Mbili Jaŵili 34:1-33
34 Yosiya+ ŵaŵele mwenye ali ni yaka 8, soni ŵalamulile ku Yelusalemu kwa yaka 31.+
2 Jwalakwe ŵatesile yambone pameso pa Yehofa soni ŵatesile yaŵatendaga Daudi nangolo jwakwe. Jwalakwe nganagalawuchila kumkono wakwe wamlyo kapena wamchiji.
3 M’chaka cha 8 cha ulamusi wakwe, jwalakwejo ali mnyamata, ŵatandite kumsosasosa Mlungu jwa Daudi nangolo jwakwe.+ Nambosoni m’chaka cha 12, jwalakwe ŵatandite masengo gakuswejesya ku Yuda soni ku Yelusalemu+ mwakonanga malo gakwela,+ njalamila syapadela,* yiwanichisyo yakusepa,+ soni yiwanichisyo yagumba ya chisyano.
4 Konjechesya pelepa, ŵagwisisye malo gakupelechela mbopesi ga Baala pampepe ni malo gakutinichisya mbopesi sya yakununjila gagaliji penani pakwe jwalakwejo ali mkulola. Kaneko mwenyewo ŵakasenyekasenye malo gakutinichisya mbopesigo. Jwalakwe ŵagwisisyesoni njalamila syapadela,* yiwanichisyo yakusepa, soni yiwanichisyo yagumba yachisyano, mwamti yosopeyo ŵayikasenyekasenye. Kaneko ŵayisyajile yinduyo ni kuŵa luwunduwundupe. Pambesi pakwe, ŵajigele luwundulo ni kuja kulumisila pa malembe ga ŵandu ŵaŵapelekaga mbopesi ku yindu yeleyi.+
5 Kaneko jwalakwe ŵatinisye mawupa ga ŵakutaga mbopesi pamalo gawo gakupelechela mbopesi.+ Yeleyi ni yaŵatesile Yosiya pakuswejesya ku Yuda soni ku Yelusalemu.
6 Jwalakwe ŵapitesoni m’misinda ja m’chilambo cha Manase, Efulayimu,+ Simiyoni mpaka kuja kwika ku Nafitali soni mpaka kumalo gakusyungulila misindaji gagajonanjidwe.
7 Kweleko jwalakwe ŵagwisisye malo gakupelechela mbopesi nambosoni ŵagwisisye njalamila syapadela soni yiwanichisyo yakusepa,+ ni ŵayisyajile yosope yeneyo ni kuŵa luwunduwundupe. Jwalakwe ŵagumulenye malo gosope gakutinichisya mbopesi sya yakununjila m’chilambo chosope cha Isalayeli.+ Panyuma pakwe, ŵawujile ku Yelusalemu.
8 M’chaka cha 18 cha ulamusi wakwe, panyuma pakuti jwalakwe achiswejesye chilambocho soni nyumba ja Mlungu, ŵatumile ŵandu kuti akajilinganyesoni nyumba ja Yehofa Mlungu jwakwe.+ Ŵamtumile Safani+ mwanache jwa Asaliya, Maseya jwakulolela msinda, soni Yowa mwanache jwa Yowahasi juŵaliji jwakulemba mbili.
9 Jemanjaji ŵayiche kwa jwamkulungwa jwa ŵakutaga mbopesi lina lyakwe Hilikiya ni kumpa jwalakwejo mbiya syaŵayikaga nasyo ŵandu ku nyumba ja Mlungu. Alefi ŵaŵatumichilaga mpela alonda ŵapageti ni ŵaŵalokotele mbiyasi kutyochela m’chilambo cha Manase, Efulayimu, kumadela gane gosope ga chilambo cha Isalayeli+ nambosoni ku Yuda, ku Benjamini, soni kutyochela kwa ŵandu ŵakutama ku Yelusalemu.
10 Kaneko mbiyasyo ŵasipeleche kwa ŵandu ŵaŵalolelaga masengo ku nyumba ja Yehofa. Panyuma pakwe, ŵandu ŵaŵakamulaga masengo pa nyumba ja Yehofa ŵakamulichisye masengo mbiyasyo pakujilinganyasoni nyumbajo.
