Buku Jaŵili ja Mbili 30:1-27
-
Hesekiya akutenda Chisangalalo cha Pasika (1-27)
30 Hesekiya ŵatumisye maloŵe kwa ŵandu wosope ŵa ku Isalayeli soni ŵa ku Yuda kuti ayiche ku nyumba ja Yehofa ku Yelusalemu, kukutenda chisangalalo cha Pasika pakumchimbichisya Yehofa Mlungu jwa Ayisalayeli. Jwalakwe ŵayikene pakulemba yikalata yakwaŵilanga ŵandu ŵa mu mbumba* ja Efulayimu, soni ŵa mu mbumba ja Manase.
2 Nambope mwenye ni nduna syakwe pampepe ni ŵandu wosope ŵa ku Yelusalemu, ŵaganisisye yakutenda chisangalalo cha Pasikachi m’mwesi waŵili.
3 Yaliji myoyo ligongo lyakuti jemanjaji ŵalepele kutenda chisangalalochi pandaŵi jakwe jakuŵajilwa, paligongo lyakuti paliji ŵakutaga mbopesi ŵangakwanila ŵaŵaliswejesye, soni ŵandu nganasongana ku Yelusalemu.
4 Mwenye soni ŵandu wosope ŵayiweni kuti yaŵalinganyisyeyi yili yakuŵajilwa.
5 Myoyo, ŵaganisisye yakuti ajenesye mu Isalayeli mosope, kutandila ku Beele-seba mpaka ku Dani, kuti ŵandu ayiche ku Yelusalemu kukutenda chisangalalo cha Pasika pakumchimbichisya Yehofa Mlungu jwa Ayisalayeli. Yaliji myoyo ligongo lyakuti jemanjajo nganasonganaga pampepe kuti atende chisangalalo cha Pasika mpela muyalembedwele mu Chilamusi.
6 Myoyo mwakamulana ni yaŵalamwile mwenye, ŵamitenga* ŵajesile kusyungulila chilambo chosope cha Isalayeli soni cha Yuda ali ajigele yikalata yakutyochela kwa mwenye soni kwa nduna syakwe. Ŵamitengawo ŵasalaga kuti, “Jemanja ŵandu ŵa ku Isalayeli awujile kwa Yehofa Mlungu jwa Abulahamu, Isaki soni Isalayeli. Atende yeleyi ni chakulinga chakuti jwalakwejo awujile kwa jemanja ŵamwasigele ni kukulupuka mmyala mwa mamwenye ga Asiliya.
7 Akaŵa mpela achinangolo ŵawo soni achalongo achimjawo ŵaŵatendaga yindu mwangakulupichika kwa Yehofa Mlungu jwa achinangolo ŵawo. Paligongo lyeleli, Mlungu ŵayikasisye yipwetesi pa jemanjajo ni chakulinga chakuti wosope ŵakuyiwona soni kupikana yakwamba yeleyi, atende woga mpela mwamkuyiwonela jemanja lelo.
8 Sambano jemanja akaŵa ŵamakani mpela muŵaŵelele achinangolo ŵawo. Alipeleche kwa Yehofa soni ayiche ku nyumba jakwe jajiswejesye mpaka kalakala kuti akamtumichile Yehofa Mlungu jwawo. Atende yeleyi kuti jwalakwejo aleche kwatumbilila jemanja.
9 Pakuŵa naga jemanja mkuwujila kwa Yehofa, jwalakwejo chachatendekasya ŵandu ŵaŵakamwile achalongo achimjenu soni ŵanache ŵenu kuti ŵatendele chanasa jemanjajo, mwamti chachakunda kuti awujile ku chilambo achino. Yeleyi yichiŵa myoyo ligongo Yehofa Mlungu jwenu ali jwambone mtima soni jwachanasa, soni ngasagalawusya ngope jakwe kulola kumbali naga jemanja mkuwujila kwa jwalakwejo.”
10 Myoyo ŵamitenga ŵala, ŵajesile mumsinda uliwose m’chilambo cha Efulayimu soni cha Manase mpaka ŵapite kuja kwika ku Sebuloni. Nambo ŵandu ŵasekaga soni kwanyosya jemanjajo.
11 Nambope ŵandu ŵane ŵa mu mbumba ja Aseli, ja Manase soni ja Sebuloni, ŵalinandiye ni kwika ku Yelusalemu.
12 Mkono wa Mlungu jusyesyene walijisoni ni ŵandu ŵa ku Yuda pakwakamuchisya jemanjajo kuti aŵe ŵakamulana* pakutenda yaŵalamwile mwenye soni nduna syakwe, mwakamulana ni maloŵe ga Yehofa.
13 Sambano m’mwesi waŵili, ŵandu ŵajinji ŵasongene ku Yelusalemu kuti atende Chisangalalo cha Mikate* Jangali Yakusasaŵisya. Papali ŵandu ŵajinji mnope pamsonganowu.
14 Ŵanduwo ŵanyakwiche ni kuja kutyosya malo gosope gakupelechela mbopesi mu Yelusalemu. Ŵatyosisyesoni malo gosope gakutinichisya mbopesi sya yakununjila ni kuja kuyiponya yosopeyi mu Chitiŵi cha Kidiloni.
