Buku Jaŵili ja Mbili 28:1-27
28 Ahasi paŵaŵaga mwenye ŵaliji ali ni yaka 20, soni jwalakwe ŵalamulile ku Yelusalemu kwa yaka 16. Jwalakwe nganatenda yindu yambone pameso pa Yehofa. Nganatenda mpela yaŵatesile Daudi nangolo jwakwe.
2 Mmalomwakwe, jwalakwe ŵajesile m’matala ga mamwenye ga ku Isalayeli, mwamti ŵayikene pakugumba yiwanichisyo yachisyano ya Baala.
3 Konjechesya pelepa, jwalakwe ŵajochaga mbopesi kuti sikoposyeje lyosi ku Chitiŵi cha Mwanache jwa Hinomu,* mwamti ŵajochiche ŵanache ŵakwe ŵachalume kweleko. Jwalakwe ŵatesile yeleyi pakukuya ndamo syakunyalaya syaŵatendaga ŵandu ŵamitundu jine jaŵajitopwele Yehofa pameso pa Ayisalayeli.
4 Jwalakwe ŵapitilisyesoni kupeleka mbopesi nambosoni kocha mbopesi kuti sikoposyeje lyosi. Mbopesisyo ŵasipelechelaga m’malo gakwela, m’matumbi, soni pasi pa chitela chilichose chewutalile masamba.
5 Myoyo Yehofa Mlungu jwakwe ŵampeleche jwalakwejo mmyala mwa mwenye jwa ku Siliya, mwamti ŵandu ŵa ku Siliya ŵamgomeche jwalakwejo. Jemanjajo ŵakamwile ŵandu ŵajinji kuti akaŵe achikapolo, ni ŵapite nawo ku Damasiko. Kaneko Mlungu ŵampelechesoni jwalakwejo mmyala mwa mwenye jwa ku Isalayeli, mwamti ŵawuleje ŵandu ŵakwe ŵajinji.
6 Peka mwanache jwa Lemaliya ŵawuleje achalume ŵakwana 120,000 ku Yuda lisiku limo. Achalume wosopeŵa ŵaliji asilikali ŵakulimba mtima. Yeleyi yatendekwe ligongo lyakuti jemanjajo ŵamlesile Yehofa Mlungu jwa achinangolo ŵawo.
7 Msilikali jwine jwa mu mbumba* ja Efulayimu lina lyakwe Sikili, ŵamwuleje Maseya mwanache jwa mwenye, soni ŵamwuleje Asilikamu juŵalolelaga nyumba ja mwenye. Sikili ŵamwulejesoni Elikana juŵaliji jwaŵili kwa mwenye.
8 Konjechesya pelepa, Ayisalayeli ŵakamwile achalongo achimjawo ŵa ku Yuda ŵakwana 200,000 kuti akaŵe achikapolo. Achalongo achimjawo ŵeleŵa ŵaliji achakongwe, ŵanache ŵachalume soni ŵanache ŵachakongwe. Jemanjajo ŵajigele yindu yejinji yaŵayipatile kweleko ni ŵayiche nayo ku Samaliya.
9 Nambo kweleko kwapali jwakulochesya jwine jwa Yehofa lina lyakwe Odedi. Jwalakwejo ŵapite kukusimana ni gulu ja asilikali jajayikaga ku Samaliyako, ni ŵasalile jemanjajo kuti, “Apikane! Yehofa Mlungu jwa achinangolo ŵenutu, ŵapeleche ŵandu ŵa ku Yuda mmyala mwenu ligongo lyakuti jwalakwejo ŵatumbilile jemanjaji. Nambo jemanja mwawuleje achalongo achimjenu mwangasa, mwamti yamtesileyo Mlungu ayiweni.
10 Sambano jemanja mkusakasoni kwatenda ŵandu ŵa ku Yuda soni ku Yelusalemuŵa kuŵa ŵamasengo ŵenu ŵachilume soni ŵachikongwe. Ana jemanja nganimŵasoni ŵakulemwa pameso pa Yehofa Mlungu jwenu?
11 Sambano jemanja mpikane yanguŵecheta, soni mwawuchisye msimangwawo ŵandu ŵamwakamwile kwa achalongo achimjenuŵa, pakuŵa Yehofa amtumbilile mnope jemanja.”
12 Pelepo achakulungwa ŵane ŵa mu mbumba ja Efulayimu ŵasimene ni asilikali ŵaŵayiche kutyochela kungondowo. Achakulungwa ŵakwe ŵaliji Asaliya mwanache jwa Yehohanani, Belekiya mwanache jwa Mesilemoti, Yehisikiya mwanache jwa Salumu, nambosoni Amasa mwanache jwa Hadilayi.
13 Jemanjajo ŵasalile asilikaliwo kuti, “Mkayika nawo akuno ŵandu ŵamwakamwilewo, pakuŵa yeleyi chiyitutendekasye kola magambo pameso pa Yehofa. Yamkusaka kutendayi chiyigambe konjechesya pa yakulemwa yetu soni magambo getu, pakuŵa kulemwa kwetu kuli kala kwekulungwa, soni Mlungu akwatumbilila mnope Ayisalayeli.”
14 Myoyo asilikaliwo ŵapeleche ŵandu ŵaŵakamwile ŵala mmyala mwa ŵakulongolela soni kwa ŵandu wosope ŵaŵasongene pelepo. Ŵapelesoni jemanjajo yindu yaŵapatile kungondoko.
