Buku Jaŵili ja Mbili 20:1-37
20 Panyuma pa yeleyi, Amowabu soni Aamoni pampepe ni Aamonimu ŵane, ŵayiche kuti apute ngondo ni Yehosafati.
2 Myoyo Yehosafati ŵapochele utenga wakuti, “Gulu jekulungwa ja ŵandu jiyiche kukulimbana ni wawojo kutyochela ku Edomu, jajili dela ja ku nyasa.* Apano jemanjaji ali ku Hasasoni-tamala, kwakuli ku Eni-gedi.”
3 Yehosafati paŵapikene yeleyi wamkamwile woga, mwamti ŵasimichisye yakumsosasosa Yehofa. Myoyo jwalakwe ŵajenesye kuti ŵandu wosope ŵa m’chilambo cha Yuda alijime kulya.
4 Kaneko ŵandu ŵa ku Yuda ŵasongene pampepe kuti awusye lunda kwa Yehofa. Jemanjaji ŵatyosile m’misinda josope ja ku Yuda ni kwika kuti awusye lunda kwa Yehofa.
5 Kaneko Yehosafati ŵajimi ku nyumba ja Yehofa pasogolo pa luŵala lwasambano pasikati pa ŵandu ŵa ku Yuda soni ŵa ku Yelusalemu ŵaŵasongenewo.
6 Jwalakwe ŵatite, “Wawo Yehofa Mlungu jwa achinangolo ŵetu, wawojo jika ni ŵali Mlungu jwakwinani. Ana wawojo ngati ni ŵakusalamulila maulamusi gosope ga mitundu ja ŵandu? Machili gali mmyala mwawo, soni pangali mundu jwalijose jwampaka alimbane ni wawojo.
7 Wawo Mlungu jwetu, ana ngati wawojo ni ŵaŵatopwele ŵandu ŵaŵatamaga m’chilambo achino? Ŵatopwele jemanjajo pameso pa ŵandu ŵawo Ayisalayeli ni kuchipeleka chilambochi kwa ŵanache* ŵa Abulahamu jwali mjawo kuti chiŵe chipanje chawo mpaka kalakala.
8 Jemanjajo ŵatandite kutama m’chilambochi, soni ŵataŵile nyumba ja wawojo jakumanyika ni lina lyawo. Kaneko ŵaŵechete kuti,
9 ‘Naga tusimane ni yakusawusya yakwika ligongo lya upanga, chilango chakogoya, mlili kapena sala, tuchijima pameso pawo pasogolo pa nyumba ajino, pakuŵa lina lyawo lili pa nyumba jeleji. Tuchijima pelepa kuti tuŵende chikamuchisyo pa yakusawusya yatusimene nayo. Patuchitenda yeleyi, wawojo chatupikane ni kutukulupusya.’
10 Sambano alole yakusaka kututenda achalume ŵayiche kutyochela ku Amoni, ku Mowabu soni ku dela jamatumbi ja Seili. Nambotu pakwamba ya ŵandu ŵeleŵa, wawojo nganiŵakunda Ayisalayeli kuti ŵajimuchile jemanjaji paulendo wawo wakutyoka m’chilambo cha Iguputo. Mmalomwakwe Ayisalayeli ŵaŵambele jemanjaji, nganiŵajonanga.
11 Sambano jemanjaji lelo akutuwuchisya ni yindu yakusakala mmalo mwa yindu yambone, mwamti akwika kukututopola m’chilambo cha wawojo chaŵatupele mpela chipanje chetu.
12 Wawo Mlungu jwetu, ana chagambe kwaleka ngapa chilango jemanjaji? M’wejitu nganitukola machili gakulimbana ni gulu jekulungwaji, jajikwika kukulimbana ni m’weji soni ngatukumanyilila yatukusosekwa kutenda, nambo meso getu gali pa wawojo.”
13 Pandaŵi jeleji, ŵandu wosope ŵa ku Yuda pampepe ni ŵanache* ŵawo, achiŵamkwawo, atamosesoni ŵanache ŵawo ŵachinandipile, ŵaliji ali ajimijimi pameso pa Yehofa.
14 Kaneko msimu wa Yehofa wamyichile Yahasiyele juŵaliji pasikati pa ŵandu ŵaŵasongenewo. Jwalakweju ŵaliji mwanache jwa Sekaliya. Sekaliya ŵaliji mwanache jwa Benaya. Benaya ŵaliji mwanache jwa Yeiyeli, soni Yeiyeli ŵaliji mwanache jwa Mataniya juŵaliji Mlefi, jumo mwa ŵanache ŵa Asafu.
