Buku Jaŵili ja Mbili 36:1-23
36 Kaneko ŵandu ŵa m’chilambomo ŵamjigele mwanache jwa Yosiya lina lyakwe Yehoyahasi ni kumŵika kuŵa mwenye ku Yelusalemu mmalo mwa babagwe.
2 Yehoyahasi ŵaŵele mwenye ali ni yaka 23, soni ŵalamulile ku Yelusalemu kwa myesi jitatu.
3 Nambope mwenye jwa ku Iguputo ŵamtyosisye jwalakwejo pa ulamusi wakwe ku Yelusalemu, soni ŵachilipikasisye chilambocho matalente* ga silifa gakwana 100 soni talente jimo jagolide.
4 Konjechesya pelepa, mwenye jwa ku Iguputo ŵamŵisile Eliyakimu juŵaliji mkulugwe jwa Yehoyahasi kuti aŵe mwenye jwakulamulila ku Yuda soni ku Yelusalemu. Nambosoni mwenyewo ŵamchenjile lina jwalakwejo ni kuŵa Yehoyakimu. Nambo Mwenye Neko ŵamjigele Yehoyahasi juŵaliji mpwakwe jwa Eliyakimu ni kwawula najo ku Iguputo.
5 Yehoyakimu ŵaŵele mwenye ali ni yaka 25, soni ŵalamulile ku Yelusalemu kwa yaka 11. Jwalakwe ŵapitilisye kutenda yindu yakusakala pameso pa Yehofa Mlungu jwakwe.
6 Kaneko Mwenye Nebukadinesala jwa ku Babulo ŵayiche kukulimbana ni jwalakwejo ni chakulinga chakuti amkamule ni kumtaŵa ni maunyolo gaŵili gachisyano cha kopa, kaneko ni kwawula najo ku Babulo.
7 Nambosoni Nebukadinesala ŵajigele yiwiya yine ya m’nyumba ja Yehofa ni kwawula nayo ku Babulo. Jwalakwe ŵayiŵisile yiwiyayi m’nyumba jakwe jaumwenye ku Babulo.
8 Pakwamba ya mbili jine ja Yehoyakimu, yindu yakusakala yaŵatesile soni yindu yangasangalasya yayasimanikwe mwa jwalakwejo, yalembedwe mu Buku ja Mamwenye ga ku Isalayeli soni ku Yuda. Kaneko mwanache jwakwe lina lyakwe Yehoyakini ŵaŵele mwenye mmalo mwa jwalakwejo.
9 Yehoyakini ŵaŵele mwenye ali ni yaka 18, soni ŵalamulile ku Yelusalemu kwa myesi jitatu ni masiku 10. Jwalakweju ŵapitilisye kutenda yakusakala pameso pa Yehofa.
10 Chakundanda kwa chaka,* Mwenye Nebukadinesala, ŵatumile ŵandu kuti akamjigale Yehoyakini ni kwawula najo ku Babulo pampepe ni yindu ya mtengo wapenani ya m’nyumba ja Yehofa. Nambosoni mwenyewo ŵamŵisile Sedekiya juŵaliji mpwawo jwa babagwe Yehoyakinijo kuti aŵe mwenye jwakulamulila ku Yuda soni ku Yelusalemu.
11 Sedekiya ŵaŵele mwenye ali ni yaka 21, soni ŵalamulile ku Yelusalemu kwa yaka 11.
12 Jwalakwe ŵapitilisye kutenda yakusakala pameso pa Yehofa Mlungu jwakwe. Sedekiya nganalinandiya pameso pa jwakulochesya Yelemiya, juŵatumidwe ni Yehofa kuti amkalamusye jwalakwejo.
13 Jwalakwe ŵamjimuchilesoni Mwenye Nebukadinesala, juŵamlumbilikasisye pameso pa Mlungu. Sedekiya ŵapitilisye kutenda makani* soni kumusya mtima wakwe, mwamti ŵakanile kugalawuchila kwa Yehofa Mlungu jwa Ayisalayeli.
14 Ŵakulolela ŵakutaga mbopesi wosope pampepe ni ŵanduwo, ungakulupichika wawo wakusile mnope soni ŵatendaga yindu yosope yakunyalaya yaŵatendaga ŵandu ŵamitundu jine, mwamti jemanjajo ŵasakesye nyumba ja Yehofa jiŵajiswejesye jwalakwejo ku Yelusalemu.
