Buku Jaŵili ja Mbili 33:1-25
33 Manase ŵakwete yaka 12 paŵaŵaga mwenye, mwamti ŵalamulile ku Yelusalemu kwa yaka yakwana 55.
2 Jwalakwe ŵatesile yindu yakunyalaya pameso pa Yehofa mwakukuya yindu yaŵatendaga ŵandu ŵamitundu jine. Mitundu jeleji, Yehofa ŵajitopwele pameso pa Ayisalayeli.
3 Manase ŵataŵilesoni malo gakwela gaŵagajonasile Hesekiya juŵaliji babagwe. Jwalakwe ŵapanganyisyesoni malo gakupelechela mbopesi kwa Baala soni ŵapanganyisye njalamila syapadela.* Nambosoni jwalakwe ŵayitindiŵalilaga yindu yosope yakwinani ni kuyitumichilaga.
4 Manase ŵataŵilesoni malo gakupelechela mbopesi kwa milungu jaunami m’nyumba ja Yehofa. Pakwamba ya nyumba jeleji, Yehofajo ŵaliji ali aŵechete kala kuti, “Lina lyangu lichiŵa mu Yelusalemu mpaka kalakala.”
5 Pa maluŵala gaŵili ga pa nyumba ja Yehofa, jwalakwe ŵataŵilepo malo gakupelechela mbopesi kwa yindu yosope yakwinani.
6 Nambosoni jwalakwe, ŵajochile pamoto* ŵanache ŵakwe ŵachalume ku Chitiŵi cha Mwanache jwa Hinomu. Manase ŵatendagasoni yamasenga, kulondola chisango soni yaukomasi. Nambosoni jwalakwe ŵaŵisile ŵandu ŵakuŵechetana ni misimu soni ŵakusala yamsogolo. Jwalakwe ŵatesile yindu yakunyalaya pameso pa Yehofa mwakupundanganya mnope, mwamti ŵamkuŵesye Mlungujo.
7 Jwalakwe ŵajigele chiwanichisyo chakusepa chaŵapanganyisye ni kuchiŵika m’nyumba ja Mlungu jusyesyene. Pakwamba ya nyumba jeleji, Mlungu ŵaliji ali amsalile kala Daudi soni mwanache jwakwe Solomoni kuti, “Une chinjiŵika lina lyangu kuti litame pa nyumba jeleji soni mu Yelusalemu mpaka kalakala. Malo gelega ni gasagwile une pasikati pa mbumba* syosope sya Isalayeli.
8 Ngasinatyosyasoni* Ayisalayeli m’chilambo chanapele achinangolo ŵawo. Yeleyi yichiŵa myoyo naga jemanjajo chachikuyaga mwakusamala yosope yanalamwile, yayili Chilamusi chosope soni yakulamula yangu yanapele jemanjajo kupitila mwa Mose.”
9 Manase ŵapitilisye kwasokonasya ŵandu ŵa ku Yuda soni ŵa ku Yelusalemu. Yeleyi yatendekasisye kuti jemanjajo atendeje yindu yakusakala mnope kupunda yaŵatendaga ŵandu ŵamitundu jine ŵaŵapyajisile Yehofa pandaŵi jaŵachijigalaga Ayisalayeli chilambocho kuti chiŵe chawo.
10 Yehofa ŵapitilisye kuŵechetana ni Manase soni ŵandu ŵakwe, nambo jemanjajo nganapikanila.
11 Myoyo Yehofa ŵatumisye achakulungwa ŵa asilikali ŵa mwenye jwa ku Asiliya kuti akalimbane ni jemanjajo. Asilikaliwo ŵamkamwile Manase ni yisopo,* soni ŵamtaŵile maunyolo gachisyano cha kopa ni kwawula najo ku Babulo.
12 Paŵaliji mu yipwetesi, jwalakwe ŵamŵendile Yehofa Mlungu jwakwe kuti amtendele chanasa, soni ŵaliji mkulinondiya mnope pameso pa Mlungu jwa achinangolo ŵakwe.
13 Jwalakwe ŵapopelaga kwa Mlungu, mwamti Mlungujo ŵapikene kuchondelela kwakwe soni kuŵenda kwakwe kwakuti amtendele chanasa. Kaneko Mlungujo ŵamwuchisye jwalakwe paumwenye wakwe ku Yelusalemu. Pelepo Manase ŵayimanyi kuti Yehofa ali Mlungu jusyesyene.
