Buku Jaŵili ja Mbili 35:1-27
35 Yosiya ŵatesile chisangalalo cha Pasika ku Yelusalemu pakumchimbichisya Yehofa, mwamti ŵawuleje nyama sya mbopesi sya Pasika palisiku lya 14 lya m’mwesi wandanda.
2 Jwalakwe ŵaŵisile ŵakutaga mbopesi kuti atendeje masengo gawo, soni ŵalimbikasisye jemanjaji kuti atendeje utumiki wawo panyumba ja Yehofa.
3 Kaneko jwalakwe ŵaŵechetene ni Alefi wosope ŵaŵaliji ŵaswela kwa Yehofa soni ŵaŵajiganyaga Ayisalayeli wosope. Ŵasalile jemanjajo kuti, “Mŵiche Libokosi lya Chilanga lyapadela, m’nyumba jaŵataŵile Solomoni mwanache jwa Daudi mwenye jwa Ayisalayeli. Jemanja ngamnyakulagasoni libokosilyo pa makoyo genu. Sambano mumtumichileje Yehofa Mlungu jwenu soni mwatumichileje ŵandu ŵakwe Ayisalayeli.
4 Mlikosechelesye kuti mtande kutumichila pakujigalila maŵasa gakumanyika ni mena ga achinangolo ŵenu, soni mwakamulana ni magulu genu. Mtende yeleyi pakukuya yaŵalembile Daudi mwenye jwa Ayisalayeli soni Solomoni mwanache jwakwe.
5 Mjawule mkajime kumalo geswela m’magulu pakujigalila maŵasa ga achinangolo ŵenu ga mu mbumba ja Lefi. Mkatende yeleyi kuti mwatumichile ŵandu wosope pakujigalila magulu gawo ga maŵasa gakumanyika ni mena ga achinangolo ŵawo.
6 Mkasikite nyama sya mbopesi sya Pasika kaneko mkaliswejesye, ni mwakosechelesye achalongo achimjenu kuti atende mwakamulana ni maloŵe ga Yehofa gaŵaŵechete kupitila mwa Mose.”
7 Yosiya ŵapeleche yilango yakuti ŵapelechele mbopesi sya Pasika ŵandu wosope ŵaŵaliji pelepo. Ŵapeleche ŵanache ŵa ngondolo ŵamkambako soni achitonde ŵamwana ŵa mbusi. Yosope pampepe yaliji yakwana 30,000. Jwalakwe ŵapelechesoni ng’ombe syakwana 3,000. Yilango yosopeyi yaliji yakutyochela pa chipanje cha mwenyewo.
8 Nombe nasyo nduna syakwe syapeleche yindu yawo. Yindu yeleyi yaliji yakuti ŵandu, ŵakutaga mbopesi, soni Alefi ayipeleche kuŵa mbopesi syakupeleka ŵandu mwakusaka kwawo. Hilikiya, Sekaliya soni Yehiyele, ŵaŵaliji ŵakulongolela pa nyumba ja Mlungu jusyesyene, ŵapeleche kwa ŵakutaga mbopesi ngondolo soni mbusi syakwana 2,600 kuti siŵe sya mbopesi sya Pasika. Nambosoni ŵapeleche ng’ombe 300.
9 Konaniya soni achalongo achimjakwe ŵaŵaliji Semaya ni Netanele pampepe ni Hasabiya, Yeiyeli soni Yosabadi, ŵaŵaliji ŵakulongolela ŵa Alefi, ŵapele Alefi ngondolo soni mbusi syakwana 5,000 kuti siŵe mbopesi sya Pasika. Ŵapelesoni jemanjajo ng’ombe syakwana 500.
10 Sambano yakosechela yosope yaliji m’malo mwakwe, mwamti ŵakutaga mbopesi ŵajimi m’malo gawo, soni Alefi ŵajimi mwakamulana ni magulu gawo. Jemanjaji ŵatesile yeleyi mwakamulana ni yaŵalamwile mwenye.
11 Jemanjaji ŵasikite nyama sya mbopesi sya Pasikasyo, kaneko ŵajigele myasi jakwe ni kwapa ŵakutaga mbopesi kuti ajimisileje pamalo gakupelechela mbopesi. Ŵakutaga mbopesi paŵaliji mkumisila myasijo, Alefi ŵaliji ali mkukusa nyamasyo.
12 Kaneko ŵalinganyisye nyama sya mbopesi syakutinisya kuti ŵape ŵanduwo, ŵaŵaliji m’magulu gawo pakujigalila maŵasa gakumanyika ni mena ga achinangolo ŵawo. Jemanjajo ŵapele nyamasyo ni chakulinga chakuti asipeleche mbopesi kwa Yehofa mwakamulana ni yayalembedwe m’buku ja Mose. Ŵatesilesoni myoyo ni ng’ombe sila.
13 Jemanjajo ŵateleche* nyama sya mbopesi sya Pasikasyo pamoto mwakamulana ni mwambo wakwe. Nambo mbopesi syapadela ŵasitelechele m’mipika jekulungwakulungwa soni jamwana nambosoni m’yiwaya. Panyuma pakwe ŵayiche nasyo mwachitemachitema kuŵaliji ŵanduwo.
