Mbili Jaŵili 23:1-21
23 M’chaka cha 7,* Yehoyada ŵatesile yindu mwakulimba mtima. Jwalakwe ŵatesile chilanga ni ŵandu ŵaŵalongolelaga magulu ga asilikali 100.+ Ŵakulongolela ŵakwe ŵaliji Asaliya mwanache jwa Yelohamu, Isimayeli mwanache jwa Yehohanani, Asaliya mwanache jwa Obedi, Maseya mwanache jwa Adayiya soni Elisafati mwanache jwa Sikili.
2 Jemanjaji ŵasyungulile mu Yuda mosope ni kwasonganganya pampepe Alefi+ kutyochela m’misinda josope ja mu Yuda. Ŵasongangenyesoni ŵakulongolela m’maŵasa gakumanyika ni mena ga achinangolo ŵawo ga mu Isalayeli. Jemanjaji paŵayiche ku Yelusalemu,
3 ŵandu wosope ŵaŵasongenewo ŵatesile chilanga+ ni mwenye m’nyumba ja Mlungu jusyesyene. Kaneko Yehoyada ŵasalile jemanjajo kuti:
“Alole! Mwanache jwa mwenye aju ni jwakwenela kulamulila, mwakamulana ni yaŵaŵechete Yehofa pakwamba ya ŵanache ŵa Daudi.+
4 Myoyo mkusosekwa kutenda ayi: Mwagaŵe ŵakutaga mbopesi soni Alefi m’magulu gatatu. Magulu gelega gakusosekwa kwika pa lisiku lya Sabata kukamula masengo.+ Gulu jandanda jichisosekwa kwima m’mageti mpela alonda.+
5 Gulu jine jichisosekwa kuŵa alonda ku nyumba ja mwenye,+ soni jinejo jichisosekwa kuŵa pageti jakolanjidwa kuti Geti ja Fendeshoni.* Nambo ŵandu ŵane wosope chachiŵa m’maluŵala ga nyumba ja Yehofa.+
6 Mkakunda mundu jwine jwalijose kwinjila m’nyumba ja Yehofa akaŵe ŵakutaga mbopesi ni Alefi ŵakutumichila pandaŵijo.+ Jemanjajipe ni ŵampaka ajinjile, ligongo ŵasagulidwe kuti atendeje utumiki wapadela. Nambo ŵandu ŵane wosope akusosekwa kukuya yaŵalamwile Yehofa.
7 Alefi chachisosekwa kwasyungulila mwenyewo kumbali jilijose, jwalijose ali ajigele yida yakwe yakuputila ngondo mmyala mwakwe. Mundu jwalijose jwakwinjila kunyumba ja Mlungujo mkusosekwa kumwulaga. Mkusosekwa kuŵa ni mwenyewo kulikose kwachajawuleje.”*
8 Pelepo Alefi pampepe ni Ayuda wosope ŵatesile yosope yaŵalamwile jwakutaga mbopesi Yehoyada. Myoyo jwakulongolela jwalijose ŵajigele asilikali ŵakwe ŵaŵakamulaga masengo pa lisiku lya Sabata pampepe ni asilikali ŵane ŵaŵasosekwaga kupumula pamasengo gawo pa lisiku lya Sabata.+ Yeleyi yaliji myoyo ligongo lyakuti jwakutaga mbopesi Yehoyada nganajigopola gulu jilijose+ jijatumichilaga kuti jikapumule.
9 Kaneko jwakutaga mbopesi Yehoyada ŵapele ŵakulongolela magulu ga asilikali 100 ŵala+ mapanga, yakuchijila yamwanamwana,* soni yakuchijila yakusyungulila yayaliji ya Mwenye Daudi.+ Yida yeleyi yaliji m’nyumba ja Mlungu jusyesyene.+
10 Jwalakwe ŵajimiche ŵandu kutandila mbali josope jakumlyo kwa nyumbajo mpaka mbali jakumchiji kwa nyumbajo, jwalijose ali ajigele chida chakwe chakuputila ngondo mmyala mwakwe. Jemanjaji ŵajimi chiŵandika malo gakupelechela mbopesi soni chiŵandika nyumbajo. Wosope ŵajimi mwakwasyungulila mwenyewo kumbali syosope.