15 Kaneko achalume ŵaŵasagwile mwakwasala mena gawo kuti akawuchisye ŵanduwo, ŵanyakwiche ni kwajigala ŵandu ŵaŵakamwilewo. Jemanjajo ŵajigele yakuwala kutyochela pa yindu yaŵapatile kungondoko ni kwapa ŵandu wosope ŵaŵawete yakuwala yangalondeka* kuti awale. Myoyo jemanjajo ŵawechiche ŵanduwo yakuwala, ŵapele sapato, yakulya soni yakumwa nambosoni mawuta gakupakala. Konjechesya pelepa, ŵandu ŵaŵalepelaga kwenda ŵakwesisye pa abulu, kaneko ŵajigele ŵandu wosopewo ni kwika nawo kwa achalongo achimjawo ku Yeliko, wawuli msinda wa yitela ya kanjesa. Panyuma pakwe achalumewo ŵawujile ku Samaliya.
16 Pandaŵi jelejo Mwenye Ahasi ŵaŵendile kwa mamwenye ga Asiliya kuti gamkamuchisye.
17 Kaneko payichesoni Aedomu ni kwajimuchila ŵandu ŵa ku Yuda, mwamti ŵakamwile ŵandu kuti akaŵe achikapolo.
18 Nombenawo Afilisiti ŵayiche kukujijimuchila misinda ja mudela ja Sefela soni misinda ja mudela ja Negebu m’chilambo cha Yuda, mwamti ŵasumwile msinda wa Beti-semesi, Aijaloni, soni msinda wa Gedeloti. Ŵasumwilesoni msinda wa Soko pampepe ni matawuni gamwanamwana gakuŵandikana ni msindawo,* msinda wa Timuna pampepe ni matawuni gamwanamwana gakuŵandikana ni msindawo, soni msinda wa Gimiso pampepe ni matawuni gamwanamwana gakuŵandikana ni msindawo. Paŵasumwile misindaji ŵatandite kutama kweleko.
19 Yehofa ŵatulwisye ŵandu ŵa ku Yuda ligongo lya Ahasi mwenye jwa Ayisalayeli. Yaliji myoyo ligongo jwalakwe ŵalechelele ŵandu ŵa ku Yuda kuti atendeje ndamo syakusakala, yayatendekasisye kuti aŵe ŵangakulupichika kwa Yehofa.
20 Pambesi pakwe, Mwenye Tigilati-pilinesa jwa ku Asiliya ŵayiche ni kutanda kulimbana ni jwalakwejo, soni ŵayikasisye yipwetesi pa jwalakwejo mmalo mwakumkamuchisya.
21 Ahasi ŵaliji ali ajigele yindu yine ya m’nyumba ja Yehofa, m’nyumba ja mwenye soni m’nyumba sya nduna ni kuyipeleka kwa mwenye jwa ku Asiliya nambo nganiyimkamuchisya ata panandi.
22 Pandaŵi jaŵasimanaga ni yakusawusyayi, Ahasi ŵatesile yindu mwangakulupichika mnope pameso pa Yehofa.
23 Jwalakwe ŵatandite kupeleka mbopesi kwa milungu ja ŵandu ŵa ku Damasiko ŵaŵagomeche jwalakwejo, mwamti jwalakwe ŵapitilisye kuŵecheta kuti, “Ligongo lyakuti milungu ja mamwenye ga ku Siliya jikwakamuchisya jemanjajo, nombe une chimbelecheje mbopesi kwa milungu jelejo kuti jingamuchisye.” Nambo milungujo jatendekasisye kuti jwalakwe soni Ayisalayeli wosope ajonasiche.
24 Konjechesya pelepa, Ahasi ŵajigele yiwiya* ya m’nyumba ja Mlungu jusyesyene, kaneko yiwiyayo ŵayikasenye mapisimapisi. Ŵawugelesoni matanga ga m’nyumba ja Yehofa, soni ŵalipanganyichisye malo gakupelechela mbopesi pakona jilijose mumsinda wa Yelusalemu.
25 Nambosoni m’misinda josope ja ku Yuda, jwalakwe ŵalinganyisye malo gakwela kuti ajocheje mbopesi syakuti sikoposyeje lyosi kwa milungu jaunami. Myoyo jwalakwe ŵamkuŵesye Yehofa Mlungu jwa achinangolo ŵakwe.
26 Pakwamba ya mbili jine ja Ahasi, yosope yaŵatesile pandanda mpaka kumbesi, yalembedwe mu Buku ja Mamwenye ga ku Yuda soni ga ku Isalayeli.
27 Pambesi pakwe, Ahasi ŵawile mpela muyaŵelele ni achinangolo ŵakwe. Kaneko ŵandu ŵamsichile jwalakwejo mu msinda wa Yelusalemu, pakuŵa ŵanduwo nganayika nawo mtembo wakwe kumalo gaŵasikaga mamwenye ga Isalayeli. Panyuma pakwe, mwanache jwakwe lina lyakwe Hesekiya, ŵaŵele mwenye mmalo mwa jwalakwejo.
Maloŵe Gamwiŵanda
^ Alole maloŵe gakuti “Gehena” pambali jakuti Kugopolela kwa Maloŵe Gane.
^ Alole Kugopolela kwa Maloŵe Gane.
^ Mu Chihebeli ŵatiga, “ŵandu wosope ŵaŵaliji makonope.”
^ Kapena kuti, “matawuni gamwanamwana gakusyungulila msindawo.”
^ Ŵane akusati “yisuso.”
