Buku Jaŵili ja Mbili 31:1-21
31 Ayisalayeli paŵagambile kumalisya chisangalalochi, wosope ŵaŵasongene kweleko ŵajesile m’misinda josope ja ku Yuda ni kugumulanyaga yipilala yapadela soni kugwisya njalamila syapadela.* Ŵajonangagasoni malo gakwela nambosoni malo gakupelechela mbopesi. Ŵapitilisye kutenda yeleyi mpaka paŵamalisisye masengo gakonangaga. Ŵatesile yeleyi kusyungulila chilambo chosope cha Yuda soni chilambo cha Benjamini, mpaka kuja kwika ku chilambo cha Efulayimu soni cha Manase. Pambesi pakwe, Ayisalayeli wosope ŵawujile m’misinda jawo, jwalijose kumalo gakwe gaŵapochele mpela chipanje chakwe.
2 Kaneko Hesekiya ŵaŵisile ŵakutaga mbopesi soni Alefi m’magulu gawo, ni chakulinga chakuti atendeje utumiki wawo. Jemanjajo ŵapelekaga mbopesi syakutinisya soni mbopesi syamkamulano. Ŵatumichilagasoni m’mageti gakulekanganalekangana ga m’maluŵala kusyungulila ku nyumba ja Yehofa. Nambosoni kweleko ŵamyamichilaga Mlungu soni kumchimbichisya mwakwimba nyimbo.
3 Yindu yine kutyochela pa chipanje cha mwenye, ŵayipelekaga kuti yiŵe mbopesi syakutinisya. Ŵapelekaga yinduyo kuti yiŵe mbopesi syakutinisya syakundaŵi soni syaligulo, mbopesi syakutinisya sya pa yisangalalo ya Masabata, pa yisangalalo ya kuwoneka kwa mwesi, soni pa yisangalalo yapachaka, mwakamulana ni yayalembedwe mu Chilamusi cha Yehofa.
4 Konjechesya pelepa, jwalakwe ŵalamwile ŵandu ŵa ku Yelusalemu kuti apelecheje yindu yakuŵajilwa kupochela ŵakutaga mbopesi soni Alefi, ni chakulinga chakuti jemanjaji akuyeje mwakusamala* malamusi ga Yehofa.
5 Paŵagambile kulamula yeleyi, Ayisalayeli ŵayiche ni tiligu jwamjinji, finyo jwasambano jwamjinji, mawuta gejinji, yindu yakulyolyopela* yejinji nambosoni yindu yine yejinji yaŵatyosisye m’migunda jawo. Yosopeyi yaliji yakutyochela pa yindu yawo yandanda kukomala soni yambone mnope. Ŵayichesoni ni yalikumi yejinji kutyochela pa yindu yiliyose yaŵakwete.
6 Nombenawo ŵandu ŵa ku Isalayeli soni ŵa ku Yuda ŵaŵatamaga m’misinda ja ku Yuda, ŵayiche ni yalikumi yawo. Yalikumi yeleyi yaliji yakutyochela pa ng’ombe syawo, ngondolo syawo, soni pa yindu yawo yeswela yaŵayiswejesye kuti yiŵe ya Yehofa Mlungu jwawo. Myoyo jemanjajo ŵasongangenye pampepe yindu yejinji.
7 M’mwesi watatu, jemanjajo ŵatandite kuyiŵika pampepe yindu yosope yaŵayiche nayo ŵandu, mwamti m’mwesi wa 7 ni paŵamalisisye masengoga.
8 Hesekiya ni nduna syakwe paŵayiche ni kuyiwona yindu yejinji yaŵapeleche ŵandu, jemanjajo ŵamchimbichisye mnope Yehofa, soni ŵamŵendile Mlungu kuti ŵape upile ŵandu ŵakwe Ayisalayeli.
9 Hesekiya ŵawusisye ŵakutaga mbopesi soni Alefi kuti amanyilile ligongo lyakwe yakupelekayo yatupile mnope.
10 Pelepo Asaliya, juŵaliji jwakulolela ŵakutaga mbopesi jwa mu liŵasa lya Sadoki, ŵamjanjile jwalakwejo kuti, “Kutandila pandaŵi jaŵele ŵandu ali mkwika nayo yakupeleka ku nyumba ja Yehofa, ŵanduŵa aŵele ali mkulya ni kwikuta nambo yine ni kusigalaga yejinji. Yeleyi yili myoyo pakuŵa Yehofa ŵapele upile ŵandu ŵakwe, mwamti yindu yosope yakuyiwonayi yili yakusigala.”
11 Pelepo Hesekiya ŵasalile jemanjajo kuti alinganye yipinda yakusunjila yindu* m’nyumba ja Yehofajo. Myoyo jemanjajo ŵalinganyisye yipindayo.
