Buku Jaŵili ja Mbili 21:1-20
21 Pambesi pakwe, Yehosafati ŵawile mpela muyaŵelele ni achinangolo ŵakwe. Kaneko jwalakwe ŵamsichile m’malembe gaŵasichile achinangolo ŵakwe mu Msinda wa Daudi. Panyuma pakwe, mwanache jwakwe Yeholamu ŵaŵele mwenye mmalo mwa jwalakwejo.
2 Sambano ŵanache ŵane ŵachalume ŵa Yehosafati, ŵaŵaliji achalongo achimjakwe ŵa Yeholamu, ŵaliji aŵa: Asaliya, Yehiyele, Sekaliya, Asaliya jwine, Mikayeli soni Sefatiya. Wosope ŵeneŵa ŵaliji ŵanache ŵachalume ŵa Yehosafati mwenye jwa Ayisalayeli.
3 Baba ŵawowo ŵapele jemanjaji mituka jejinji. Ŵapele silifa, golide, soni yindu yamtengo wapenani. Ŵapele jemanjaji yindu yeleyi pampepe ni misinda jakola yakulichenjela ja mu Yuda. Nambo umwenye ŵampele Yeholamu ligongo jwalakwe ŵaliji mwanache jwandanda kupagwa.
4 Yeholamu paŵagambile kujigala umwenye wa babagwe, ŵawuleje ni upanga achalongo achimjakwe wosope ŵala pampepe ni nduna sine sya Ayisalayeli. Jwalakwe ŵatesile yeleyi pakusaka kulimbisya umwenye wakwe.
5 Yeholamu ŵaliji ni yaka 32 pandaŵi jiŵatandaga kulamulila mpela mwenye, soni jwalakwe ŵalamulile kwa yaka 8 ku Yelusalemu.
6 Jwalakwe ŵakuyaga yagatendaga mamwenye ga ku Isalayeli, mpela yaŵatendaga ŵandu ŵa m’nyumba ja Ahabu. Yaliji myoyo ligongo lyakuti Yeholamu ŵalombele mwanache jwamkongwe jwa Ahabu, mwamti ŵapitilisye kutenda yindu yakusakala pameso pa Yehofa.
7 Nambo Yehofa nganasaka konanga nyumba josope ja Daudi ligongo lya chilanga chaŵatesile ni Daudijo, pakuŵa jwalakwe ŵasasile kuti chachipeleka nyali kwa Daudijo soni kwa ŵanache ŵakwe mpaka kalakala.
8 M’masiku ga Yeholamu, Aedomu ŵajimuchile ulamusi wa ku Yuda, mwamti ŵasagwile mwenye jwawo.
9 Myoyo Yeholamu pampepe ni achakulungwakulungwa ŵakwe ŵa asilikali ŵapite kuŵatamaga jemanjajo ali ajigele magaleta* gakwe gosope. Kaneko jwalakwe ŵajimwiche chilo ni kwagomeka Aedomu ŵaŵamsyungulile jwalakwe pampepe ni achakulungwakulungwa ŵawo ŵa asilikali ŵakwela pa magaleta.
10 Nambo kutandila pandaŵi jiŵajimuchile ulamusi wa ku Yuda, chilambo cha Edomu chiŵele chakwima pajika mpaka lelo. Pandaŵi jelejo, nombe nawo ŵandu ŵa ku Libina ŵajimuchile ulamusi wa ku Yuda. Jemanjajo ŵatesile yeleyi ligongo lyakuti Yeholamu ŵamlesile Yehofa Mlungu jwa achinangolo ŵakwe.
11 Jwalakwe ŵalinganyisyesoni malo gakwela m’matumbi ga ku Yuda ni chakulinga chakwatendekasya ŵandu ŵakutama ku Yelusalemu kuti akaŵa ŵakulupichika kwa Mlungu.* Jwalakwe ŵatendekasisyesoni ŵandu ŵa ku Yuda kuti atande kwenda m’matala gakulemwecheka.