11 Myoyo jemanjajo ŵasipeleche mbiyasyo kwa ŵandu ŵalunda lwakupanganya yindu ni makono soni kwa ŵakutaŵa. Ŵapele jemanjajo kuti asumile maganga gakusepa soni matabwa gakulimbisya nyumba, soni kuti asumile migomba ja nyumba syaŵasilesile mamwenye ga ku Yuda kuti sijonasiche.+
12 Achalume ŵaŵakamulaga masengoga ŵagatesile mwakulupichika.+ Pasagulidwe Alefi kuti ŵaloleleje ŵandu ŵaŵakamulaga masengowo. Alefi ŵaŵasagulidwewo ŵaliji Yahati soni Obadiya ŵakutyochela mu liŵasa lya Melali,+ nambosoni Sekaliya soni Mesulamu ŵakutyochela mu liŵasa lya Kohati.+ Nambo Alefi ŵane wosope ŵaŵaliji ŵakombola kwimba nyimbo+
13 ŵalolelaga ŵamasengo wamba* ŵaŵakamulaga masengo gakutumichila ga mtundu wine uliwose. Alefi ŵanesoni ŵaliji alembi, ŵane ŵaliji ŵakulolela yindu yine, soni ŵane ŵaliji alonda ŵapageti.+
14 Pandaŵi jiŵajigalaga mbiya siŵayikaga nasyo ŵandu ku nyumba ja Yehofa,+ jwakutaga mbopesi Hilikiya ŵajisimene buku ja Chilamusi cha Yehofa+ chaŵapeleche kupitila* mwa Mose.+
15 Myoyo Hilikiya ŵamsalile Safani juŵaliji mlembi kuti, “Mbatile buku ja Chilamusi m’nyumba ja Yehofa.” Pelepo Hilikiya ŵampele bukujo Safani.
16 Kaneko Safani ŵajigele bukujo ni kwawula najo kwa mwenye, ni kwasalila kuti, “Ŵakutumichila ŵawo akutenda masengo gosope gaŵapele.
17 Jemanjajo akuswile mbiya syasyaliji m’nyumba ja Yehofa, ni kusipeleka kwa achalume ŵakulolela masengo soni kwa ŵandu ŵakukamula masengoga.”
18 Safani mlembi jula ŵasalilesoni mwenyewo kuti, “Pana buku jambele jwakutaga mbopesi Hilikiya.”+ Kaneko Safanijo ŵatandite kuŵalanga maloŵe ga m’bukujo pameso pa mwenyewo.+
19 Mwenyewo paŵagambile kupikana maloŵe ga m’Chilamusicho, ŵapapwile yakuwala yawo.+
20 Kaneko mwenyewo ŵamlamwile Hilikiya, Ahikamu+ mwanache jwa Safani, Abidoni mwanache jwa Mika, Safani juŵaliji mlembi, soni Asayiya juŵaliji jwakutumichila jwa mwenye kuti,
21 “Mnyakuche ni mkawusye kwa Yehofa yakwamba maloŵe gagali m’buku jajipatikeneji. Mkawusye yeleyi mmalo mwa une soni mmalo mwa ŵandu ŵasigele ku Isalayeli soni ku Yuda. Mtende yeleyi, pakuŵa ukali wakusaka kutugwichisya Yehofa uli wekulungwa mnope, ligongo achinangolo ŵetu nganapikanila maloŵe ga Yehofa mwakukuya yindu yosope yaŵayilembile m’buku jeleji.”+
22 Myoyo Hilikiya, pampepe ni ŵandu ŵane ŵaŵatumile mwenye, ŵapite kwa Hulida juŵaliji jwakulochesya jwamkongwe.+ Hulida ŵaliji ŵamkwakwe ŵa Salumu mwanache jwa Tikifa chisukulu cha Halihasi. Salumuju ŵaliji jwakulolela kwakusunjila yakuwala. Hulidaju ŵatamaga ku Dela Jasambano ja mu msinda wa Yelusalemu, mwamti ŵanduŵa ŵapite kukuŵechetana najo kweleko.+
23 Jwalakwe ŵasalile jemanjajo kuti, “Yehofa Mlungu jwa Isalayeli aŵechete kuti, ‘Mkamsalile mundu jwamtumile jemanja kwa unejo kuti,
24 “Yehofa aŵechete kuti, ‘Une chiyikasye yakusawusya pamalo agano soni pa ŵandu ŵakutama pamalo gelega.+ Chindende yeleyi mwakamulana ni matembelelo* gosope gagalembedwe m’buku+ jaŵalasile pameso pa mwenye jwa ku Yuda.