12 Jemanjajo ŵapitilisye kwika nayo yakupeleka mwakulupichika, yalikumi nambosoni yindu yine yeswela. Konaniya juŵaliji Mlefi, ŵamŵisile kuŵa jwamkulungwa jwakulolela yindu yosope yeneyi, soni Simeyi juŵaliji mlongo mjakwe ŵaliji jwaŵili jwakwe.
13 Ŵandu ŵaŵamkamuchisyaga Konaniya soni Simeyi pamasengoga ŵaliji Yehiyele, Asasiya, Nahati, Asaheli, Yelimoti, Yosabadi, Eliyele, Isimakiya, Mahati, ni Benaya. Jemanjaji ŵatendaga masengoga mwakamulana ni yaŵalamwile Mwenye Hesekiya. Nambosoni Asaliya ni juŵakwete udindo wakulolela nyumba josope ja Mlungu jusyesyene.
14 Kole mwanache jwa Imuna juŵaliji Mlefi juŵalondelaga pageti ja kungopokolyuŵa ni juŵalolega yindu yaŵapelekaga ŵandu mwakusaka kwawo kwa Mlungu jusyesyene. Jwalakweju ŵagaŵanyaga kwa ŵakutaga mbopesi yindu yaŵapelekaga ŵandu kwa Yehofa soni yindu yeswela mnope.
15 Ŵandu ŵaŵaliji pasi pa Kole ŵaliji Edeni, Miniamini, Yesuwa, Semaya, Amaliya, soni Sekaniya. Jemanjaji ŵamkamuchisyaga jwalakwejo pamasengoga m’misinda ja ŵakutaga mbopesi, mwamti ŵapele masengoga ligongo lya kudalilichika kwawo. Jemanjaji ŵagaŵanyaga yindu mwakulandana m’magulu ga achalongo achimjawo pangajigalila kuti aju ali jwamkulungwa kapena jwamnandi.
16 Yindu yaŵagaŵilagayi yaliji yakonjechesya pa yindu yaŵamgaŵilaga jwamlume jwalijose jwakutandila yaka yitatu kwawulaga msogolo, ŵaŵalembedwe mena gawo pakujigalila msela wa achinangolo ŵawo. Achalume ŵeleŵa ŵayikaga kukutumichila ku nyumba ja Yehofa lisiku lililyose soni kukukamula masengo mwakamulana ni magulu gawo.
17 Msela wa ŵakutaga mbopesi ŵawulembile pakujigalila maŵasa gakumanyika ni mena ga achinangolo ŵawo soni pakujigalila magulu gawo. Yeleyi ni yaŵatendagasoni pakwalemba Alefi ŵakutandila yaka 20 kwawulaga msogolo.
18 Pakwalemba jemanjaji mumsela wawo, ŵapwatikagasoni ŵanache ŵawo wosope, chinga ŵachalume kapena ŵachakongwe, achiŵamkwawo nambosoni ŵachibale ŵawo wosope. Yeleyi yaliji myoyo ligongo lyakuti Alefiwo ndaŵi syosope ŵasosekwaga kuŵa ŵaswela, pakuŵa ŵapele utumiki wapadela ligongo lya kudalilichika kwawo.
19 Yisukulu ya Aloni, ŵaŵaliji ŵakutaga mbopesi ŵaŵatamaga m’malo gakulichisya yilango kusyungulila m’misinda jawo, nombenawo ŵalembile mena gawo mpela muŵatendele ni ŵane wosope. M’misinda josope, ŵasagwile mena ga achalume ŵakuti agaŵeje yindu kwa jwamlume jwalijose pasikati pa ŵakutaga mbopesi. Achalume ŵeleŵa ŵagaŵagasoni yindu kwa mundu jwalijose juŵamlembile lina lyakwe mumsela wa Alefi.
20 Hesekiya ŵatesile yindu yeleyi m’chilambo chosope cha Yuda. Jwalakwe ŵapitilisye kutenda yindu yambone soni yakuŵajilwa pameso pa Yehofa Mlungu jwakwe, nambosoni ŵaliji jwakulupichika kwa jwalakwejo.
21 Konjechesya pelepa, yiliyose yaŵatendaga pakumsosasosa Mlungu jwakwe, chinga yili yakwayana ni utumiki wa ku nyumba ja Mlungu jusyesyene, kapena yakwayana ni kupikanila Chilamusi kapenasoni yaŵalamwile Mlungu, jwalakwe ŵayitendega yindu yosope yeneyo ni mtima wakwe wosope, mwamti chilichose chamjendelaga chenene.
Maloŵe Gamwiŵanda
^ Alole Kugopolela kwa Maloŵe Gane.
^ Kapena kuti, “alipelecheje mnope pakuya.”
^ Yikuwoneka kuti pelepa akwamba mesi gakutyochela ku yisogosi.
^ Kapena kuti, “yipinda yakulila.”
