Buku Jaŵili ja Mbili 2:1-18
-
Kukosechela kutaŵa nyumba ja Mlungu (1-18)
2 Sambano Solomoni ŵalamwile kuti nyumba jakumanyika ni lina lya Yehofa soni nyumba jakwe jaumwenye jitande kutaŵidwa.
2 Solomoni ŵalembile mena achalume ŵakwana 70,000 ŵakuti akamuleje masengo wamba.* Ŵalembilesoni achalume ŵakwana 80,000 ŵakuti akaseje maganga m’matumbi. Nambosoni ŵasagwile achalume 3,600 ŵakuti ŵaloleleje jemanjaji.
3 Konjechesya pelepa, Solomoni ŵatumisye maloŵe kwa Hilamu mwenye jwa ku Tulo gakumsalila kuti, “Wawojo ŵatumichisye baba ŵangu Daudi matabwa ga mkungusa gakutaŵila nyumba* jakuti atameje. Yaŵatendele baba ŵanguyo unesoni ngusaka andendele iyoyo.
4 Une apano ngutaŵa nyumba jakumanyika ni lina lya Yehofa Mlungu jwangu. Nyumbaji chinjijiswejesya ni kujipeleka kwa jwalakwejo. Mwelemo chinjitinichisyaga mbopesi syakununjila pameso pakwe, soni ndaŵi syosope muchitamaga mikate* jesajikanye.* Pa nyumba jeleji chinjipelechelaga mbopesi syakutinisya sya kundaŵi soni sya ligulo. Chinjipelechelagasoni mbopesi syakutinisya sya pa yisangalalo ya Masabata, yisangalalo ya kuwoneka kwa mwesi, soni pa yisangalalo ya pachaka yakumchimbichisya Yehofa Mlungu jwetu. Yeleyi ni yakusosekwa Ayisalayeli kuti atendeje mpaka kalakala.
5 Nyumba jangutaŵaji jichiŵa jekulungwa, pakuŵa Mlungu jwetu ali jwamkulungwa kupunda milungu jine josope.
6 Ana ŵani ŵampaka akombole kumtaŵila nyumba jwalakwejo? Pakuŵatu kwinani, atamose kwinani mnopeko, jwalakwe nganaŵa akwanile kutama kweleko. Sambano une ndili ŵani kuti ngombole kumtaŵila nyumba jwalakwejo? Myoyo nyumba jangutaŵaji jichigamba kuŵa malo gakupelechela mbopesi syakutinisya pameso pakwe.
7 Sambano ngwaŵenda kuti andumichisye mundu jwalunda lwakupanganya yindu ni makono. Mundu jweleju aŵe jwakupakombola kupanganya yindu pakamulichisya masengo golide, silifa, kopa soni yisyano ya ayiloni. Aŵesoni jwakupakombola kupanganya yindu pakamulichisya masengo ulusi wakwawulila ku uchejewu, ulusi wechejewu mnope soni ulusi wabuluwu. Mundujo aŵesoni jwakupakombola kwambula yakusalalisya mwakutenda kugoba. Jwalakwejo chachikamulaga masengo ku Yuda soni ku Yelusalemu pampepe ni ŵamasengo ŵangu ŵalunda lwakupanganya yindu ni makono ŵaŵambele Daudi baba ŵangu.
8 Ngusaka andumichisyesoni matabwa ga yitela yamkungusa, janipa, soni aligamu gakutyochela ku Lebanoni. Une ngumanyilila chenene kuti wawojo akwete ŵamasengo ŵakupakombola chenene kukata yitela ya ku Lebanoni. Ŵamasengo ŵangu chachikamulaga masengo pampepe ni ŵamasengo ŵawo
9 pakungamuchisya kusonganganya matabwa gejinji. Yili myoyo ligongo nyumba jangusaka kutaŵaji jichiŵa jekulungwa soni jakusalala mnope.
10 Sambano apikane! Une chinjipeleka yakulya kwa ŵamasengo ŵawo ŵachachikataga yitela. Chinjipeleka tiligu, winji wakwe makoli* 20,000, balele makoli 20,000, milulo* ja finyo 20,000, soni milulo ja mawuta 20,000.”