15 Yehofa Mlungu jwa achinangolo ŵawo ŵapitilisye kwakalamusya jemanjajo mwakuwilisyawilisya kupitila mwa ŵamitenga ŵakwe. Jwalakwe ŵatendaga yeleyi ligongo lyakuti ŵatendelaga chanasa ŵandu ŵakwewo soni malo gakwe gakutama.
16 Nambope jemanjajo ŵaliji mkwanyosya ŵamitenga ŵa Mlungu jusyesyenewo, mwamti nganachimbichisyaga maloŵe gakwe soni ŵanyosyaga ŵakulochesya ŵakwe. Jemanjaji ŵatesile yeleyi mpaka ŵayiche pakuti nganakola chembecheyo chine chilichose chakuti mpaka akulupuche. Kaneko ukali wa Yehofa wagwilile pa jemanjajo.
17 Myoyo Mlungujo ŵatumisye mwenye jwa Akalideya kuti jukalimbane ni jemanjajo, mwamti jwalakwe ŵawuleje ŵachinyamata ni upanga* m’nyumba jawo ja Mlungu. Jwalakwe nganiŵatendela chanasa anyamata kapena asikana, ŵakalambale kapena ŵakulwala. Mlungu ŵampele chilichose mmyala mwakwe.
18 Jwalakwejo ŵajigelesoni yiwiya yosope ya m’nyumba ja Mlungu jusyesyene, kutandila yamwana mpaka yekulungwa pampepe ni chipanje cha m’nyumba ja Yehofa, chipanje cha mwenye, nambosoni chipanje cha nduna syawo. Ŵajigele yindu yosopeyi ni kwawula nayo ku Babulo.
19 Mwenye Nebukadinesala ŵajochile moto nyumba ja Mlungu jusyesyene, soni ŵagumwile lutenje lwa msinda wa Yelusalemu. Ŵajochilesoni moto yakutaŵa yosope yakola yakulichenjela, soni ŵajonasile yindu yosope yayaliji ya mtengo wapenani.
20 Ŵandu wosope ŵanganawulajidwa ni upanga, jwalakwe ŵajigele kuti akaŵe achikapolo ku Babulo, mwamti jemanjajo ŵaŵele ŵakutumichila ŵakwe soni ŵa ŵanache ŵakwe mpaka pandaŵi jawatandaga ulamusi wa Pelesiya.
21 Yaliji myoyo kuti maloŵe ga Yehofa gaŵaŵechete kupitila mwa Yelemiya gakwanilichikwe. Chilambocho chaŵele masame mpaka masabata gosope ganganichipumula gali gakwanile. Masiku gosope gachaŵele chilambocho masame chaŵele chili mkusunga masabata mpaka yaka 70 yili yikwanile.
22 M’chaka chandanda cha ulamusi wa Mwenye Kolesi jwa ku Pelesiya, Yehofa ŵalimbikasisye mtima wa Mwenye Kolesi kuti ajenesye utenga mu ulamusi wakwe wosope. Jwalakwe ŵatesile yeleyi kuti maloŵe gaŵaŵechete Yehofa kupitila mwa Yelemiya gakwanilichikwe. Mwenyewo ŵawulembilesoni utengawo. Utenga wakwe waliji wakuti:
23 “Ayi ni yakuŵecheta Kolesi mwenye jwa ku Pelesiya, ‘Yehofa Mlungu jwakwinani ambele une maulamusi gosope gapachilambo chapasi. Jwalakwejo andumile une kuti ngamtaŵile nyumba jakwe mu Yelusalemu m’chilambo cha Yuda. Jwalijose jwa jemanja jwali m’gulu ja ŵandu ŵakwe, Yehofa Mlungu jwakwe ampe upile jwalakwejo soni amkunde kuti ajawuleje.’”
Maloŵe Gamwiŵanda
^ Talente jimo jaŵaga jakusitopa makilogalamu 34.2. Alole Yakumbesi B14.
^ Komboleka kuti mwaliji mu chawu.
^ Mu Chihebeli ŵatiga, “kumusya lukosi.”
^ Upanga ukusawoneka mpela chipula chekulungwa chakutema kosekose.
