Buku Jaŵili ja Mbili 26:1-23
26 Kaneko ŵandu wosope ŵa ku Yuda ŵamjigele Usiya juŵaliji ni yaka 16 ni kumŵika kuŵa mwenye mmalo mwa Amasiya ŵaŵaliji babagwe.
2 Jwalakwe ŵawutaŵilesoni msinda wa Eloti ni kuwuwuchisya ku Yuda. Yeleyi yatendekwe panyuma pakuti mwenye* ŵala aŵichidwe m’malembe gaŵasichile achinangolo ŵakwe.
3 Usiya paŵaŵaga mwenye ŵaliji ali ni yaka 16, soni ŵalamulile ku Yelusalemu kwa yaka yakwana 52. Mamagwe ŵaliji ŵa ku Yelusalemu peko soni lina lyawo ŵaliji Yekoliya.
4 Jwalakwe ŵapitilisye kutenda yindu yambone pameso pa Yehofa mwakulandana ni yaŵatesile Amasiya ŵaŵaliji babagwe.
5 Usiya ŵapitilisye kumsosasosa Mlungu pandaŵi josope jiŵaliji ni umi Sekaliya. Sekaliyajo ni juŵamjiganyisye jwalakwejo kuti amjogopeje Mlungu jusyesyene. Pandaŵi jaŵamsosagasosaga Yehofa, Mlungu jusyesyenejo ŵatendekasisye kuti yindu yimjendeleje chenene jwalakwejo.
6 Usiya ŵapite kukuputa ngondo ni Afilisiti mwamti ŵagumwile lutenje lwa msinda wa Gati, lutenje lwa msinda wa Yabine soni lutenje lwa msinda wa Asidodi. Kaneko jwalakwe ŵataŵile misinda jine mwakuŵandikana ni msinda wa Asidodi nambosoni mudela jaŵatamaga Afilisiti.
7 Mlungu jusyesyene ŵapitilisye kumkamuchisya jwalakwejo pakwagomeka Afilisiti, ŵandu ŵa ku Alebiya ŵaŵatamaga ku Gulibaala nambosoni pakwagomeka Ameunimu.
8 Aamoni ŵatandite kupeleka msongo kwa Usiya. Pambesi pakwe mbili jakwe jayiche mpaka ku Iguputo, pakuŵa jwalakwe jwaŵele jwamachili mnope.
9 Konjechesya pelepa Usiya jwataŵile sanja mu Yelusalemu mwakuŵandikana ni geti jakolanjidwa kuti Geti ja Pakona, Geti ja Chitiŵi, nambosoni mwakuŵandikana ni Chipilala Chakulimbisya Lipupa. Panyuma pakwe jwalakwe ŵasilimbisye sanjasyo.
10 Kupwatika pelepa, jwalakwe ŵataŵile sanja sine m’chipululu, nambosoni ŵasosile yisima yejinji pakuŵa ŵakwete yilango yejinji mnope. Yeleyi ni yaŵatesilesoni jwalakwe ku Sefela soni kumalo gafulati. Usiya ŵakwete ŵamasengo ŵakulima soni ŵakusamalila migunda ja mipeleya* kumatumbi soni ku Kalimeli, pakuŵa jwalakwe ŵanonyelaga ya ulimi.
11 Konjechesya pelepa, Usiya ŵakwete asilikali ŵakosechela kuputa ngondo pakamulichisya masengo yida. Asilikaliŵa ŵajawulaga kukuputa ngondo mwakamulana ni magulu gawo gaŵaŵisile. Mlembi Yeiyeli pampepe ni Maseya ŵaŵalasile asilikaliŵa soni kwalemba mena gawo ni kwaŵika m’magulugo. Hananiya jumo mwa nduna sya mwenye ni juŵalolelaga ŵandu ŵaŵiliŵa.
12 Achalume wosope ŵaŵalolelaga asilikali ŵamachili ŵa Usiya ŵaliji ŵakwana 2,600. Achalume ŵeleŵa ŵaliji ŵakulongolela m’maŵasa gakumanyika ni mena ga achinangolo ŵawo.
13 Ŵakulongolela ŵeleŵa ŵalolelaga asilikali ŵakosechela kuputa ngondo ŵakwana 307,500. Asilikaliwo ŵaliji ŵamachili soni ŵakwete yida, mwamti ŵaliji ŵakoseka kumkamuchisya mwenye pakulimbana ni adani ŵakwe.
