achimjawo ŵaliji ali awete yakuwala yanguwo jambone mnope. Jemanjaji ŵajigele yakwimbila yakusyungulila yakuwoneka mpela mbale soni yakwimbila yangonji yakulekanganalekangana. Jemanjaji ŵajimi mbali jakungopokolyuŵa kwa malo gakupelechela mbopesi pampepe ni ŵakutaga mbopesi ŵakwana 120 ŵaŵajimbaga malipenga.
13 Sambano ŵakulisya malipenga soni ŵakwimba ŵajimbanga mwakamulana chenene pakumchimbichisya soni kumyamichila Yehofa. Pelepo, kulila kwa malipenga, yakwimbila yakusyungulila yakuwoneka mpela mbale, soni yakwimbila yangoji kwatandite kupikanika paŵaliji mkumchimbichisya Yehofa “pakuŵa jwalakwe ali jwambone. Chinonyelo chakwe chakulupichika chichitama mpaka kalakala.” Payatendekwaga yeleyi, liwunde lyagumbele pa nyumba ja Yehofa.
14 Ŵakutaga mbopesiwo ŵalepele kupitilisya kutumichila ligongo lya liwundelyo, pakuŵa uchimbichimbi wa Yehofa wagumbele pa nyumba ja Mlungu jusyesyenejo.
Maloŵe Gamwiŵanda
^ Chelechi chili Chisangalalo cha Masakasa.
^ Ŵane akusati “yisuso.”
^ Kapena kuti, “Ŵakutaga mbopesi ŵa Chilefi.”