14 Kaneko jemanjajo ŵalinganyisye nyama syawo sya mbopesi sya Pasika soni sya ŵakutaga mbopesi. Yaliji myoyo ligongo lyakuti ŵakutaga mbopesiwo, ŵali yisukulu ya Aloni, ŵaliji mkupeleka mbopesi syakutinisya soni mawuta mpaka lyuŵa lyakapile. Myoyo Alefiwo ŵalinganyisye nyama syawo sya mbopesi sya Pasika soni sya ŵakutaga mbopesi, ŵali yisukulu ya Aloni.
15 Nambosoni ŵakwimba ŵaŵaliji ŵanache ŵa m’liŵasa lya Asafu, ŵajimi pamalo gawo mwakamulana ni yaŵalamwile Mwenye Daudi, Asafu, Hemani soni Yedutuni juŵalolaga yamsogolo ni kwasalilaga mwenye. Nombe nawo alonda ŵa pa geti ŵaliji ali ajimi m’mageti gakulekanganalekangana. Jemanjajo nganasosekwaga kuleka utumiki wawo ligongo achalongo achimjawo ŵali Alefi, ŵalinganyichisye nyama syawo sya mbopesi sya Pasika.
16 Palisiku lyeleli ŵamalisisye kutenda yindu yosope yaŵalamwile Yehofa pakosechela kutenda chisangalalo cha Pasika soni pakupeleka mbopesi syakutinisya pamalo gakupelechela mbopesi ga Yehofa. Ŵatesile yosopeyi mwakamulana ni yaŵalamwile Mwenye Yosiya.
17 Ayisalayeli wosope ŵaŵaliji pelepo, ŵatesile Chisangalalo cha Pasika pandaŵi jeleji, soni ŵatesile Chisangalalo cha Mikate* Jangali Yakusasaŵisya kwa masiku 7.
18 Chisangalalo cha Pasika mpela chelechi chaliji mkanichitendekweje mu Isalayeli kutyochela m’masiku ga jwakulochesya Samuyele. Nambosoni pangali mwenye jwine jwalijose jwa mu Isalayeli juŵatesile chisangalalo cha Pasika mpela chaŵatesile Yosiya, ŵakutaga mbopesi, Alefi, Ayuda wosope soni Ayisalayeli ŵaŵaliji pelepo, nambosoni ŵandu wosope ŵakutama ku Yelusalemu.
19 Chisangalalo cha Pasika chelechi chatendekwe m’chaka cha 18 cha ulamusi wa Yosiya.
20 Panyuma pa yosope yeneyi, Yosiya ali amalisisye kulinganyasoni nyumba ja Mlungu, Mwenye Neko jwa ku Iguputo ŵayiche kukuputa ngondo ku Kakemisi chiŵandika Lusulo lwa Filate. Kaneko Yosiya ŵapite kukuputana najo.
21 Myoyo Mwenye Neko ŵatumisye ŵamitenga kwa Yosiya kuti akamsalile jwalakwejo maloŵe gakuti, “Wawo mwenye jwa ku Yuda, ligongo chichi ayiche kukulimbana ni une? Une lelo nganiyika kukulimbana ni wawojo nambo mmalomwakwe yiche kukuputa ngondo ni mtundu wine soni Mlungujo asalile kuti ndende chitema. Kuti yindu yajendele chenene akatenda yindu mwakusisyana ni Mlungu jwali ni une, apo iyayi, chagambe kwajonanga.”
22 Nambope Yosiya ŵapitilisyepe kumkuya jwalakwejo, mwamti ŵachenjile yakuwala yakwe kuti akaputane ni jwalakwejo, nganasaka kupikanila maloŵe ga Neko gagatyochele mkamwa mwa Mlungu. Myoyo ŵapite kukuputana ngondo ni jwalakwe kumalo gafulati ga ku Megido.
23 Kaneko ŵakuponya mipamba ŵamsomile Mwenye Yosiya, mwamti mwenyewo ŵasalile ŵakutumichila ŵakwe kuti, “Mundyosye apano, pakuŵa mbulele mnope.”
24 Myoyo ŵakutumichila ŵakwewo ŵamtulwisye jwalakwejo mu ligaleta* lyakwe ni kumkwesya mu ligaleta lyakwe lyaŵili lya ngondo, ni ŵayiche najo ku Yelusalemu. Myoyo jwalakwe ŵawile mwamti ŵamsichile m’malembe mpela muyaŵelele ni achinangolo ŵakwe. Ŵandu wosope ŵa ku Yuda soni ŵa ku Yelusalemu ŵamlilile Yosiya.
25 Kaneko Yelemiya ŵajimbile nyimbo syakumlilila Yosiya, nambosoni achalume wosope ni achakongwe ŵakwimba, akupitilisya kwimba nyimbo syakumlilila Yosiya mpaka lelo. Papelechedwesoni lilamusi lyakuti nyimbo syelesi ŵandu ajimbeje mu Isalayeli, mwamti nyimbo syelesi syalembedwe m’buku ja nyimbo syakwimba pamalilo.
26 Pakwamba ya mbili jine ja Yosiya, soni chinonyelo chakulupichika chaŵalosisye mwakusunga yosope yayalembedwe m’buku ja Chilamusi cha Yehofa,
27 soni yaŵatesile kutandila kundanda mpaka kumbesi, yalembedwe mu Buku ja Mamwenye ga ku Isalayeli soni ga ku Yuda.
Maloŵe Gamwiŵanda
^ Kagopolele kanesoni, “ŵajochiche.”
^ Mikate jakala ŵajipanganyaga ni utandi wa tiligu kapena balele.
^ Ligaleta lili ngolo jakuwutidwa ni mahachi.