14 Panyuma pa yeleyi, jwalakwe ŵataŵile lutenje lwelewu mnope kusa kwa Msinda wa Daudi kumbali ja kungapililolyuŵa kwa Gihoni mu chitiŵi,* mpaka kuja kwika ku geti jakumanyika kuti Geti ja Somba. Jwalakwe ŵapitilisye kutaŵa lutenjelo, mwamti lwasyungulile mpaka kuja kwika ku Ofeli. Konjechesya pelepa, jwalakwe ŵaŵisile achakulungwakulungwa ŵa asilikali m’misinda josope jakola yakulichenjela ja ku Yuda.
15 Kaneko jwalakwe ŵatyosisye milungu jachilendo soni chiwanichisyo chakusepa chachaliji m’nyumba ja Yehofa. Ŵatyosisyesoni malo gosope gakupelechela mbopesi gaŵataŵile petumbi pajaliji nyumba ja Yehofa soni gaŵataŵile ku Yelusalemu. Panyuma pakwe, yosope yeneyi ŵajile kuyijasa kusa kwa msinda.
16 Jwalakwe ŵalinganyisyesoni malo gakupelechela mbopesi ga Yehofa ni kutanda kupeleka mbopesi syamkamulano soni mbopesi syakuyamichila pamalo gelego. Jwalakwe ŵasalilesoni ŵandu ŵa ku Yuda kuti atandile kumtumichila Yehofa Mlungu jwa Ayisalayeli.
17 Nambope ŵanduwo ŵapitilisyagape kupeleka mbopesi pa malo gakwela, nambo mbopesisyo ŵasipelekaga kwa Yehofa Mlungu jwawo.
18 Pakwamba ya mbili jine ja Manase, lipopelo lyaŵapeleche kwa Mlungu jwakwe, soni maloŵe ga ŵakulola yamsogolo gaŵamsalile jwalakwe mu lina lya Yehofa Mlungu jwa Ayisalayeli, ŵayilembile mu mbili ja Mamwenye ga Ayisalayeli.
19 Konjechesya pelepa, pakwamba ya lipopelo lyakwe soni yaŵatesile Mlungu pakwanga kuchondelela kwakwe ŵayilembile m’buku ja achalume ŵakwe ŵaŵalolaga yamsogolo. Mwelemo ŵalembilesoni yosope yaŵatesile mkanaŵe kulinandiya, mpela yakulemwa yakwe yosope, yindu yangakulupichika yaŵatesile, mosope muŵalinganyisye malo gakwela, kuŵajimiche njalamila syapadela* soni kuŵajimiche yiwanichisyo yakusepa.
20 Kaneko Manase ŵawile mpela muyaŵelele ni achinangolo ŵakwe, mwamti ŵandu ŵamsichile jwalakwejo m’malembe ku nyumba jakwe. Panyuma pakwe, mwanache jwakwe Amoni, ŵaŵele mwenye mmalo mwa jwalakwejo.
21 Amoni ŵaŵele mwenye ali ni yaka 22, soni ŵalamulile ku Yelusalemu kwa yaka yiŵili.
22 Jwalakwe ŵapitilisye kutenda yindu yakusakala pameso pa Yehofa mpela muŵatendele Manase ŵaŵaliji babagwe. Amoni ŵapelekaga mbopesi kwa yiwanichisyo yakusepa yaŵapanganyisye Manase babagwe, soni ŵapitilisye kuyitumichila yiwanichisyoyi.
23 Nambo jwalakwe nganalinandiya pameso pa Yehofa mpela muŵatendele pakulinandiya Manase babagwe. Mmalomwakwe Amoni ŵapitilisye kutenda yakusakala yejinji.
24 Pambesi pakwe, ŵakutumichila ŵakwe ŵamtendele chiwembu jwalakwe, mwamti ŵamwuleje ali m’nyumba mwakwe.
25 Nambo ŵandu ŵa m’chilambomo ŵawuleje ŵandu wosope ŵaŵamtendele chiwembu Mwenye Amoni. Kaneko ŵanduwo ŵamŵisile mwanache jwakwe lina lyakwe Yosiya kuti aŵe mwenye mmalo mwa jwalakwejo.
Maloŵe Gamwiŵanda
^ Alole Kugopolela kwa Maloŵe Gane.
^ Mu Chihebeli ŵatiga, “ŵapitisye pamoto.”
^ Alole Kugopolela kwa Maloŵe Gane.
^ Mu Chihebeli ŵatiga, “Ngasindyosyasoni sajo sya.”
^ Kagopolele kanesoni, “ŵamkamwile Manase ali mkuuŵa mwisimbo.”
^ Chitiŵi chakusala pelepa chaliji chana lusulo.
^ Alole Kugopolela kwa Maloŵe Gane.