14 Usiya ŵapele asilikali wosope yakuchijila, mapanga, yisoti, yakuwala yakungondo yakola maŵamba gachisyano, maukunje, soni yinawo.*
15 Konjechesya pelepa, jwalakwe ŵakwete machini gakuputila ngondo ku Yelusalemu gaŵapanganyisye ŵandu ŵalunda. Machiniga ŵagaŵikaga pa sanja soni gane m’makona ga lutenje, mwamti ŵakombolaga kuponya mipamba soni maganga gekulungwa pakamulichisya masengo machini gelega. Myoyo mbili ja Usiya japikaniche mnope mwamti jayiche kutali. Yaliji myoyo ligongo lyakuti jwalakwe ŵapochele chikamuchisyo chekulungwa kutyochela kwa Mlungu soni ŵaŵele jwamachili.
16 Nambope, Usiya paŵagambile kuŵa jwamachili, mtima wakwe walikwesisye yayampwetekasisye msyenejo. Jwalakwe ŵatesile yindu mwangakulupichika kwa Yehofa Mlungu jwakwe pakwinjila m’nyumba ja Yehofa kuti akatinisye mbopesi syakununjila pamalo gakupelechela mbopesi sya yakununjila.
17 Ndaŵi jijojo, jwakutaga mbopesi Asaliya pampepe ni ŵakutaga mbopesi ŵane ŵa Yehofa ŵakwana 80 ŵaŵaliji ŵakulimba mtima, ŵamkuyisye jwalakwejo m’nyumbamo.
18 Jemanjajo ŵasimene ni Mwenye Usiya ni kwasalila kuti, “Mwenye Usiya, nganiyiŵa yakuŵajilwa kuti wawojo atinisyeje mbopesi sya yakununjila kwa Yehofa, ŵakutaga mbopesipe ni ŵali ŵakuŵajilwa kutinisya mbopesi syelesi, pakuŵa jemanjaji ali yisukulu ya Aloni yaŵayiswejesye Mlungu kuti yitendeje masengo gelega. Akopoche m’malo geswela gano, pakuŵa atesile yindu mwangakulupichika, soni payatesileyi ngapochela uchimbichimbi uliwose kutyochela kwa Yehofa Mlungu.”
19 Nambo Usiya ŵatumbilile mnope ŵakutaga mbopesiwo ali ajigele mmyala mwakwe chiwaya chakutinichisya mbopesi sya yakununjila. Ali chitumbilile myoyo, ulwele wa matana wakopweche pausyo pakwe. Yeleyi yatendekwe ali pameso pa ŵakutaga mbopesiwo m’nyumba ja Yehofa, mwakuŵandikana ni malo gakutinichisya mbopesi sya yakununjila.
20 Jwakulolela ŵakutaga mbopesi Asaliya pampepe ni ŵakutaga mbopesi wosope paŵamlolite jwalakwejo, ŵayiweni kuti Mlungu ampele chilango* cha matana gagakopweche pausyo pakwe. Myoyo jemanjajo ŵamkopwesye jwalakwejo mwachitemachitema, soni msyenejo ŵawutuchile pasa ligongo Yehofa ŵaliji ali ampele chilango.
21 Mwenye Usiya ŵapitilisye kulwala ulwele wa matana mpaka palisiku lyaŵawile. Ligongo lya ulwelewu, jwalakwe ŵatamaga kunyumba jajaliji kwajika. Yaliji myoyo ligongo lyakuti kutandila pandaŵi jeleji nganakundidwaga kwawula ku nyumba ja Yehofa. Mwanache jwakwe lina lyakwe Yotamu ni juŵalolelaga nyumba ja mwenye, mwamti ŵaliji mkwelusya magambo ga ŵandu ŵa m’chilambomo.
22 Pakwamba mbili jine ja Usiya, yaŵatesile kundanda mpaka pambesi, yalembedwe m’buku ja jwakulochesya Yesaya mwanache jwa Amosi.
23 Pambesi pakwe, Usiya ŵawile mpela mwayaŵelele ni achinangolo ŵakwe. Kaneko ŵandu ŵamsichile jwalakwejo m’malembe kumalo gaŵasichile achinangolo ŵakwe. Nambo Usiya nganamsika m’malembe gaŵasikaga mamwenye pakuŵa ŵanduwo ŵatite, “Alwasileje ulwele wa matana.” Panyuma pakwe Yotamu juŵaliji mwanache jwakwe ŵaŵele mwenye mmalo mwa jwalakwejo.
Maloŵe Gamwiŵanda
^ Pelepa akwamba Amasiya ŵaŵaliji babagwe.
^ Mipeleya jili mtundu winewakwe wa yisogosi yakusayikamulichisya masengo pakupanganya finyo.
^ Yinawo yikusakamula masengo mpela legeni.
^ Ku Mozambique akusati, “chamuko.”