11 Kaneko jemanjajo ŵamkopwesye pasa mwanache jwa mwenye jula+ ni kum’wecha chisoti chaumwenye soni Umboni,*+ ni ŵamŵisile jwalakwe kuŵa mwenye. Kaneko Yehoyada pampepe ni ŵanache ŵakwe ŵamtasile jwalakwejo mawuta gakumtaga mundu pakumsagula kuti aŵe mwenye. Pambesi pakwe jemanjajo ŵatandite kuŵecheta kuti, “Akole umi wawulewu mwenye!”+
12 Ataliya paŵapikene masegwe ga ŵandu ali mkuwutuka kwineku ali mkwachimbichisya mwenye, ndaŵi jijojo ŵayiche ku nyumba ja Yehofa kuŵaliji ŵanduwo.+
13 Kaneko jwalakwe ŵaweni mwenye ali ajimi chiŵandika ni chipilala* pa mlango wa nyumbajo. Ŵakulongolela+ soni achalume ŵagomba malipenga ŵaliji yimpepe ni mwenyewo. Konjechesya pelepa, ŵandu wosope ŵa m’chilambomo ŵaliji mkusangalala+ kwineku ali mkugomba malipenga. Ŵakwimba pakamulichisya masengo yida yakwimbila ni ŵaŵaliji mkwalongolela ŵanduwo pakwimba nyimbo syakwachimbichisya mwenye. Ataliya paŵayiweni yeleyi, ŵapapwile yakuwala yakwe ni kutanda kugumila kuti, “Anjimuchile! Anjimuchile une!”
14 Nambo jwakutaga mbopesi Yehoyada ŵatumisye ŵakulongolela ŵa magulu ga asilikali 100 ŵala, ŵaŵasagwile kuti ŵaloleleje asilikaliwo. Pakwatumisyapo, ŵalamwile jemanjajo kuti, “Amtyosye jwalakwejo pasikati pa asilikali, soni naga pasimanikwe jwine jwakumkuya, amwulaje mundu jwelejo ni upanga.”* Jwakutaga mbopesijo ŵaliji ali ŵasalile jemanjajo kuti, “Mkamwulajila jwalakwejo m’nyumba ja Yehofa.”
15 Myoyo jemanjajo ŵamkamwile jwalakwejo, mwamti paŵayiche najo pa mlango wakwinjilila ku nyumba ja mwenye wakolanjidwa kuti Geti ja Hachi, ndaŵi jijojo ŵamwulajile jwalakwejo papopo.
16 Kaneko Yehoyada ŵatesile chilanga pasikati pa jwalakwejo ni ŵandu wosope soni ni mwenye. Chilanga chakwe chaliji chakuti jemanjajo chapitilisye kuŵa ŵandu ŵa Yehofa.+
17 Panyuma pa yeleyi, ŵandu wosope ŵapite kunyumba ja Baala ni kuja kujigwisya nyumbajo.+ Ŵagumulenyesoni malo gakwe gakupelechela mbopesi pampepe ni yiwanichisyo ya Baalajo.+ Nambosoni ŵamwuleje Mateni jwakutaga mbopesi jwa Baala.+ Jwalakweju ŵamwulajile pasogolo pa malo gakupelechela mbopesigo.
18 Kaneko jwakutaga mbopesi Yehoyada ŵaŵisile ŵakutaga mbopesi soni Alefi kuti aloleleje nyumba ja Yehofa mwakamulana ni magulu gawo. Daudi ni juŵaŵisile jemanjaji m’magulu kuti aloleleje nyumba ja Yehofa ni chakulinga chakuti apelecheje mbopesi syakutinisya kwa Yehofa+ mwakamulana ni yayalembedwe m’Chilamusi cha Mose.+ Daudi ŵalamwile kuti atendeje yeleyi mwakusangalala soni ali mkwimba nyimbo.
19 Yehoyada ŵaŵisile alonda m’mageti+ ga pa nyumba ja Yehofa kuti alondeleje. Ŵaŵisile jemanjaji ni chakulinga chakuti mundu jwalijose jwali jwangaswejela m’litala line lililyose akajinjila.
20 Sambano jwalakwe ŵajigele ŵakulongolela ŵa magulu ga asilikali 100,+ ŵandu ŵakuchimbichika, ŵakulamulila ŵa ŵandu, soni ŵandu wosope ŵa m’chilambocho ni kwapechesya mwenye pakutyoka ku nyumba ja Yehofa. Kaneko jemanjajo ŵayiche ku nyumba ja mwenye kupitila ku geti jakulutando. Paŵayiche kweleko ŵatamiche mwenyewo pa mpando+ waumwenye.+
21 Myoyo ŵandu wosope ŵa m’chilambomo ŵasangalele, soni mumsindamo mwatesile bata. Yaliji myoyo ligongo lyakuti Ataliya ŵaliji ali awulajidwe ni upanga.
Maloŵe Gamwiŵanda
^ Yikuwoneka kuti chelechi chili chaka cha 7 kutandila paŵamsisile Yehowasi m’nyumba ja Mlungu.
^ Ŵane akusati “yilimbilimbi.”
^ Mu Chihebeli ŵatiga, “pakukopoka kusa soni pakwinjila mkati.”
^ Ndaŵi syejinji ŵakuponya mipamba ni ŵaŵanyakulaga yakuchijila yeleyi.
^ Komboleka kuti umboni waliji mpukutu wa Chilamusi cha Mlungu.
^ Mu Chihebeli ŵatiga, “chipilala chakwe.”
^ Upanga ukusawoneka mpela chipula chekulungwa chakutema kosekose.