15 Yahasiyelejo ŵatite, “Apikane wawo mwenye Yehosafati soni ŵandu wosope ŵakutama ku Yuda soni ku Yelusalemu. Ayi ni yakuŵecheta Yehofa kwa jemanja: ‘Mkatenda woga kapena kutetemela ligongo lya gulu jekulungwaji, pakuŵa ngondoji nganijiŵa ja jemanja, nambo jili ja Mlungu.
16 Jemanja malaŵi mjawule kukulimbana nawo. Jemanjajo pachachiyikaga chachikopochela ku msewu wakolanjidwa kuti Sisi, mwamti chimkasimane nawo kumbesi kwa chitiŵi* chiŵandika chipululu cha Yeluweli.
17 Jemanja ngasimsosekwa kuputa nawo ngondo jeleji. Mkagambe kuŵa chimile pamalo genu ni kulola yachakajile Yehofa pakumkulupusya jemanja. Jemanja ŵandu ŵa ku Yuda soni ŵa ku Yelusalemu ngamkusosekwa kutenda woga kapena kutetemela. Malaŵi mjawule kukulimbana ni jemanjajo, soni Yehofa chachiŵa ni jemanja.’”
18 Pelepo Yehosafati ŵatindiŵele ni kwinama mpaka ngope jakwe pasi. Nambosoni ŵandu wosope ŵakutama ku Yuda soni ku Yelusalemu ŵatindiŵele. Jemanjajo ŵatesile yeleyi pameso pa Yehofa pakumchimbichisya Yehofajo.
19 Kaneko Alefi ŵaŵaliji yisukulu ya Kohati soni ya Kola ŵajimi ni kutanda kwimba nyimbo mwakwesya mnope maloŵe pakumchimbichisya Yehofa Mlungu jwa Ayisalayeli.
20 Palisiku lyakuyichisya, ŵanduwo ŵajimwiche kundaŵindaŵipe ni kuwutanda ulendo wakwawula ku chipululu cha Tekowa. Paŵajawulaga, Yehosafati ŵajimi ni kuŵecheta ni ŵanduwo kuti, “Jemanja ŵandu ŵa ku Yuda soni ŵa ku Yelusalemu, mpikane yangusaka kuŵecheta! Mumkulupilile Yehofa Mlungu jwenu kuti mŵe ŵakulimba mtima.* Mwakulupililesoni ŵakulochesya ŵakwe kuti yindu yikamjendele chenene.”
21 Paŵamasile kuŵechetana ni ŵanduwo, jwalakwe ŵasagwile achalume ŵane kuti amjimbileje Yehofa soni kumkwesya Mlungu ali awete yakuwala yapadela. Paŵajawulaga, jemanjajo ŵaliji pasogolo pa achalume ŵaŵajigele yida yangondo, mwamti ŵajimbaga kuti, “Amyamichile Yehofa, pakuŵa chinonyelo chakwe chakulupichika chichitama mpaka kalakala.”
22 Achalume ŵakwimba ŵala paŵagambile kutanda kwimba mwakusangalala nyimbo syakumchimbichisya Mlungu, Yehofa ŵajuŵilile achalume ŵa ku Amoni, ku Mowabu soni achalume ŵa kudela jamatumbi ja Seili ŵaŵayiche kukwajimuchila ŵandu ŵa ku Yuda ŵala. Jwalakwe ŵatendekasisye kuti jemanjajo atande kuwulagana achimsyenepe.
23 Aamoni soni Amowabu ŵatandite kwajimuchila ŵandu ŵaŵatamaga kudela jamatumbi ja Seili ni kutanda kwajonanga mpaka kwapyajila wosope ŵene. Paŵamalisisye kwawulaga ŵandu ŵaŵatamaga ku Seiliwo, jemanjajo ŵatandite kuwulagana achimsyenepe.
24 Sambano ŵandu ŵa ku Yuda paŵayiche pa sanja jine jakwe ja m’chipululu ni kulola gulu ja ŵanduwo, ŵagambile kujiwona mitembo jili lambalamba, pangali jwalijose juŵakulupwiche.
