Mbili Jaŵili 4:1-22
4 Kaneko jwalakwe ŵapanganyisye malo gakupelechela mbopesi gakopa.+ Malogo m’chilewu mwakwe galiji makono 20, m’chijipi makono 20, soni kutyochela pasi kwawula mwinani galiji makono 10.
2 Kaneko jwalakwe ŵapanganyisye tanki*+ jakopa. Tankijo jaliji jesyungulile. Kukamwa kwakwe, kutyochela mbali jimo kwawula mbali jine, ulewu wakwe waliji makono 10, soni kutyochela pasi pa tankijo kwawula mwinani jaliji makono msano. Nambosoni papimile ni lukonji kusyungulila tanki josopejo, ukulu wakwe waliji makono 30.*+
3 Chapasi panandi pa ngomo sya tankijo ŵapanganyisye yakusalalisya yakuwoneka mpela mbonda+ kusyungulila mumbali mosope mwa tankijo. Pa lutando lwa mkono umo lulilose paŵaga yakusalalisya 10 kusyungulila tanki josopejo. Yakusalalisyayo yaliji m’misela jiŵili, soni ŵayipanganyichisye kumpepe ni tankijo.
4 Tankijo ŵajitamiche penani pa ng’ombe syagumba syakwana 12.+ Ng’ombe sitatu ŵasilosisye mbali jakumpoto, ng’ombe sine sitatu ŵasilosisye mbali jakungapililolyuŵa, sitatu sine ŵasilosisye mbali jakummwela, soni ng’ombe sitatu sine ŵasilosisye mbali jakungopokolyuŵa. Tankijo jatemi penani pa ng’ombesyo, soni ng’ombe syosope syalosisye chinyuma chawo pasikati pa tankijo.
5 Kukandapala kwa tankijo kwaliji mpela ukulu wa ligasa limo.* Kukamwa kwakwe kwawonekaga mpela kukamwa kwa mpika soni mpela liluŵa. Mu tankijo mwajinjilaga milulo* ja mesi jakwana 3,000.
6 Konjechesya pelepa, jwalakwe ŵapanganyisye mabeseni 10 gakuchapila soni gakugululila yindu yakwayana ni mbopesi syakutinisya.+ Mabeseni msano ŵagaŵisile mbali jakumlyo kwa nyumbajo, soni mabeseni gane msano ŵagaŵisile mbali jakumchiji kwa nyumbajo.+ Nambo mesi ga mu tanki jila ŵagakamulichisyaga masengo ŵakutaga mbopesi pakunaŵa soni pakoga.+
7 Kaneko ŵapanganyisye yakuŵikapo nyali yagolide yakwana 10+ mwakamulana ni upanganye wakwe waŵamsalile.+ Yakuŵikapo nyaliyo ŵayiŵisile m’nyumba ja Mlungu, msano mbali jakumlyo soni msano yineyo mbali jakumchiji.+
8 Ŵapanganyisyesoni matebulo 10 ni kugaŵika m’nyumba ja Mlungu. Matebulo msano ŵagaŵisile mbali jakumlyo soni matebulo ganego ŵagaŵisile mbali jakumchiji.+ Jwalakwe ŵapanganyisyesoni mbale syamsimbo syagolide syakwana 100.
9 Kaneko jwalakwe ŵapanganyisye luŵala+ paŵakamulilaga masengo ŵakutaga mbopesi.+ Ŵapanganyisyesoni luŵala lwekulungwa.+ Nambosoni jwalakwe ŵapanganyisye matanga ga maluŵalago ni kugapakasya kopa.
