Buku Jaŵili ja Mbili 13:1-22
13 M’chaka cha 18 cha ulamusi wa Mwenye Yelobowamu, Abiya ŵaŵele mwenye jwa ku Yuda.
2 Jwalakwe ŵalamulile kwa yaka yitatu ku Yelusalemu. Mamagwe ŵaliji Mikaya mwanache jwamkongwe jwa Uliyele jwa ku Gibeya. Ndaŵi jine papali ngondo pasikati pa Abiya ni Yelobowamu.
3 Abiya ŵapite ku ngondoko ni asilikali ŵakwe ŵamachili ŵakwana 400,000 ŵakumanyilila kuputa ngondo.* Nombenajo Yelobowamu pampepe ni asilikali ŵakwe ŵajimi mwadongosolo jakwe jakuputila ngondo kuti alimbane ni jwalakwejo. Yelobowamu ŵaliji ni asilikali ŵamachili ŵakwana 800,000 ŵakumanyilila kuputa ngondo.*
4 Sambano Abiya ŵapite kuja kwima pa Litumbi lya Semalaimu lyalili mudela jamatumbi ja Efulayimu. Ali ajimi pelepo, ŵatandite kuŵecheta kuti, “Mmwe Yelobowamu soni Ayisalayeli wosope, mumbikane!
5 Ana jemanja ngamkumanyilila kuti Yehofa Mlungu jwa Ayisalayeli ŵamŵisile Daudi soni ŵanache ŵakwe kuti aŵe mamwenye ga Ayisalayeli mpaka kalakala? Mwamti pangani jeleji jwalakwe ŵatesile chilanga champaka kalakala.*
6 Nambo Yelobowamu mwanache jwa Nebati juŵaliji jwakutumichila jwa Solomoni mwanache jwa Daudi, ŵajimuchile ambujegwewo.
7 Achalume ŵakusoŵa yakutenda soni ŵangalondeka ŵayiche ni kuŵa kumbali jakwe. Jemanjajo ŵawoneche kuŵa ŵamachili mnope kumpunda Lehobowamu mwanache jwa Solomoni. Yaliji myoyo ligongo lyakuti Lehobowamujo ŵaliji mwanache soni ŵatendaga woga, mwamti ngamkanakombola kulimbana ni jemanajo.
8 “Sambano jemanja mkuganisya kuti mpaka mlimbane ni umwenye wa Yehofa wawuli mmyala mwa ŵanache ŵa Daudi. Mkuganisya myoyo ligongo lyakuti mpali ŵandu ŵajinji, soni ligongo lyakuti mkwete yiwanichisyo yagolide yaŵanache ŵa ng’ombe yaŵapanganyisye Yelobowamu kuti jiŵe milungu jenu.
9 Ana jemanja ngati mwatopwele ŵakutaga mbopesi ŵa Yehofa ŵali yisukulu ya Aloni soni Alefi? Soni ana ngati jemanja mlisagulile jika ŵakutaga mbopesi mpela yakusatenda ŵandu ŵa m’yilambo yine? Jwalijose jwayiche ni* mwanache jwamkambako jwa ng’ombe soni ngondolo 7 syamkambako mkusimumŵikaga jwalakwejo kuti aŵe jwakutaga mbopesi jwa milungu jaunami.
10 Nambo kwa m’wejo Yehofa ni jwali Mlungu jwetu, soni nganitumleka jwalakwejo. Ŵakutaga mbopesi ŵetu ŵali yisukulu ya Aloni akupitilisyape kumtumichila Yehofa, soni Alefi akwakamuchisya pa masengoga.
11 Jemanjajo kundaŵi kulikose soni ligulo lililyose akupelekaga mbopesi syakutinisya kwa Yehofa mwakocha pamoto kuti sikoposyeje lyosi. Jemanjaji akupeleka mbopesi syelesi pampepe ni mbopesi sya yakununjila. Akusaŵikasoni mikate* jesajikanye* patebulo jagolide. Nambosoni ligulo lililyose akusapamba nyali syasili pa chakwimichila nyali chagolide. Akusatenda yeleyi pakwanilisya udindo wetu watukwete kwa Yehofa Mlungu jwetu. Nambo jemanja mumlesile jwalakwejo.