25 Pelepo Yehosafati pampepe ni ŵandu ŵakwe ŵayiche pamalopo kukujigala yindu. Jemanjajo ŵapatile katundu jwamjinji, yakuwala soni yindu yine yapenani. Jemanjajo ŵajigele yindu yejinji kutyochela kwa ŵandu ŵaŵawilewo, mwamti yajigalile masiku gatatu ali mkututa yinduyo. Nambope yine yasigele, ligongo yapali yejinji mnope.
26 Palisiku lya mcheche, ŵanduwo ŵasongene pa Chitiŵi* chakumanyika kuti Belaka ligongo lyakuti kweleko ŵamchimbichisye Yehofa. Ni ligongo lyakwe ŵandu ŵagapele maloga lina lyakuti Chitiŵi cha Belaka,* mwamti mpaka lelo gakusamanyika ni lina lyeleli.
27 Panyuma pakwe, ŵandu wosope ŵa ku Yuda soni ku Yelusalemu ŵawujile ku Yelusalemu ali mkusangalala, Yehosafati ali pasogolo pawo. Yaliji myoyo ligongo lyakuti Yehofa ŵatendekasisye jemanjajo kuti aŵe ŵakusangalala ligongo lya kuwa kwa adani ŵawo.
28 Myoyo ŵanduwo ŵayiche ku Yelusalemu ali mkwimba ni yakwimbila ya ngonji yakulekanganalekangana soni malipenga. Kaneko ŵapite ku nyumba ja Yehofa.
29 Mamwenye gosope ga m’yilambo yakulekanganalekangana pagapikene kuti Yehofa ŵaputile ngondo Ayisalayeli pakwagomeka adani ŵawo, mamwenyego wakamwile woga wakutyochela kwa Mlungu.
30 Myoyo umwenye wa Yehosafati waliji wangali chakusokonasya chine chilichose. Mlungu jwakwe ŵapitilisye kumpumusya jwalakwejo kuti aŵe pamtendele, pakapagwa chilichose chakumsokonasya mbali syosope sya chilambocho.
31 Yehosafati ŵapitilisye kulamulila chilambo cha Yuda. Jwalakwe ŵaŵele mwenye ali ni yaka 35, mwamti ŵalamulile kwa yaka 25 ku Yelusalemu. Mamagwe lina lyawo ŵaliji Asuba mwanache jwamkongwe jwa Silihi.
32 Jwalakwe ŵapitilisye kwenda m’litala lya Asa babagwe, mwamti nganaleka kukuya litalalyo. Yehosafati ŵatesile yindu yayaliji yakuŵajilwa pameso pa Yehofa.
33 Nambope jwalakwe nganatyosya malo gakwela, nambosoni ŵandu ŵaliji mkanaŵe kukosechelesya mitima jawo kuti amsosesose Mlungu jwa achinangolo ŵawo.
34 Pakwamba mbili jine ja Yehosafati, yaŵatesile kundanda mpaka kumbesi, ŵayilembile m’buku ja Yehu mwanache jwa Hanani ni kuyipwatika mu Buku ja Mamwenye ga Ayisalayeli.
35 Panyuma pakwe, Yehosafati mwenye jwa ku Yuda ŵatesile mkamulano ni Ahasiya mwenye jwa ku Isalayeli juŵatendaga yindu yakusakala.
36 Myoyo jwalakwe pampepe ni ajawowo ŵakamulene kuti apanganye masitima gakuti gajawuleje ku Talisi. Jemanjaji ŵapanganyisye masitima gelega ku Esiyoni-geba.
37 Nambope, Eliyesa mwanache jwa Dodafahu jwa ku Malesa, ŵalochesye yakwamba Yehosafati kuti, “Ligongo lyakuti mmwejo mtesile mkamulano ni Ahasiya, Yehofa chajonanje masengo genu.” Myoyo masitimago gakasiche, mwamti nganigajawula ku Talisi.
Maloŵe Gamwiŵanda
^ Yikuwoneka kuti jeleji jili Nyasa Jewe.
^ Mu Chihebeli ŵatiga, “mbeju.”
^ Mu Chihebeli ŵatiga, “ŵanache ŵachalume.”
^ Chitiŵi chakusala pelepa chaliji chana lusulo.
^ Kapena kuti, “kuti mtamilichiche.”
^ Chitiŵi chakusala pelepa chaliji chana malo gekulungwa gafulati.
^ Kugopolela kuti “Kuchimbichisya.”