10 Tanki jila ŵajiŵisile kumlyo mbali jakummwela chakungokopolyuŵa.+
11 Hilamu ŵapanganyisyesoni ndowa, mafosholo soni mbale syamsimbo.+
Myoyo Hilamu ŵamalisisye masengo gaŵamtendelaga Mwenye Solomoni gakupanganya yindu ya panyumba ja Mlungu jusyesyene.+
12 Yindu yakwe yaliji ayi: Yipilala yiŵili+ soni mitwe jakwe jakuwoneka mpela mbale syamsimbo jaŵajiŵisile penani pa yipilala yiŵiliyo. Papalisoni macheni gaŵili gelukanelukane mpela lwawu*+ gaŵagaŵisile penani pa mitwe jiŵili ja yipilala jakuwoneka mpela mbale syamsimbo jajaliji penani pa yipilalayo.
13 Ŵapanganyisyesoni yakusalalisya yakuwoneka mpela yimanga yachisungu* yakwana 400+ yaŵayiŵisile mu macheni gaŵili gala. Pa cheni chilichose ŵaŵisile misela jiŵili ja yakusalalisya yeleyi. Yakusalalisyayo ŵayiŵisile kusyungulila mitwe ja yipilalajo.+
14 Ŵapanganyisyesoni yakunyakulila mabeseni yakwana* 10 soni mabeseni gakwe gakwana 10 gagaŵaga pa yakunyakulilayo.+
15 Papalisoni tanki ja mesi pampepe ni ng’ombe 12 syasyaliji kusi kwakwe.+
16 Papalisoni ndowa, mafosholo, mafoloko+ soni yiwiya* yine. Hilamu-abifi+ ŵampanganyichisye Mwenye Solomoni yindu yosopeyi ni kopa jwakunyesimila kuti yiŵe ya pa nyumba ja Yehofa.
17 Mwenye ŵalamwile kuti yindu yeleyi akayigumbile mu yikomboli mu chigawo* cha Yolodani pasikati pa dela ja Sukoti+ ni Seleda.
18 Myoyo Solomoni ŵapanganyisye yiwiya yejinji mnope, mwamti usito wa kopa jwaŵakamulichisye masengo pakupanganya yiwiyayi nganiwumanyika.+
19 Sambano yindu yosope yaŵapanganyisye Solomoni+ ya m’nyumba ja Mlungu jusyesyene yaliji ayi: Ŵapanganyisye malo gakupelechela mbopesi gagolide,+ matebulo+ gakuŵikapo mikate* jakulosya kwa Mlungu,+
20 soni yakuŵikapo nyali yagolide jwambone mnope pampepe ni nyali syakwe.+ Nyalisyo syamulichilaga chiŵandika ni chipinda chamkati mnope mwakamulana ni mwayasosechelaga.
21 Ŵapanganyisyesoni maluŵa, nyali, soni yakusimila nyali mwakutenda kuŵana. Yosope yeneyi yaliji yagolide jwambone mnope.
22 Ŵapanganyisyesoni yakusimila moto, mbale syamsimbo, makapu, soni yakupalila moto. Yosopeyi yaliji yagolide jwambone mnope. Ŵapanganyisyesoni milango ja nyumbajo, matanga ga ku Malo Geswela Mnope+ soni matanga ga nyumba ja Mlungu.* Yindu yosopeyi yaliji yagolide.+
Maloŵe Gamwiŵanda
^ Kapena kuti “chakusunjila mesi chaŵachipele lina lyakuti Nyasa.”
^ Kapena kuti “waliji makono 30 m’lutumbo mwakwe.”
^ Ligasa limo lyaŵaga masentimita chiŵandika 7.4. Alole Yakumbesi B14.
^ Ŵane akusati “malulo; wulo.” Lulo lumo lwaŵaga malita 22. Alole Yakumbesi B14.
^ Ŵane akusati “ukonde.”
^ Yeleyi yili yisogosi yakola mbele syakuwoneka mpela yimanga.
^ Kapena kuti “tungolo twakunyakulila mabeseni twakwana.”
^ Ŵane akusati “yisuso.”
^ Ŵane akusati “província.”
^ Mikate jakala ŵajipanganyaga ni utandi wa tiligu kapena balele.
^ Pelepa akwamba Malo Geswela.
