Mbili Jaŵili 22:1-12
22 Panyuma pakwe, ŵandu ŵakutama ku Yelusalemu ŵamŵisile mwanache jwamnandi jwa Yeholamu, lina lyakwe Ahasiya kuti aŵe mwenye mmalo mwa jwalakwejo. Yaliji myoyo ligongo lyakuti gulu ja ŵachiswamba jayiche kuŵatamaga Ayuda ni kwawulaga achakulugwe wosope ŵa Ahasiya.+ Gulu ja ŵachiswambaji jayiche ni ŵandu ŵa ku Alebiya. Myoyo Ahasiya mwanache jwa Yeholamu ŵatandite kulamulila mpela mwenye ku Yuda.+
2 Ahasiya ŵaliji ni yaka 22 pandaŵi jiŵaŵaga mwenye, soni jwalakwe ŵalamulile kwa chaka chimo ku Yelusalemu. Lina lya mamagwe lyaliji Ataliya.+ Mamagweŵa ŵaliji chisukulu cha* Omuli.+
3 Jwalakwejusoni ŵakuyaga yaŵatendaga ŵandu ŵa m’nyumba ja Ahabu.+ Yaliji myoyo pakuŵa mamagwe ni ŵaŵamsalilaga jwalakwejo yakutenda yayamlongolelaga kuti atendeje yindu yakusakala.
4 Jwalakwe ŵapitilisye kutenda yindu yakusakala pameso pa Yehofa mpela yaŵatendaga ŵandu ŵa m’nyumba ja Ahabu. Yaliji myoyo ligongo lyakuti jemanjajo ni ŵaŵamsalilaga yakutenda jwalakwejo panyuma pa chiwa cha babagwe. Yaŵamsalilagayo ni yayampwetekasisye.
5 Jwalakwe ŵakuyisye yaŵamsalilaga jemanjajo, mwamti ŵapite kukuputa ngondo jakulimbana ni Mwenye Hasaele+ jwa ku Siliya ku Lamoti-giliyadi.+ Ŵapite kweleko yimpepe ni Yeholamu mwanache jwa Ahabu mwenye jwa ku Isalayeli. Kungondoko asilikali ŵakuponya mipamba ŵamwulesye Yeholamujo.
6 Jwalakwe ŵawujile ku Yeseleeli+ kuti akapole maŵanga gakwe gaŵamwulesye ku Lama pandaŵi jiŵamenyanaga ni Mwenye Hasaele jwa ku Siliya.+
Kaneko Ahasiya* mwanache jwa Yeholamu+ mwenye jwa ku Yuda ŵapite ku Yeseleeli kuti akamlole Yeholamu+ mwanache jwa Ahabu, ligongo lyakuti Yeholamujo ŵaliji ali awulele.*+
7 Nambo Mlungu ŵatendekasisye Ahasiya kuti asimane ni yipwetesi paŵayiche kukumlola Yeholamu. Paŵayiche kweleko, jwalakwe ŵalongene ni Yeholamu kuti akasimane ni Yehu+ chisukulu cha* Nimusi. Yehofa ŵamsagwile Yehu kuti ŵajonanje* ŵandu wosope ŵa m’nyumba ja Ahabu.+
8 Yehu paŵatandite kupeleka chilango* kwa ŵandu ŵa m’nyumba ja Ahabu, jwalakwe ŵasisimene nduna sya ku Yuda, soni ŵanache ŵachalume ŵa achalongo achimjakwe ŵa Ahasiya, ŵaŵaliji ŵakutumichila ŵa Ahasiyajo. Pelepo Yehu ŵawuleje jemanjajo.+
9 Kaneko jwalakwe ŵatandite kumsosasosa Ahasiya. Achalume ŵaŵatumidwe ni Yehu ŵamsimene jwalakwejo kumalo gaŵajuŵaga ku Samaliya ni ŵamkamwile. Jemanjajo paŵamkamwile, ŵayiche najo kwa Yehu. Kaneko achalumewo ŵamwuleje jwalakwejo ni kumsika m’malembe+ pakuŵa ŵatite, “Jwalakweju ali chisukulu cha Yehosafati juŵamsosilesosile Yehofa ni mtima wakwe wosope.”+ Panyuma pa chiwa cha Ahasiya, pangalisoni jwine jwa m’nyumba ja Ahasiyajo juŵakwete machili gakulamulila umwenyewo.
10 Ataliya,+ ŵaŵaliji mamagwe Ahasiya, paŵayiweni kuti mwanache jwawo awile, ŵanyakwiche ni kutanda kwawulaga ŵanache wosope ŵa mu msela waumwenye ŵa m’nyumba ja Yuda.+
11 Nambo Yehosabati mwanache jwamkongwe jwa mwenye ŵamjigele Yehowasi+ mwanache jwa Ahasiya ni kumsisa. Ŵamjiŵile mwanachejo pasikati pa ŵanache ŵa mwenye ŵaŵaliji ŵakuti awulajidwe. Yehosabati ŵamŵisile mwanacheju m’chipinda chamkati yimpepe ni jwamkongwe jwakumsamalila. Yehosabati mwanache jwamkongwe jwa Mwenye Yeholamu+ ŵakombwele kumsisa mwanachejo kuti Ataliya akampata. Myoyo jwalakwe nganakombola kumwulaga mwanachejo.+ Yehosabati ŵaliji ŵamkwawo Yehoyada+ juŵaliji jwakutaga mbopesi, soni ŵaliji alumbuŵawo Ahasiya.
12 Jemanjajo ŵamsisile mwanachejo ku nyumba ja Mlungu jusyesyene kwa yaka 6. Pandaŵiji Ataliya ŵaliji ali mkulamulila chilambocho.