12 Pambesi pakwe, jwakulochesya Eliya ŵalembile utenga ni kumtumichisya jwalakwejo. Utenga wakwe waliji wakuti, “Yehofa Mlungu jwa nangolo jwenu Daudi akuŵecheta kuti, ‘Mmwejo nganimjenda m’matala ga baba ŵenu Yehosafati kapena kwenda m’matala ga Asa mwenye jwa ku Yuda.
13 Nambo mmalomwakwe, mmwejo mkwenda m’matala ga mamwenye ga ku Isalayeli. Mkwatendekasyasoni ŵandu ŵa ku Yuda soni ŵandu ŵakutama ku Yelusalemu kuŵa ŵangakulupichika kwa Mlungu,* mpela mwaŵaŵelele ŵangakulupichika* ŵandu ŵa m’nyumba ja Ahabu. Mmwejo mwayikene pakwawulaga achalongo achimjenu ŵasyesyene ŵa m’liŵasa lya baba ŵenu, ŵaŵaliji ŵambone kumpunda mmwejo.
14 Myoyo, Yehofa chajonanje ŵandu ŵenu, ŵanache ŵenu, achiŵamkwenu nambosoni chipanje chenu chosope.
15 Kaneko mmwejo chimchitanda kulwala yilwele yakulekanganalekangana. Kupwatika pa yilwele yeleyi chimchilaga ni ulwele wawuchikamula matumbo genu. Ulwelewo uchikulilagakulilagape lisiku lililyose mpaka matumbo genugo gachikopochela pasa ligongo lya ulwelewo.’”
16 Kaneko Yehofa ŵatendekasisye Afilisiti soni ŵandu ŵa ku Alebiya ŵaŵatamaga mwakuŵandikana ni Aitiyopiya kuti akole mtima wakusaka kuputa ngondo ni Yeholamu.
17 Myoyo jemanjaji ŵachijimuchile chilambo cha Yuda ni kwinjila m’chilambomo mwamachili, mwamti ŵajigele chipanje chosope chaŵachipatile m’nyumba ja mwenye. Ŵajigelesoni achiŵamkwawo ŵa mwenyewo pampepe ni ŵanache ŵawo ŵachalume. Jwalakwe ŵagambile kusigala ni mwanache jumo jwamlume lina lyakwe Yehoyahasi* juŵaliji jwamnandi pa ŵanache wosopewo.
18 Panyuma pa yindu yosopeyi, Yehofa ŵamtendekasisye jwalakwejo kuti alwale ulwele wangapikana mtela wawakamwile matumbo gakwe.
19 Mkupita kwa ndaŵi, pali pamasile yaka yiŵili yamtundu, matumbo gakwe gakopochele pasa ligongo lya ulwelewo. Kaneko jwalakwe ŵawile ligongo lyakuti ulwelewo wakusile mnope. Pamalilo gakwe ŵandu nganakolesya moto pakumchimbichisya jwalakwejo mpela muyaŵelele ni achinangolo ŵakwe.
20 Yeholamu ŵaliji ni yaka 32 pandaŵi jiŵatandaga kulamulila mpela mwenye, soni jwalakwe ŵalamulile kwa yaka 8 ku Yelusalemu. Pangali mundu jwalijose juŵadandawile ligongo lya chiwa chakwe. Myoyo ŵandu ŵamsichile jwalakwejo m’malembe mu Msinda wa Daudi, nambo ngaŵa m’malembe gaŵasikaga mamwenye.
Maloŵe Gamwiŵanda
^ Magaleta gali ngolo syakuwutidwa ni mahachi.
^ Mu Chihebeli ŵatiga, “kuti atende chikululu chausimu.”
^ Mu Chihebeli ŵatiga, “kutenda chikululu chausimu.”
^ Mu Chihebeli ŵatiga, “mpela mwaŵatendele chikululu chausimu.”
^ Jwalakweju akusamanyikasoni ni lina lyakuti Ahasiya.
