Buku Jaŵili ja Mbili 3:1-17
3 Kaneko Solomoni ŵatandite kutaŵa nyumba ja Yehofa ku Yelusalemu pa Litumbi lya Moliya. Pamalo pelepa ni paŵawonechele Yehofa kwa Daudi babagwe. Daudi ŵalinganyisye yakuti pamaloga chipaŵe nyumba ja Mlungu. Malo gelega galiji malo gakuputila mbeju ga Olinani M’yebusi.
2 Jwalakwe ŵatandite kutaŵa nyumbajo m’mwesi waŵili, palisiku lyaŵili lya mwesiwo, m’chaka chamcheche ali mkulamulila mpela mwenye.
3 Fendeshoni* jaŵataŵile Solomoni ja nyumba ja Mlungu jusyesyene jaliji makono 60 m’chilewu soni makono 20 m’chijipi mwakamulana ni kapime kakala.*
4 Chipinda cha pamlango wakwinjilila m’nyumbajo chaliji makono 20 m’chilewu mwakulandana ni ulewu wa m’chijipi wa nyumbajo,* soni makono 20* kwawulaga mwinani. Mkati mwa chipindacho ŵapakesye golide jwambone mnope.
5 M’mapupa gosope ga mkati mwa nyumba jekulungwa,* jwalakwe ŵachinjile ni matabwa ga janipa. Panyuma pakwe jwalakwe ŵapakesye golide jwambone mnope. Kaneko ŵasalalisye mkati mwa nyumbajo mwakwambula yitela ya kanjesa, soni ŵasalalisye ni yeni.
6 Konjechesya pelepa, jwalakwe ŵasalalisyesoni mapupa ga mkati mwa nyumbajo ni maganga ga mtengo wapenani gakusalala. Golide juŵakamulichisye masengo jwaliji jwakutyochela ku Palafayimu.
7 Mkati mosope mwa nyumbajo ŵapakesye golide, kutandila mbalaŵala syakwe, mafelemu, mapupa ga nyumbajo, soni matanga gakwe. Jwalakwe ŵajambwilesoni yiwulili ya akelubi m’mapupa ga nyumbajo mwakutenda kugoba.
8 Kaneko jwalakwe ŵapanganyisye Chipinda Cheswela Mnope.* M’chilewu mwa chipindachi mwaliji mwakulandana ni m’chijipi mwa nyumba ja Mlungujo. Chipindacho m’chilewu mwakwe mwaliji makono 20 soni m’chijipi mwakwe makono 20. Jwalakwe ŵapakesye mkati mosopemo golide jwambone mnope jwakusitopa matalente* gakwana 600.
9 Golide juŵapakesye misomali jwaliji jwakusitopa masekeli* gakwana 50. Nambosoni yipinda yosope yamwinani ŵayipakesye golide.
10 Kaneko jwalakwe ŵapanganyisye akelubi ŵaŵili ni kwaŵika ku Malo Geswela Mnope.* Nambosoni jwalakwe ŵapakesye akelubiwo golide.
11 Ulewu wa mapapiko ga akelubiwo kuwupwatikanya pampepe waliji makono 20. Lipapiko lya mbali jimo lya mkelubi jwandanda lyagundaga lipupa lya nyumbajo soni ulewu wakwe lyaliji makono msano. Lipapiko lya mbali jine lya mkelubiju lyagundaga lipapiko lya mkelubi mjakwe soni ulewu wakwe lyaliji makono msano.
12 Lipapiko limo lya mkelubi jwinejo lyagundilesoni ku lipupa lya nyumbajo soni ulewu wakwe lyaliji makono msano. Lipapiko lijakwe lya mkelubi jweleju lyagundene ni lipapiko lya mkelubi jwandanda jula soni ulewu wakwe lyaliji makono msano.
13 Ulewu wa mapapiko getambasukule ga akelubi wosopeŵa waliji makono 20. Akelubiwo ŵajimiche pasi, ngope syawo ni kulola ku Malo Geswela.
14 Jwalakwe ŵapanganyisyesoni likatani ni ulusi wabuluwu, ulusi wakwawulila ku uchejewu soni ulusi wechejewu mnope. Likatanili ŵalipanganyisye ni nguwo jambone, soni ŵajambwile akelubi pelepo.
15 Kaneko jwalakwe ŵapanganyisye yipilala yiŵili kuti yiŵe kusogolo kwa nyumbajo. Ulewu wa chipilala chilichose waliji makono 35, soni mtwe wa chipilala chilichose ulewu wakwe waliji makono msano.
16 Ŵapanganyisyesoni yeni mpela mikufu jakuwala m’lukosi ni kuyiŵika penani pa yipilalayo. Kaneko ŵapanganyisye yakusalalisya yakwana 100 yakuwoneka mpela yimanga yachisungu* ni kuyiŵika mu yenimo.
17 Jwalakwe ŵayijimiche yipilala yila kusogolo kwa nyumba ja Mlungu. Chipilala chimo ŵachijimiche kumkono wamlyo* soni chinecho kumkono wamchiji.* Chipilala chakumlyo jwalakwe ŵachipele lina lyakuti Yakini,* soni chipilala chakumchiji ŵachipele lina lyakuti Bowasi.*
Maloŵe Gamwiŵanda
^ Ŵane akusati “Yilimbilimbi.”
^ Mkono umo waŵaga masentimita 44.5. Nambo ŵandu ŵane akusakulupilila kuti maloŵe gakuti “kapime kakala” gakusagopolela kuti mkono umo waŵaga masentimita 51.8. Alole Yakumbesi B14.
^ Kapena kuti, “makono 20 kutyochela mbali jimo ja m’chijipi mwa nyumbajo mpaka kuja kwika mbali jinejo.”
^ Mipukutu jine pelepa jikusati makono 120, nambo mipukutu jine soni Mabaibulo gane gakusati makono 20.
^ Komboleka kuti pelepa akwamba Malo Geswela.
^ Mu Chihebeli ŵatiga, “nyumba.”
^ Talente jimo jaŵaga jakusitopa makilogalamu 34.2. Alole Yakumbesi B14.
^ Sekeli jimo jaŵaga jakusitopa magalamu 11.4. Alole Yakumbesi B14.
^ Mu Chihebeli ŵatiga, “nyumba.”
^ Yeleyi yili yisogosi yakola mbele syakuwoneka mpela yimanga.
^ Kapena kuti, “kummwela.”
^ Kapena kuti, “kumpoto.”
^ Kugopolela kuti “Jwalakwe [Yehofa] Atamilikasye Mwakulimbangana Malo Agano.”
^ Komboleka kuti linali likugopolela kuti “Mu Machili.”
