Buku Jaŵili ja Mbili 19:1-11
19 Panyuma pakwe Yehosafati mwenye jwa ku Yuda ŵawujile mwamtendele ku Yelusalemu, kunyumba jakwe.*
2 Kaneko Yehu mwanache jwa Hanani jwakumanyilila yamsogolo, ŵayiche kukusimana ni jwalakwejo, mwamti ŵasalile Mwenye Yehosafatiwo kuti, “Ana akuganisya kuti yili yambone kuti wawojo ŵakamuchisyeje ŵakusakala soni kwanonyelaga ŵandu ŵakusaŵengana ni Yehofa? Ligongo lya yindu yatesileyi Yehofa ŵatumbilile wawojo.
3 Atamose yili myoyo, nambope pana yindu yine yambone yayisimanikwe mwa wawojo, ligongo lyakuti ŵatyosisye njalamila syapadela* m’chilambochi soni ŵakosechelesye mtima wawo* kuti amsosesose Mlungu jusyesyene.”
4 Yehosafati ŵapitilisye kutama ku Yelusalemu. Jwalakwe ŵapitesoni pasikati pa ŵanduwo kutandila ku Beele-seba mpaka kudela jamatumbi ja Efulayimu. Ŵatesile yeleyi ni chakulinga chakuti ŵakamuchisye jemanjajo kuwujila kwa Yehofa Mlungu jwa achinangolo ŵawo.
5 Nambosoni jwalakwe ŵasagwile ŵakwelusya mumsinda uliwose ŵakola yakulichenjela m’chilambo chosope cha Yuda.
6 Kaneko ŵasalile ŵakwelusyawo kuti, “Msamale ni mwamkutendela yindu, pakuŵa jemanja mkwelusya pakumjimila Yehofa, ngaŵaga mundu. Jwalakwe ali ni jemanja pamkwelusya magambo.
7 Sambano jemanja mumjogopeje Yehofa. Msamaleje ni mwachimtendeleje yindu, pakuŵa Yehofa Mlungu jwetu jwangakunda yindu yangali chilungamo, yalusagu, kapena kumwonga.”
8 Nombe nako ku Yelusalemu, Yehosafati ŵasagwile ŵane mwa Alefi soni ŵakutaga mbopesi. Ŵasagwilesoni ŵane mwa ŵakulongolela m’maŵasa gakumanyika ni mena ga achinangolo ŵawo ga Ayisalayeli. Wosopeŵa ŵasagwile kuti atumichileje mpela ŵakwelusya ŵa Yehofa. Jemanjaji ŵalondesyaga magambo ga ŵandu ŵaŵatamaga ku Yelusalemu.
9 Jwalakwe ŵalamwile jemanjajo kuti, “Mtendeje masengo genu mwakumjogopa Yehofa, mwakulupichika, nambosoni ni mtima wenu wosope.*
10 Mpaka yitendekwe kuti achalongo achimjenu ŵakutama m’misinda jine ayiche ni magambo gakwayana ni kuwulaga mundu, kapena ayiche ni chiwusyo chakwamba lilamusi line lyakwe kapenasoni yaŵalamwile Mlungu. Payitendekwe yeleyi mkusosekwa kwasalila jemanjajo yakusosekwa kutenda, kuti akakola magambo pameso pa Yehofa. Naga mkulepela kutenda yeleyi Mlungu chachimtumbilila jemanja soni achalongo achimjenuwo. Mkusosekwa kutenda yeleyi ni chakulinga chakuti mkakola magambo.
11 Amaliya jwakulolela ŵakutaga mbopesi ni juchamloleleje jemanja. Jwalakwejo chamkamuchisyeje jemanja kumanyilila yakusaka Yehofa pangani jine jilijose. Panasoni Sebadiya mwanache jwa Isimayeli jwali jwakulongolela mu mbumba ja Yuda juchamkamuchisyeje pangani jilijose jakwayana ni mwenye. Panasoni Alefi ŵachamkamuchisyeje jemanja pangani jakwelusya. Mŵe ŵakulimba mtima soni mtende masengoga mwakulipeleka. Yehofa aŵe ni ŵandu ŵakusatenda yindu yambone.”
Maloŵe Gamwiŵanda
^ Kapena kuti, “kunyumba jakwe jaumwenye.”
^ Alole Kugopolela kwa Maloŵe Gane.
^ Kapena kuti, “ŵasimichisye mtima.”
^ Kapena kuti, “mwakulipeleka mnope.”