11 Hilamu mwenye jwa ku Tulo paŵagambile kupikana yeleyi, jwalakwe ŵamlembele chikalata Solomoni. M’chikalatamo ŵalembile kuti, “Yehofa amsagwile mmwejo kuti mŵe mwenye jwa ŵandu ŵakwe ligongo lyakuti jwalakwe akusiŵanonyela ŵandu ŵakwewo.”
12 Hilamu ŵapitilisye kuti, “Achimbichikwe Yehofa Mlungu jwa Ayisalayeli juŵapanganyisye kwinani soni chilambo chapasi. Jwalakwejo achimbichikwe ligongo ampele mwenye Daudi mwanache jwalunda, jwali jwakupikanichisya soni jwakumanyilila yindu. Jwalakweju ni juchachimtaŵila nyumba Yehofa, soni chachitaŵa nyumba jaumwenye wakwe.
13 Sambano une chinamtumichisye mundu jwalunda lwakupanganya yindu ni makono. Mundu jweleju ali Hilamu-abi, soni ali jwakumanyilila chenene masengo gamakono.
14 Jwalakwejo ali mwanache jwa jwamkongwe jwine jwa mu mbumba* ja Dani soni baba ŵawo ali ŵa ku Tulo. Mundu jweleju akusakombola chenene kupanganya yindu ni makono pakamulichisya masengo golide, silifa soni yisyano ya ayiloni. Akusakombolasoni kupanganya yindu ni ulusi wakwawulila ku uchejewu, ulusi wechejewu mnope, ulusi wabuluwu soni ni nguwo syambone. Mundu jweleju akusakombola kupanganya yakusalalisya ya mtundu wine uliwose, soni mpaka apanganye chindu chilichose chamumsalile kuti apanganye. Jwalakweju chachikamula masengo pampepe ni ŵamasengo ŵenu ŵalunda lwakupanganya yindu ni makono. Chachikamulasoni masengo pampepe ni ŵamasengo ŵalunda lwakupanganya yindu ni makono ŵa baba ŵenu Daudi, Ambuje ŵangu.
15 Sambano wawo ambuje ŵangu, ŵatumichisye ŵamasengo ŵawo yindu yasasile kuti chiŵatumichisye yila, mpela tiligu, balele, mawuta soni finyo.
16 Chitukatesoni yitela kutyochela ku Lebanoni. Winji wakwe chiwuŵe mwakamulana ni mwakusachila wawojo. Kaneko chituyiche nayo yitelayo ku Yopa kupitila pa nyasa kuti yikayiche kwa wawojo. Jemanja chakayijigalile kweleko ni kwawula nayo ku Yelusalemu.”
17 Kaneko Solomoni ŵaŵalasile achalume wosope ŵamitundu jine ŵaŵatamaga m’chilambo cha Isalayeli mpela muŵatendele Daudi babagwe. Chiŵalanjilo cha achalume wosope chakwanile 153,600.
18 Myoyo Solomoni ŵajigele achalume ŵeleŵa ni kwapa masengo. Achalume 70,000 ŵaŵisile kuti akamuleje masengo wamba.* Achalume 80,000 ŵaŵisile kuti akaseje maganga m’matumbi, soni achalume 3,600 ŵaŵisile kuti aŵe ŵakwalolela ŵandu ŵaŵakamulaga masengo.
Maloŵe Gamwiŵanda
^ Kapena kuti, “anyakuleje katundu.”
^ Kapena kuti, “nyumba jaumwenye.”
^ Mikate jakala ŵajipanganyaga ni utandi wa tiligu kapena balele.
^ Jeleji jili mikate jakulosya kwa Mlungu.
^ Mlingo umo wa koli waŵaga malita 220. Alole Yakumbesi B14.
^ Ŵane akusati “malulo; wulo.” Lulo lumo lwaŵaga malita 22. Alole Yakumbesi B14.
^ Alole Kugopolela kwa Maloŵe Gane.
^ Kapena kuti, “anyakuleje katundu.”