25 Ligongo lyakuti jemanjaji andesile une+ ni kupelekaga mbopesi syakoposya lyosi kwa milungu jine ni chakulinga chakuti andumbilikasye+ ni masengo gosope ga makono gawo, chinjikusulila ukali wangu pamalo agano, mwamti pangali juchachiwusimisya.’”+
26 Nambo pakwamba ya mwenye jwa ku Yuda jwamtumile jemanja kuti mkawusye kwa Yehofa, mkamsalile jwalakwejo kuti, “Yehofa Mlungu jwa Isalayeli aŵechete kuti, ‘Pakwamba ya maloŵe gampikenego,+
27 ligongo lyakuti mtima wenu wapikanile* soni mwalinandiye pameso pa Mlungu pamwapikene maloŵe gakwe gakwamba malo agano soni gakwamba ŵandu ŵakutama pamalo gelega, nambosoni ligongo lyakuti mwalinandiye pameso pangu soni mwapapwile yakuwala yenu ni kulila pameso pa une, unesoni mbikene kuŵenda kwenu.+ Yeleyi ni yakuŵecheta Yehofa.
28 Ni ligongo lyakwe unejo chinjikunda kuti mmwejo m’we mpela mwayaŵelele ni achinangolo ŵenu ni kumsika m’malembe genu mwamtendele. Meso genu ngasigalola yakusawusya yosope yachinjiyikasya pamalo agano soni pa ŵandu ŵakutama pamalo gelega.’”’”+
Kaneko ŵanduwo ŵapite kukwasalila mwenye yeleyi.
29 Myoyo mwenyewo ŵatumile ŵandu kuti akaŵilanje achakulungwa wosope ŵa ku Yuda soni ŵa ku Yelusalemu.+
30 Kaneko mwenyewo ŵapite ku nyumba ja Yehofa yimpepe ni achalume wosope ŵa ku Yuda, ŵandu wosope ŵaŵatamaga ku Yelusalemu, ŵakutaga mbopesi, soni Alefi. Ŵapite yimpepe ni ŵandu wosope, kutandila jwamkulungwa mpaka mwanache. Jwalakwe jwaŵalasile maloŵe gosope gagaliji m’buku ja chilanga jajasimanikwe m’nyumba ja Yehofa kuti ŵanduwo apikane.+
31 Mwenyewo ŵajimi pamalo gawo ni ŵatesile chilanga*+ pameso pa Yehofa, kuti chachimkuya Yehofajo, ni kupikanilaga yosope yaŵalamwile jwalakwejo, yakwakumbusya soni malamusi gakwe ni mtima wawo wosope soni umi wawo wosope.+ Chachitenda yeleyi mwakukuya maloŵe ga chilanga gagalembedwe m’buku jeleji.+
32 Konjechesya pelepa, mwenyewo ŵalimbikasisye ŵandu wosope ŵaŵaliji pelepo kuti ajitichisye chilangacho. Myoyo ŵandu ŵakutama ku Yelusalemu ŵatesile mwakamulana ni chilanga cha Mlungu, jwali Mlungu jwa achinangolo ŵawo.+
33 Kaneko Yosiya ŵatyosisye yindu yosope yakunyalaya pameso pa Mlungu yayaliji m’madela gosope ga Ayisalayeli.+ Jwalakwe ŵamlimbikasisyesoni mundu jwalijose mu Isalayeli kuti amtumichileje Yehofa Mlungu jwawo. M’masiku gosope ga Yosiya, jemanjaji nganaleka kumkuya Yehofa Mlungu jwa achinangolo ŵawo.
Maloŵe Gamwiŵanda
^ Alole mbali jakuti, Kugopolela kwa Maloŵe.
^ Alole mbali jakuti, Kugopolela kwa Maloŵe.
^ Kapena kuti “ŵakunyakula katundu.”
^ Mu Chihebeli ŵatiga, “kupitila m’makono.”
^ Ŵane akusati “malweso.”
^ Mu Chihebeli ŵatiga, “waliji wakoloŵa.”
^ Kapena kuti “ŵatesile chilanga kanesoni.”
