Buku Jaŵili ja Mbili 16:1-14
16 M’chaka cha 36 cha ulamusi wa Asa, Mwenye Basa ŵa ku Isalayeli ŵayiche kukulimbana ni ŵandu ŵa ku Yuda. Jwalakwe ŵatandite kutaŵa* msinda wa Lama pakusaka kuti mundu jwalijose akatyoka kapena kwika kwa* Asa Mwenye jwa ku Yuda.
2 Pelepo Asa ŵajigele silifa soni golide kutyochela pa chipanje cha m’nyumba ja Yehofa soni nyumba ja mwenye ni kumtumichisya Mwenye Beni-hadadi jwa ku Siliya juŵatamaga ku Damasiko. Jwalakwe ŵatumisye yinduyi ni maloŵe gakuti,
3 “Pasikati pa mmwejo ni une soni pasikati pa baba ŵangu ni baba ŵenu pana mkamulano.* Paligongo lyeleli ngumtumichisya mmwejo silifa soni golideju. Myiche kuti mmasye mkamulano* wamwatesile ni Mwenye Basa jwa ku Isalayeli. Mtende yeleyo ni chakulinga chakuti jwalakwejo aleche kulimbana ni une.”
4 Beni-hadadi ŵapikanile maloŵe ga Mwenye Asa, mwamti ŵatumisye achakulungwakulungwa ŵa asilikali kuti akalimbane ni misinda ja ku Isalayeli. Jemanjaji ŵawugomeche msinda wa Iyoni, Dani, Abele-maimu nambosoni ŵasumwile malo gosope gakusunjila yindu ga m’misinda ja ku Nafitali.
5 Mwenye Basa paŵapikene yeleyi, ndaŵi jijojo ŵalesile kutaŵa* msinda wa Lama mwamti ŵagajimiche masengogo.
6 Kaneko Mwenye Asa ŵajigele ŵandu wosope ŵa ku Yuda ni kwawula nawo kukujigala maganga soni matabwa ku Lama gaŵakamulichisyaga masengo Basa pakutaŵa* msindawo. Maganga soni matabwa gaŵajigelego ŵagakamulichisye masengo pakutaŵa* msinda wa Geba soni wa Misipa.
7 Pandaŵi jelejo, Hanani jwakumanyilila yamsogolo ŵayiche kwa Mwenye Asa jwa ku Yuda ni kwasalila kuti, “Ligongo lyakuti nganamdalila* Yehofa Mlungu jwawo, mmalomwakwe ŵadalile* mwenye jwa ku Siliya, asilikali ŵa mwenye jwa ku Siliya atyosile mmyala mwawo.
8 Ana asilikali ŵa ku Itiyopiya soni ŵa ku Libiya ngati ŵaliji ŵajinji mnope soni ŵakwete magaleta* soni achalume ŵakwela pa mahachi ŵajinji? Nambo ligongo lyakuti wawojo ŵamdalile Yehofa, jwalakwejo ŵapeleche jemanjajo mmyala mwawo.
9 Pakuŵa Yehofa akulolechesya mwachidwi pachilambo chosope chapasi kuti alosye machili gakwe pakwakamuchisya ŵandu ŵakusamtumichila jwalakwejo ni mtima wosope.* Wawojo atesile yindu mwakuloŵela pangani jeleji. Kutandila apano kwawula msogolo chipaŵeje ngondo syakulimbana ni wawojo.”
10 Nambope Asa ŵamtumbilile mnope jwakumanyilila yamsogolojo mwamti ŵamŵisile mundende. Yaliji myoyo ligongo lyakuti jwalakwe ŵampilile mtima ligongo lya yindu yaŵaŵecheteyo. Nambosoni pandaŵi jijiji Asa ŵatandite kwalagasya ŵane mwa ŵandu ŵakwe.
11 Mbili jine jakwamba Asa, yaŵatesile kundanda mpaka pambesi, ŵayilembile mu Buku ja Mamwenye ga ku Yuda soni ga ku Isalayeli.
12 M’chaka cha 39 cha ulamusi wa Asa, sajo sya Asa syamkamwile ulwele mwamti ulwelewo wakusile mnope. Atamose kuti jwalakwe jwalwasile chamti myiyi nambope nganagalawuchila kwa Yehofa pakusaka kupata chikamuchisyo. Mmalomwakwe ŵasosile chikamuchisyo kwa ŵandu ŵakuposya yilwele.
13 Pambesi pakwe, Asa ŵawile mpela mwayaŵelele ni achinangolo ŵakwe. Jwalakwe ŵawile m’chaka cha 41 cha ulamusi wakwe.
14 Kaneko ŵandu ŵamsichile jwalakwejo m’malembe gakwe gakusalala mnope gaŵasepile mu Msinda wa Daudi. Jemanjajo ŵamŵisile jwalakwejo pamachila gaŵagatasile mawuta ga basamu soni yakununjilisya yewanganye yindu yakulekanganalekangana. Konjechesya pelepa, ŵanduwo ŵakolesisye moto wekulungwa pa malilo gakwe pakumchimbichisya jwalakwejo.*
Maloŵe Gamwiŵanda
^ Kapena kuti, “kuwulimbisya; kutaŵasoni.”
^ Kapena kuti, “akakopoka kapena kwinjila mudela ja.”
^ Kapena kuti, “chilanga.”
^ Kapena kuti, “chilanga.”
^ Kapena kuti, “kuwulimbisya; kuwutaŵasoni.”
^ Kapena kuti, “pakuwulimbisya; pakutaŵasoni.”
^ Kapena kuti, “pakuwulimbisya; pakutaŵasoni.”
^ Mu Chihebeli ŵatiga, “nganamjegamila.”
^ Mu Chihebeli ŵatiga, “ŵajegamile.”
^ Magaleta gali ngolo syakuwutidwa ni mahachi.
^ Kapena kuti, “ŵakumsatumichila jwalakwejo mwakulipeleka mnope.”
^ Komboleka kuti moto welewu ŵakolesisye kuti ajochele yakununjilisya, ngaŵaga kuti ajochele mtembo wa Asa.