15 Panyuma pakwe, jemanjajo ŵawuleje nyama ja mbopesi ja Pasika palisiku lya 14 lya m’mwesi waŵiliwo. Ŵakutaga mbopesi soni Alefi paŵayiweni yeleyi ŵatesile sooni, myoyo jemanjajo ŵaliswejesye ni kwika nasyo mbopesi syakutinisya ku nyumba ja Yehofa.
16 Jemanjajo ŵajimi pamalo gawo, pakusajima ndaŵi syosope mwakamulana ni Chilamusi cha Mose mundu jwa Mlungu jusyesyene. Kaneko ŵakutaga mbopesiwo ŵajigele myasi kutyochela mmyala mwa Alefi ni kujimisila pamalo gakupelechela mbopesi.
17 Pamsonganowu papali ŵandu ŵajinji ŵanganaliswejesya. Myoyo Alefi ŵalongolelaga pamasengo gakusikita nyama sya mbopesi ja Pasika sya ŵandu wosope ŵaŵaliji ŵangaswejela, ni chakulinga chakuti ŵaswejesye ŵanduwo pameso pa Yehofa.
18 Ŵandu ŵajinji ŵanganaliswejesyawo ŵaliji ŵakutyochela mnopemnope mu mbumba ja Efulayimu, Manase, Isakala, soni Sebuloni. Nambope jemanjaji ŵalilepe nyama ja mbopesi ja Pasika atamose kuti yaliji yakutindana ni yachasalaga Chilamusi. Nambo Hesekiya ŵapopelele jemanjajo. Ŵatite, “Wawo Yehofa ŵali ŵambone, akamtumbilila
19 mundu jwalijose juŵakosechelesye mtima wakwe kuti amsosesose Mlungu jusyesyene, Yehofa Mlungu jwa achinangolo ŵakwe. Akamtumbilila jwalijose atamose kuti nganaliswejesya mwakamulana ni mwayikusasosechela pa mwambo wakuliswejesya.”
20 Pelepo Yehofa ŵapikene lipopelo lya Hesekiya mwamti ŵakululuchile* ŵanduwo.
21 Myoyo Ayisalayeli ŵaŵaliji ku Yelusalemu ŵatesile Chisangalalo cha Mikate Jangali Yakusasaŵisya. Ŵatesile chisangalalochi kwa masiku 7 ali mkusangalala mnope. Nombe nawo Alefi soni ŵakutaga mbopesi ŵaliji mkwimba nyimbo syakumchimbichisya Yehofa lisiku lililyose, mwamti ŵamjimbilaga Yehofa mwakwesya pakamulichisya masengo yida.
22 Konjechesya pelepa, Hesekiya ŵaŵechete mwakwalimbikasya* Alefi wosope ŵaŵamtumichilaga Yehofa mwalunda. Kwa masiku 7 gachisangalalochi, ŵandu wosopewo ŵaliji mkulya kwineku ali mkupeleka mbopesi syamkamulano, soni ali mkumyamichila Yehofa Mlungu jwa achinangolo ŵawo.
23 Panyuma pamasiku gelega, ŵandu wosope ŵaŵasongenewo ŵaganisisye yakuti apitilisye kutenda chisangalalocho kwa masiku gane 7. Myoyo jemanjajo ŵapitilisye kutenda chisangalalocho kwa masiku gane 7 ali mkusangalala mnope.
24 Mwenye Hesekiya jwa ku Yuda ŵasonjile ng’ombe syamkambako 1,000 soni ngondolo 7,000, kuti ŵandu ŵaŵasongenewo atendele chisangalalo cha Pasika. Nombe nasyo nduna sya mwenye syasonjile ng’ombe syamkambako 1,000 soni ngondolo 10,000, kuti ŵanduwo asikamulichisye masengo. Nambosoni ŵakutaga mbopesi ŵajinji ŵaliji mkuliswejesya.
25 Ŵandu wosope ŵaŵasongene ŵakutyochela ku Yuda, ku Isalayeli, ŵakutaga mbopesi, Alefi, soni ŵandu ŵamitundu jine ŵakutyochela m’chilambo cha Isalayeli soni ŵaŵatamaga ku Yuda, wosopeŵa ŵapitilisye kusangalala.
26 Nambosoni mumsinda wa Yelusalemu ŵandu ŵaliji mkusangalala mnope, pakuŵa yindu mpela yeleyi yaliji mkaniyitendekwe mu Yelusalemu kutandila m’masiku ga Mwenye Solomoni mwanache jwa Daudi, mwenye jwa Ayisalayeli.
27 Pambesi pakwe, ŵakutaga mbopesi ŵa Chilefi ŵajimi ni kwapa upile ŵanduwo. Pelepo Mlungu ŵapikene maloŵe gawo soni lipopelo lyawo lyayiche kwinani kumalo gakwe geswela gakusatama.
Maloŵe Gamwiŵanda
^ Alole Kugopolela kwa Maloŵe Gane.
^ Mu Chihebeli ŵatiga, “ŵakuwutuka.”
^ Mu Chihebeli ŵatiga, “kuti ŵape mtima umo.”
^ Mikate jakala ŵajipanganyaga ni utandi wa tiligu kapena balele.
^ Mu Chihebeli ŵatiga, “ŵaposisye.”
^ Mu Chihebeli ŵatiga, “mwakwayika pamtima.”