12 Sambano alole, Mlungu jusyesyene ali ni m’wejo soni ni jwakutulongolela. Tukwetesoni ŵakutaga mbopesi ŵakwimba malipenga gakwamanyikasya ŵandu yangondo jakulimbana ni jemanja. Jemanja achalume ŵa ku Isalayeli, mkaputa ngondo ni Yehofa Mlungu jwa achinangolo ŵenu, pakuŵa ngondo jeleji jemanja ngampunda.”
13 Nambo Yelobowamu ŵaŵisile asilikali ŵane kuti ŵajuŵilile achalume ŵa ku Yuda kunyuma. Myoyo asilikali ŵa Yelobowamu, ŵane ŵaliji kusogolo kwa achalume ŵa ku Yuda soni ŵane ŵaliji ali ŵajuŵilile kunyuma kwawo.
14 Achalume ŵa ku Yuda paŵagalawiche ŵayiweni kuti akusosekwa kuputa ngondo ni asilikali ŵaŵaliji kusogolo soni kunyuma kwawo. Myoyo jemanjajo ŵatandite kumlilila Yehofa, kwineku ŵakutaga mbopesi ali mkulisya mnope malipenga.
15 Kaneko achalume ŵa ku Yuda ŵagumisile ni kutanda kuputa ngondojo. Achalume ŵa ku Yudawo paŵagumisile mnope pangondojo, Mlungu jusyesyene ŵamgomeche Yelobowamu pampepe ni Ayisalayeli wosope pameso pa Abiya soni achalume ŵa ku Yuda.
16 Ayisalayeli ŵatisile pameso pa achalume ŵa ku Yuda, mwamti Mlungu ŵapeleche jemanjajo mmyala mwawo.
17 Abiya pampepe ni ŵandu ŵaŵaliji nawo ŵasikite ŵajinji mwa jemanjajo. Asilikali wosope ŵa Ayisalayeli ŵaŵawulajidwe ŵakwanile 500,000, achalume ŵakumanyilila kuputa ngondo.*
18 Myoyo achalume ŵa ku Isalayeli ŵatesile sooni ligongo lyakwagomeka. Nambo achalume ŵa ku Yuda ŵawoneche kuŵa ŵamachili mnope ligongo ŵamdalile* Yehofa Mlungu jwa achinangolo ŵawo.
19 Abiya ŵapitilisye kumtopola Yelobowamu soni ŵasumwile misinda jakwe. Misinda jakwe jaliji Beteli pampepe ni matawuni gamwanamwana gakuŵandikana ni msindawo,* Yesana pampepe ni matawuni gamwanamwana gakuŵandikana ni msindawo, nambosoni msinda wa Efulaini pampepe ni matawuni gamwanamwana gakuŵandikana ni msindawo.
20 Mundaŵi ja Abiya, Yelobowamu nganakolasoni machili. Kaneko Yehofa ŵamwuleje jwalakwe.
21 Nambo Abiya ŵapitilisye kuŵa jwamachili. Mkupita kwa ndaŵi, jwalakwe ŵalombele achakongwe 14, soni ŵaŵeleche ŵanache ŵachalume 22 ni ŵachakongwe 16.
22 Pakwamba ya mbili jine ja Abiya, yaŵatesile soni yaŵaŵechete, yalembedwe m’buku* ja jwakulochesya Ido.
Maloŵe Gamwiŵanda
^ Mu Chihebeli ŵatiga, “asilikali ŵakusagulidwa.”
^ Mu Chihebeli ŵatiga, “asilikali ŵakusagulidwa.”
^ Mu Chihebeli ŵatiga, “chilanga cha njete.”
^ Mu Chihebeli ŵatiga, “Jwalijose jwayiche kukugumbasya ligasa lyakwe ni.”
^ Mikate jakala ŵajipanganyaga ni utandi wa tiligu kapena balele.
^ Jeleji jili mikate jakulosya kwa Mlungu.
^ Mu Chihebeli ŵatiga, “asilikali ŵakusagulidwa.”
^ Mu Chihebeli ŵatiga, “ŵamjegamile.”
^ Kapena kuti, “matawuni gamwanamwana gakusyungulila msindawo.”
^ Kapena kuti, “mu ngani.”
